ភ្នំពេញៈ យ៉ាងហោចណាស់មនុស្ស ១៦ នាក់បានស្លាប់ និង ៦០ នាក់ទៀតបានរងរបួសធ្ងន់ និងស្រាល ដោយសារគ្រោះថ្នាក់ចរាចរណ៍នៅទូទាំងប្រទេសក្នុងអំឡុងពេល ៣ ថ្ងៃនៃព្រះរាជពិធីបុណ្យអុំទូក (ថ្ងៃទី ២១-២៣) ខែវិច្ឆិកា ឆ្នាំ ២០១៨ គឺមានការធ្លាក់ចុះ ៩ ភាគរយ បើធៀបទៅនឹងពិធីបុណ្យអុំទូកកាលពីឆ្នាំ ២០១៧ ដែលមានមនុស្សស្លាប់រហូតដល់ ២៥ នាក់។
នេះបើតាមរបាយការណ៍នាយកដ្ឋាននគរបាលចរាចរណ៍ និងសណ្តាប់ធ្នាប់ ដែលភ្នំពេញប៉ុស្តិ៍ទទួលបានកាលពីថ្ងៃអាទិត្យ។ របាយការណ៍បន្តថារាជធានីភ្នំពេញមានករណីគ្រោះថ្នាក់ចរាចរណ៍កើតឡើងច្រើនជាងគេដែលបង្កឲ្យមនុស្សស្លាប់ ៤ នាក់ និងរបួស ១៤ នាក់ ខណៈនៅខេត្តបន្ទាយមានជ័យមានអ្នកស្លាប់ ៣ នាក់របួស ១ នាក់ខេត្តបាត់ដំបងស្លាប់ ២ នាក់ របួស ១ នាក់ ខេត្តកំពង់ធំស្លាប់ ២ នាក់របួស ៧ នាក់ ខេត្តស្វាយរៀងស្លាប់ ២ នាក់របួស ១ នាក់ ខេត្តព្រះសីហនុ ស្លាប់ ២ នាក់ របួស ៤ នាក់ និងខេត្តត្បូងឃ្មុំស្លាប់ ១ នាក់របួស ១ នាក់។
មូលហេតុនៃការកើតមាននូវគ្រោះថ្នាក់ចរាចរណ៍គឺបណ្ដាលមកពីការបើកបរលើសល្បឿនកំណត់ មិនគោរពស្លាកសញ្ញា និងគំនូសសញ្ញាចរាចរណ៍ និងបើកបរក្នុងស្ថានភាពស្រវឹង និងប្រជែងគ្នាដោយមិនពិនិត្យទៅលើស្ថានភាពផ្លូវ និងសិទ្ធិជាអាទិភាព។
ទោះយ៉ាងណាក្នុងរបាយការណ៍នោះបញ្ជាក់ថា៖ «អត្រាអ្នកស្លាប់ក្នុងគ្រោះថ្នាក់ចរាចរណ៍រយៈពេល ៣ ថ្ងៃនៃពិធីបុណ្យអុំទូកឆ្នាំ ២០១៨ មានការថយចុះ ៩ នាក់បើធៀបទៅនឹងឆ្នាំ ២០១៧ ដែលមានអ្នកស្លាប់ដល់ ២៥ នាក់»។
ក្រៅពីគ្រោះថ្នាក់ចរាចរណ៍ក៏មានករណីលិចទូករបស់កីឡាករដែលចូលរួមការប្រកួតទូកង ទូកចែវ ក្នុងពិធីបុណ្យអុំទូកនេះចំនួន ១១ ទូកផងដែរ ប៉ុន្តែមិនបង្កឲ្យកីឡាករណាម្នាក់មានគ្រោះថ្នាក់ ឬបាត់បង់ជីវិតនោះទេ ដោយសារមានការជួយអន្តរាគមន៍ទាន់ពេលវេលាពីកម្លាំងនគរបាល និងទាហានជើងទឹក ដែលប្រចាំការនៅតាមដងទន្លេសាបក្នុងតំបន់ដែលមានរៀបចំពិធីប្រណាំងទូកនៅមុខព្រះបរមរាជវាំងក្នុងរាជធានីភ្នំពេញ។ នេះបើយោងតាមរបាយការណ៍របស់គណៈកម្មាធិការជាតិរៀបចំពិធីបុណ្យជាតិ និងអន្តរជាតិ។
លោក ឆាយ គឹមខឿន ប្រធានលេខាធិការដ្ឋានគណៈកម្មការការពារក្នុងពិធីបុណ្យជាតិ និងអន្តរជាតិបានគូសបញ្ជាក់ក្នុងរបាយការណ៍នោះថា ក្នុងអំឡុងពេល ៣ ថ្ងៃនៃពិធីបុណ្យអុំទូកសមត្ថកិច្ចបានធ្វើការដកហូតអាវដែលមានសរសេរអក្សរ Police និង Army ពីពលរដ្ឋ ៣៣ នាក់ និងធ្វើការអប់រំពួកគេឲ្យបញ្ឈប់ការពាក់អាវដែលមានសរសេរអក្សរទាំង ២ នេះព្រោះពួកគេមិនមែនជាកងកម្លាំង។
ជាមួយគ្នានេះសមត្ថកិច្ចបានបង្ក្រាបការលួចបង្ហោះ Drone ក្នុងតំបន់ហាមឃាត់ដោយគ្មានការអនុញ្ញាតដោយឃាត់ខ្លួនមនុស្ស ៣ នាក់ធ្វើការអប់រំ។ «សមត្ថកិច្ចបានអន្តរាគមន៍ជួយសង្គ្រោះជនវង្វេងក្រុមគ្រួសារដែលមកចូលរួមទស្សនាពិធីបុណ្យអុំទូកសរុប ១៨២ នាក់ក្នុងនោះមានក្មេងតូចៗក្រោមអាយុ ១០ ឆ្នាំ ១៧៣ នាក់ (ស្រី ៥៧ នាក់) មនុស្សចាស់ ៨ នាក់ និងស្ត្រីទេសចរជាជនជាតិវៀតណាមម្នាក់»។
លោកអះអាងថាពិធីបុណ្យអុំទូកឆ្នាំនេះ ក្នុងរយៈពេល ៣ ថ្ងៃមានអ្នកមកចូលរួមទស្សនាសរុប ៤,៥ លាននាក់៕