រតនគិរីៈ ក្រុមអ្នកភូមិជាជនជាតិទំពួនប្រមាណ ១៦០ នាក់ដែលសង្ស័យថា ពុលចំណីអាហារក្នុងពិធីបុណ្យសពនោះ គិតមកទល់ថ្ងៃទី ១១ ខែវិច្ឆិកានេះ ត្រូវបានគ្រូពេទ្យជួយបានធូរស្បើយវិញហើយ បន្ទាប់ពីជួបហេតុការណ៍ពុលអាហារកាលពីថ្ងៃទី ៨ ខែ វិច្ឆិកា នៅភូមិ ល្អើនក្រែន ឃុំ-ស្រុក អូរជុំ ខេត្តរតនគិរី។
លោក ខាត់ សុផល នាយនគរបាលប៉ុស្តិ៍ឃុំអូរជុំ បានប្រាប់នៅថ្ងៃទី ១១ ខែវិច្ឆិកានេះថា ករណីអ្នកភូមិពុលអាហារនោះរហូតមកទល់ពេលនេះ ពួកគាត់បានធូរស្បើយនិងត្រឡប់មកផ្ទះវិញអស់ហើយ បន្ទាប់ពីក្រុមគ្រូពេទ្យបង្អែកស្រុក ជួយសង្គ្រោះ និងព្យាបាលមក។
លោកប្រាប់ថា ការពុលចំណីអាហារនេះ មិនដឹងមកពីអ្វីឱ្យពិតប្រាកដទេ ប៉ុន្តែប្រហែលជាពួកគាត់ខ្វះអនាម័យ ព្រោះពួកគាត់នាំគ្នាហូបសាច់ឆៅ និងផឹកទឹកអូរ ដែលនៅខាងលើមានគេបាញ់ថ្នាំក្នុងចម្ការស្វាយចន្ទី និងដំណាំស្វាយ ។
លោកបានបញ្ជាក់ថា៖ «ពួកគាត់មានអាការក្អូតចង្អោរ និងចុកពោះ ហើយបើតាមមើលគឺមកពីពួកគាត់ហូបសាច់ក្របីឆៅនិងហូបទឹកអូរ មិនបានដាំ។ ពួកគាត់ជាជនជាតិទំពួនធ្វើអ្វីតាមទម្លាប់ដោយមិនគិតពីអនាម័យអីទេ»៕