ភ្នំពេញៈ ស្ថានទូតអូស្ត្រាលីបានបើកសម្ពោធគម្រោងកែលម្អក្រុមហ៊ុនផ្គត់ផ្គង់ទឹកកម្ពុជា-អូស្ត្រាលី (WUIP) ដែលនឹងជួយចែករំលែកចំណេះដឹងដល់ក្រុមហ៊ុនផ្គត់ផ្គង់ទឹកនៅកម្ពុជាដើម្បីផ្តល់សេវាទឹកស្អាតនៅទូទាំងប្រទេសកម្ពុជាឲ្យរឹតតែប្រសើរជាងមុន ខណៈសេវានេះ មានភាពខុសគ្នាខ្លាំងរវាងប្រទេសទាំង ២។
តាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំកម្ពុជាកាលពី ១៦ កក្កដា បានឱ្យដឹងថា WUIP ដែលបានសម្ពោធកាលពីថ្ងៃ ៨ កក្កដា នោះនឹងផ្សារភ្ជាប់ក្រុមហ៊ុនផ្គត់ផ្គង់ទឹកធំមួយគឺឈ្មោះ South East Water នៅទីក្រុងមែលប៊នប្រទេស អូស្ត្រាលី ជាមួយក្រុមហ៊ុនផ្គត់ផ្គង់ទឹកចំនួន ៣ នៅកម្ពុជាតាមរយៈកម្មវិធីចែករំលែកចំណេះដឹងរយៈពេល ២ ឆ្នាំ ដើម្បីបង្កើនលទ្ធភាពប្រើប្រាស់ទឹកស្អាតមានសុវត្ថិភាព និងទៀងទាត់របស់ប្រជាជនកម្ពុជា។
ភាពជាដៃគូនេះនឹងផ្តល់នូវបទពិសោធ និងបច្ចេកទេសគ្រប់គ្រងទឹកប្រកបដោយបច្ចេកវិទ្យាដែលមានគុណភាពខ្ពស់របស់ក្រុមហ៊ុនផ្គត់ផ្គង់ទឹកអូស្ត្រាលីដល់ក្រុមហ៊ុនផ្គត់ផ្គង់ទឹកកម្ពុជា។
លោកស្រី Angella Corcoran ឯកអគ្គរាជទូតអូស្ត្រាលីប្រចាំកម្ពុជា បានលើកឡើងនៅក្នុងសេចក្តីប្រកាសព័ត៌មានថា៖ «កម្មវិធីនេះនឹងបង្កើតទំនាក់ទំនងយូរអង្វែង និងផ្លាស់ប្តូរចំណេះដឹងរវាងស្ថាប័នកម្ពុជា និងអូស្ត្រាលី។ នេះជាផ្នែកមួយនៃការប្តេជ្ញាចិត្តរបស់យើងដើម្បីគាំទ្រប្រទេស កម្ពុជា ក្នុងការអភិវឌ្ឍហេដ្ឋារចនាសម្ព័ន្ធ និងសេវាកម្ម ប្រកបដោយគុណភាពដើម្បីឱ្យប្រទេសកម្ពុជាក្លាយទៅជាប្រទេសមួយមានការរីកចម្រើនរឹងមាំ និងប្រកបដោយបរិយាប័ន្ន»។
WUIP កំពុងត្រូវបានសម្របសម្រួលដោយសមាគមទឹកអូស្ត្រាលី (AWA) ជាមួយដៃគូរបស់ខ្លួន គឺសមាគមអ្នកផ្គត់ផ្គង់ទឹកស្អាតកម្ពុជា (CWA)។
លោកស្រី សង់ ប៊ែរណាឌីន ប្រធានផ្នែកទំនាក់ទំនងនៃសមាគមអ្នកផ្គត់ផ្គង់ទឹកស្អាតកម្ពុជា (CWA) បានប្រាប់ភ្នំពេញប៉ុស្តិ៍ថា នេះជាគម្រោងដំបូងក្នុងភាពជាដៃគូរវាង CWA និងសមាគមទឹកអូស្រ្តាលី (AWA) ក្រោមជំនួយរដ្ឋាភិបាលអូស្ត្រាលី។ គម្រោងនេះជ្រើសរើសបានអាជីវករទឹកស្អាតចំនួន ៣ ដែលមានអាជីវករទឹកស្អាតបែកចាន អាជីវករទឹកក្រូចឆ្មារ និងអាជីវករទឹកស្អាតនៅកំពង់ចម្លង។
លោកស្រីបញ្ជាក់ថា៖ «សំខាន់បំផុតហ្នឹងគឺ (គម្រោង) ជួយឱ្យអាជីវករស្រុកខ្មែរផលិតទឹកឱ្យមានគុណភាពល្អជាងមុនឬក៏គាត់ប្រើប្រាស់បច្ចេកវិទ្យាដែលអាចជួយសន្សំសំចៃ និងឲ្យគាត់បង្កើនការពង្រីកបណ្តាញរបស់គាត់នៅក្នុងតំបន់សេវាកម្មរបស់គាត់»។
លោកស្រី សង់ ប៊ែរណាឌីន បន្ថែមថា កាលពីសប្តាហ៍មុនក្រុមហ៊ុន South East Water បានមកប្រទេស កម្ពុជា ដើម្បីពិនិត្យស្ថានីយទឹកស្អាតកម្ពុជាដែលស្ថិតក្នុងគម្រោងដើម្បីស្វែងយល់ពីភាពខុសគ្នាលើការផលិតទឹកស្អាត ខណៈបច្ចេកទេសវិទ្យាផលិតទឹកស្អាតនៅអូស្ត្រាលីល្អជាងកម្ពុជាឆ្ងាយខ្លាំង។
ទន្ទឹមនឹងនេះ ក្រុមហ៊ុនក៏បានជួបជាមួយអាជីវករទឹកស្អាតទាំង ៣ ស្ថានីយនេះផងដែរ ដោយពួកគេបានប្រាប់ពីការលំបាកក្នុងការប្រើប្រាស់បច្ចេកវិទ្យាផលិតទឹកស្អាតដូចជា មិនត្រូវតាមស្តង់ដា និងមានការប្រើប្រាស់អគ្គិសនីច្រើនពេកធ្វើឲ្យបាត់បង់ចំណេញ និងបាត់បង់ទឹក រកមិនឃើញមូលហេតុដូចជាការលេច និងធ្លាយទុយោជាដើម។
លោកស្រីបានបញ្ជាក់ថា៖ «ដល់ពេលគាត់ (ក្រុមហ៊ុនអូស្ត្រាលី) មើលឃើញស្ថានភាពហ្នឹងហើយ អាជីវករទឹកស្អាតទាំង ៣ ក្រុមហ៊ុនហ្នឹង ក៏ត្រូវបានអញ្ជើញទៅអូស្ត្រាលីរៀបចំផែនការជាមួយគ្នា មានវគ្គបណ្តុះបណ្តាល មានទស្សនកិច្ចសិក្សានៅក្រុមហ៊ុន South East Water ហ្នឹង»។
លោកស្រី សង់ ប៊ែរណាឌីន បានបន្ថែមថា នៅខែតុលា ខាងមុខនេះ AWA និង CWA នឹងអញ្ជើញគណៈប្រតិភូដូចជា ក្រុមហ៊ុនដែលរកស៊ីលើវិស័យទឹកស្អាតនៅអូស្ត្រាលីឲ្យមកតាំងពិព័រណ៍នៅប្រទេសកម្ពុជាដែលនឹងមានការពិភាក្សាអំពីច្បាប់ និងគោលនយោបាយទាក់ទងនឹងទឹកស្អាតដែលមានលក្ខណៈខុសប្លែកគ្នារវាងកម្ពុជា និងអូស្ត្រាលី។ វេទិកានេះក៏នឹងជួយអាជីវករទឹកស្អាតកម្ពុជាក្នុងការពង្រីកបណ្តាញទៅតាមអាជ្ញាប័ណ្ណដែលពួកគាត់មាន ហើយនិងពិភាក្សាអំពីថាតើក្នុងនាមជាដៃគូអភិវឌ្ឍន៍ទឹកស្អាតអូស្រ្តាលីអាចជួយអ្វីខ្លះដល់វិស័យទឹកស្អាតនៅកម្ពុជាបាន?