.jpg)
ទីតាំងសំណង់របងដែលចោទថាសង់លើទំនប់ត្រពាំងហែផ្កានៅខេត្តសៀមរាប។ រូបថត សហការី
សៀមរាបៈ មន្ត្រីអាជ្ញាធរជាតិអប្សរាព្រមានចាត់វិធានការរដ្ឋបាលរួមទាំងកសាងសំណុំរឿងបញ្ជូនទៅតុលាការ បើបុគ្គលដែលសាងសង់សំណង់បេតុងរំលោភលើខ្នងទំនប់ត្រពាំងហែផ្កា ផ្នែកខាងត្បូងទំហំជាង ៣ ពាន់ម៉ែត្រការ៉េ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុង-ខេត្តសៀមរាបនៅតែមិនចូលខ្លួនមកដោះស្រាយជាមួយអាជ្ញាធរ និងរុះរើសំណង់ដែលបានសង់រំលោភនេះចេញ។
កាលពីដើមខែតុលាលោក ហង់ ពៅ អគ្គនាយកនៃអគ្គនាយកដ្ឋានអាជ្ញាធរជាតិអប្សរាបានផ្ញើលិខិតមួយច្បាប់ទៅកាន់លោក យន់ សុខន ដែលជាប្រជាពលរដ្ឋរស់នៅក្នុងទីតាំងខាងលើ។ ក្នុងលិខិតចង់ឲ្យពលរដ្ឋរូបនេះ រុះរើរបង និងសំណង់បេតុងដែលបានសាងសង់របងបេតុងប្រវែង ៨៧ ម៉ែត្រទទឹង ៣៨ ម៉ែត្រ និង កម្ពស់ ២,៥០ ម៉ែត្រ ឬស្មើជាង ៣ ពាន់ម៉ែត្រការ៉េ និងសំណង់សសរបេតុងដំបូល ប្រក់ក្បឿង (រោងលម្ហែ) រំលោភលើខ្នងទំនប់ត្រពាំងហែផ្កាផ្នែកខាងត្បូង។
អាជ្ញាធរអប្សរាចាត់ទុកការសាងសង់នេះជាការលួចធ្វើសកម្មភាពដោយគ្មានការអនុញ្ញាតគឺល្មើសទៅនឹងលិខិតបទដ្ឋានគតិយុត្តជាធរមានដែលបានកំណត់ ថាត្រពាំងហែផ្កានៅភូមិបុស្សក្រឡាញ់គឺជាបុរាណដ្ឋានមួយក្នុងចំណោមបុរាណដ្ឋានជាច្រើនក្នុងខេត្ត។
អាជ្ញាធរជាតិអប្សរាមានកាតព្វកិច្ចថែរក្សាការពារ និងអភិរក្សទុកជាសម្បត្តិបេតិកភណ្ឌរបស់ជាតិ។ ដូច្នេះរាល់សកម្មភាពរុករាន សាងសង់សំណង់ថ្មី ជីកគាស់កកាយ បំផ្លិចបំផ្លាញ កែប្រែរូបរាងនៅតាមបុរាណដ្ឋានទាំងនោះដោយគ្មានការអនុញ្ញាតគឺជាបទល្មើសបំផ្លិចបំផ្លាញសម្បត្តិបេតិកភណ្ឌវប្បធម៌។
អាជ្ញាធរអប្សរាសង្កត់ធ្ងន់ថា៖ «ដូច្នេះដើម្បីស្រោចស្រង់ និងស្តារបុរាណដ្ឋានខាងលើឡើងវិញលោកត្រូវរុះរើរបង និងសំណង់បេតុងនេះចេញវិញដោយខ្លួនឯងឲ្យបានមុនថ្ងៃទី ១៥ ខែតុលាឆ្នាំ ២០១៩ ។
ម្យ៉ាងវិញទៀតលោកត្រូវជូនដំណឹងមកអាជ្ញាធរជាតិអប្សរាឲ្យបានមុន ១ សប្តាហ៍មុនចាប់ផ្តើមអនុវត្តការងារតាមការណែនាំខាងលើ»។
អាជ្ញាធរអប្សរាបញ្ជាក់ថា៖ «ក្នុងករណីលោកមិនអនុវត្តតាមទេ អាជ្ញាធរជាតិអប្សរានឹងចាត់វិធានការរដ្ឋបាល និងកសាងសំណុំរឿងទៅតុលាការ»។
លោក ឈាន រដ្ឋា ប្រធានស្តីទីនាយកដ្ឋានអភិរក្សប្រាសាទក្រៅឧទ្យានអង្គរ ប្រាប់ភ្នំពេញប៉ុស្តិ៍ពីម្សិលមិញថា ទោះជាអាជ្ញាធរអប្សរាកំណត់កាលបរិច្ឆេទបែបនេះក្តីក៏ពលរដ្ឋរូបនេះមិនបានចូលខ្លួនមកដោះស្រាយសំណង់ខុសច្បាប់ទាំងនោះទេ។
លោកបន្តថា ករណីនេះមន្ត្រីជំនាញនឹងធ្វើរបាយការណ៍ទៅថ្នាក់លើ ដើម្បីពិចារណាមុននឹងចាត់វិធានការរដ្ឋបាល និងកសាងសំណុំរឿងទៅតុលាការ។ លោកបន្តថា៖ «យើងអាចដាក់ពាក្យទៅតុលាការអីអ៊ីចឹងណា បើគាត់មិនសហការ។ យ៉ាងណាយើងមិនទាន់ធ្វើភ្លាមៗទេគឺយើងរង់ចាំគាត់ និងចង់ទុកពេលឲ្យគាត់ បើទោះបីលើស ១ ថ្ងៃ ២ ថ្ងៃក៏មិនអីដែរ ឲ្យគាត់មានឆន្ទៈសហការជាមួយអាជ្ញាធរអប្សរា។ យើងមានគោលការណ៍ទន់ភ្លន់ជាមួយប្រជាពលរដ្ឋ ព្រោះមិនធ្វើអ្វីរម៉ិងរម៉ាំង»។
លោក យន់ សុខន ជាម្ចាស់ដី និងសំណង់ដែលតម្រូវឲ្យរុះរើនេះបានប្រាប់ភ្នំពេញប៉ុស្តិ៍ពីម្សិលមិញថា ការសាងសង់របងនេះបានធ្វើឡើងរយៈពេល ២ ឆ្នាំមកហើយ ដើម្បីការពារព្រំដីដូនតា និងដំណាំដាំដុះរបស់លោក។
លោក សុខន បន្តថា អាជ្ញាធរអប្សរា រារាំងបែបនេះគឺជារឿងអយុត្តិធម៌ណាស់ សម្រាប់លោកស្របពេលប្រជាពលរដ្ឋដទៃទៀតបានសាងសង់ទាំងផ្ទះថ្ម និងវីឡាធំៗផងនោះ ប៉ុន្តែមិនត្រូវបានរារាំងដូចលោកនោះទេ។ ដូច្នេះ លោកសុំឲ្យអាជ្ញាធរអប្សរាពិចារណាឡើងវិញ និងគួរមានការដោះដូរ ឬវិធានការណាមួយឲ្យបានស្មើភាពគ្នាចំពោះអ្នករស់ក្នុងតំបន់នេះ។
លោកបញ្ជាក់ថា៖ «ដើម្បីឲ្យយើងធ្វើការបំផ្លិចបំផ្លាញរបស់យើងដែលបានសាងសង់រួចហើយ យើងមានការខាតបង់ធំធេងណាស់ក្នុងនាមយើងជាម្ចាស់ដីដើម។ បើចង់មានការបំផ្លិចបំផ្លាញកើតឡើងទាល់តែមាននីតិវិធីពីតុលាការ ហើយប្រសិនបើតុលាការ គេចេញសាលក្រមថា ឥឡូវយើងជាម្ចាស់ដីដើមខុស ត្រូវរុះរើ នោះយើងនឹងធ្វើតាមច្បាប់។ ប៉ុន្តែលិខិតរបស់អាជ្ញាធរអប្សរាចេញមកនេះមិនមានភាពស្មើភាពគ្នាទេ សម្រាប់បងប្អូនយើងដែលជាម្ចាស់ដីដើម»។
លោក ភាច ផង់ មេភូមិបុស្សក្រឡាញ់បាននិយាយថា ប្រជាពលរដ្ឋមួយចំនួនធំក្នុងចំណោមជាង ២០ គ្រួសាររួមទាំងគ្រួសារលោក យន់ សុខន បានរស់នៅទីនេះយូរហើយតាំងពីឆ្នាំ ១៩៧៩ ម្ល៉េះដែលជាដីដូនតារបស់ពួកគាត់។ លោកបញ្ជាក់ថា៖ «ក្នុងដំណាក់កាលនេះ បើយើងធ្វើតែអ្នកក្រ ហើយម្នាក់អ៊ីចឹងគឺគ្មានតម្លាភាពក្នុងការអនុវត្តច្បាប់នោះទេ»៕
