ក្រចេះ: លោក គជ់ សុខហេង សិប្បករផលិតស្រាសម្នាក់ដែលបានធ្វើឲ្យពុលស្លាប់មនុស្ស ៥ នាក់នៅក្នុងស្រុកសំបូរកាលពីសប្ដាហ៍មុនត្រូវបានតុលាការខេត្តសម្រេចឃុំខ្លួនកាលពីម្សិលមិញជាបណ្ដោះអាសន្ន ក្រោយពីជាប់ចោទពីបទមនុស្សឃាតដោយចេតនា។
លោក ជា សុភ័ក្រ អ្នកនាំពាក្យអយ្យការអមសាលាដំបូងខេត្តក្រចេះបានប្រាប់ភ្នំពេញប៉ុស្តិ៍នៅថ្ងៃម្សិលមិញថាលោក អេង ចំណាប់ ចៅក្រមស៊ើបសួរបានសម្រេចឃុំខ្លួនលោក សុខហេង ក្នុងពន្ធនាគារខេត្តពីបទ «មនុស្សឃាតដោយចេតនាតាមមាត្រា ២០៧ នៃក្រមព្រហ្មទណ្ឌបទល្មើសដែលត្រូវផ្ដន្ទាទោសអាចនឹងជាប់ពន្ធនាគារពី ១ ឆ្នាំទៅ ៥ ឆ្នាំ និងពិន័យជាប្រាក់ពី ២ លានរៀលទៅ ៦ លានរៀល បើសិនជាតុលាការរកឃើញកំហុសតាមការចោទប្រកាន់។
លោក សុភ័ក្រ បានអះអាងថា៖ «នៅពេលនេះជនសង្ស័យកំពុងត្រូវបានឃុំខ្លួននៅពន្ធនាគារខេត្តក្រចេះ ដើម្បីរង់ចាំការជំនុំជម្រះនៅពេលក្រោយ»។
ករណីពុលស្រានៅស្រុកសំបូរ ខេត្តក្រចេះបានកើតឡើងកាលពីថ្ងៃទី ១៨ ក្រោយពីអ្នកភូមិបាននាំគ្នាទៅចូលរួមពិធីបុណ្យសព ៧ ថ្ងៃ របស់បុរសម្នាក់ក្នុងឃុំកោះខ្ញែរ ហើយបានផឹកស្រាស ដែលម្ចាស់គ្រួសារនៃសពបានទិញពីរោងសិប្បកម្មផលិតស្រាសរបស់លោក គជ់ សុខហេង។ ជនរងគ្រោះ ៥ នាក់ក្នុងចំណោម ៧៥ នាក់ដែលបានបរិភោគស្រាសនោះបានពុលស្លាប់ ក្រោយពីបញ្ជូនទៅពិនិត្យព្យាបាលនៅឯមន្ទីរពេទ្យខេត្តក្រចេះបានប្រមាណ ២ ទៅ ៣ ថ្ងៃ។ ក្រុមវេជ្ជបណ្ឌិតបានអះអាងដោយផ្អែកលើរោគវិនិច្ឆ័យរបស់ជនរងគ្រោះថា បង្កឡើងដោយការទទួលទានស្រាស ច្រើនហួសប្រមាណ និង ក្នុងស្រាសនោះ មានសារធាតុមេតាណុលកម្រិតខ្ពស់។ កាលពីដើមខែឧសភាមានមនុស្ស ១៤ នាក់ស្លាប់ដោយពុលស្រាស និងទឹកមានជាតិគីមី៕