.jpg)
អ្នកជំនាញកំពុងដំឡើងឧបករណ៍ស្រូបយកទឹកពីបរិយាកាស នៅដែនជម្រកសត្វព្រៃស្រែពកកាលពីថ្ងៃទី ៥ ខែឧសភា។ សហការី
មណ្ឌគិរីៈ មូលនិធិអភិរក្សនិងសង្គ្រោះសត្វព្រៃកម្ពុជា (WWF-Cambodia) សហការជាមួយមន្ទីរបរិស្ថានខេត្តមណ្ឌលគិរីបានដំឡើងឧបករណ៍បច្ចេកវិទ្យាថ្មីមួយ ដែលមានឈ្មោះថា «Zero Mass Water» នៅក្នុងតំបន់ដែនជម្រកសត្វព្រៃស្រែពក ដើម្បីទាញយកប្រភពទឹកពីបរិយាកាស មកប្រើប្រាស់ក្នុងគ្រាមានភាពរាំងស្ងួត។ នេះបើតាមមន្ត្រីឧទ្យានុរក្សបានឲ្យដឹងកាលពីម្សិលមិញ។
Zero Mass Water គឺជា «ប្រព័ន្ធផលិតទឹក ដែលប្រើប្រាស់ដោយពន្លឺព្រះអាទិត្យ»។
ក្រុមជំនាញការបច្ចេកទេសរបស់ក្រុមហ៊ុនអារីហ្សូណា ដែលបានបង្កើតនូវឧបករណ៍បច្ចេកវិទ្យានេះឡើង កាលពីដើមឆ្នាំ ២០១៦ បានឲ្យដឹងថា៖ «ទឹកដែលផលិតចេញពីប្រព័ន្ធនេះ គឺជាទឹកស្អាតដែលអាចយកមកប្រើប្រាស់ និង បរិភោគបានប្រកបដោយសុវត្ថិភាព»។
លោក ប៉ែន ភត្រា នាយកដែនជម្រកសត្វព្រៃស្រែពក បានឲ្យដឹងថា ឧបករណ៍បច្ចេកវិទ្យាថ្មីនេះ ទើបត្រូវបាននាំយកមកដំឡើងសាកល្បង នៅក្នុងតំបន់ដែនជម្រកសត្វព្រៃស្រែពកនៃប្រទេស កម្ពុជា ជាលើកដំបូង លើផ្ទៃដីប្រមាណជាង ១០ ម៉ែត្រការ៉េ។
លោកបានបញ្ជាក់ថា៖ «ក្រុមជំនាញការបច្ចេកទេសពីអង្គការដៃគូរបស់យើង គឺ WWF-Cambodia បានដំឡើងឧបករណ៍នេះ ចំនួន ៤ ផ្ទាំង ដែលមានសមត្ថភាពអាចស្រូបយកសំណើមបរិយាកាសឬជាតិទឹកពីក្នុងខ្យល់ បានពី ២០ ទៅ ៣០ លីត្រ ក្នុង ១ ថ្ងៃ សម្រាប់ជួយផ្គត់ផ្គង់ដល់ក្រុមមន្ត្រីឧទ្យានុរក្សយើងប្រើប្រាស់ប្រចាំថ្ងៃពិសេសនៅក្នុងរដូវក្ដៅដ៏ស្ងួតហួតហែងនេះ»។
លោកបានបន្តថា នៅពេលនេះទឹកដែលបានផលិតចេញពីឧបករណ៍បច្ចេកវិទ្យាថ្មីនេះ មិនទាន់ត្រូវបានអនុញ្ញាតឲ្យប្រើប្រាស់នៅឡើយទេដោយក្រុមមន្ត្រីជំនាញបាននាំយកទៅពិសោធ នៅឯរាជធានីភ្នំពេញ ដើម្បីឲ្យប្រាកដថា វាពិតជាទឹកស្អាត និងប្រកបដោយសុវត្ថិភាព ឬមួយយ៉ាងណាជាមុនសិន។
ទោះជាបែបណាក្ដីលោក សេង ទៀក នាយកប្រចាំប្រទេស នៃមូលនិធិអភិរក្ស និងសង្គ្រោះសត្វព្រៃកម្ពុជា WWF Cambodia ដែលបាននាំយកឧបករណ៍បច្ចេកវិទ្យាចុងក្រោយសម្រាប់វិស័យធនធានទឹក មកកម្ពុជាជាលើកដំបូងនេះ បានថ្លែងប្រាប់ភ្នំពេញប៉ុស្តិ៍កាលពីម្សិលមិញថា៖ «វាមិនចាំបាច់មានការពិសោធអ្វីបន្ថែមទៀតនោះទេ ព្រោះទឹកដែលបានផលិតចេញពីឧបករណ៍បច្ចេកវិទ្យាថ្មីចុងក្រោយនេះ វាមានសុវត្ថិភាពមួយរយភាគរយ។ វាមានគុណភាពល្អជាងទឹកបរិសុទ្ធ ដែលផលិតចេញពីសិប្បកម្ម និងរោងចក្រមួយចំនួន»។
បើតាមលោក ទៀក ឧបករណ៍នេះ មិនគ្រាន់តែអាចផលិតទឹកស្អាតប៉ុណ្ណោះទេ តែ ថែមទាំងអាចទាញយកថាមពលអគ្គិសនីសម្រាប់ប្រើប្រាស់បានផងដែរ ព្រោះវាបង្កើតឡើងដោយមានដង្គុំនៃបន្ទះសូឡា សម្រាប់ទាញយកថាមពលពីពន្លឺព្រះអាទិត្យ សម្រាប់ដំណើរការម៉ាស៊ីនបំប្លែងចំហាយទឹកពីធម្មជាតិឲ្យទៅជាទឹកស្អាតដោយស្វ័យប្រវត្តិ។
លោកបានបន្ថែមថា នៅពេលអនាគតនៅតាមតំបន់ដែនជម្រកសត្វព្រៃ និង ព្រៃការពារនិងអភិរក្សមួយចំនួនទៀត អាចនឹងមានការដំឡើងនូវឧបករណ៍ Zero Mass Water នេះឡើងជាបន្តបន្ទាប់ ដើម្បីជួយដល់មន្ត្រីឧទ្យានុរក្សប្រើប្រាស់ក្នុងជីវភាពប្រចាំថ្ងៃប្រកបដោយផាសុកភាព៕
