.jpg)
ជនសង្ស័យពាក់ព័ន្ធគ្រឿងញៀនដែលត្រូវបានចាប់ខ្លួននៅកំពង់ចាម។ រូប ប៉ូលិស
កំពង់ចាម/ភ្នំពេញៈ សមត្ថកិច្ចខេត្តកំពង់ចាមបាននិងកំពុងសាកសួរជនសង្ស័យចំនួន ១៩ នាក់ ពាក់ព័ន្ធករណីប្រើប្រាស់ និងចែកចាយគ្រឿងញៀននៅក្រុងកំពង់ចាម និងស្រុកជើងព្រៃ ក្រោយពីឃាត់ខ្លួនជាបន្តបន្ទាប់ចាប់ពីថ្ងៃទី ១១-១៣ ខែមករា ខណៈជនសង្ស័យ ២ នាក់ផ្សេងទៀតត្រូវបានបញ្ជូនទៅតុលាការជុំវិញការជួញដូរគ្រឿងញៀនជិត ១០ គីឡូក្រាម នៅសង្កាត់សំរោង ខណ្ឌពោធិ៍សែនជ័យ។
លោក ឯម កុសល ស្នងការនគរបាលខេត្តកំពង់ចាមពីម្សិលមិញបដិសេធការធ្វើអត្ថាធិប្បាយជុំវិញករណីនេះ ដោយលោកអះអាងថា កំពុងជាប់រវល់ប្រជុំបញ្ហាសន្ដិសុខ មិនអាចនិយាយបានទេ។
ប៉ុន្ដែលោក ឯម កុសល ត្រូវបាន Fresh News ដកស្រង់សម្ដីថា ក្រោយឃាត់ខ្លួនជនសង្ស័យទាំង ១៩ នាក់ សមត្ថកិច្ចជំនាញបាន និងកំពុងធ្វើការសាកសួរដើម្បីកសាងសំណុំរឿងចាត់ការបន្ដតាមនីតិវិធី។ ប្រតិបត្តិការនេះត្រូវបានធ្វើឡើងនៅថ្ងៃទី ១១ ខែមករា ដោយកម្លាំងជំនាញការិយាល័យប្រឆាំងគ្រឿងញៀនខេត្តជាមួយជំនាញក្រុងកំពង់ចាម និងស្រុកជើងព្រៃ ដឹកនាំដោយលោក ជីវ សេងរស់ នាយការិយាល័យប្រឆាំងគ្រឿងញៀនខេត្តកំពង់ចាម។
លោកបន្តថា ប្រតិបត្តិការនេះកម្លាំងសមត្ថកិច្ចជំនាញបានដកហូតវត្ថុតាង រួមមានម្សៅក្រាមពណ៌សជាថ្នាំញៀនចំនួន ៧ កញ្ចប់ និងទូរស័ព្ទដៃចំនួន ១៦ គ្រឿង ម៉ូតូចំនួន ១០ គ្រឿង និងឧបករណ៍ប្រើប្រាស់គ្រឿងញៀនមួយចំនួន។
លោក ប្រាក់ សុគុណ អធិការនគរបាលស្រុកជើងព្រៃបានឲ្យដឹងពីម្សិលមិញថា ប្រតិបត្តិការនេះកម្លាំងសមត្ថកិច្ច និងមន្ត្រីជំនាញខេត្តកំពង់ចាមបានសហការគ្នាស្រាវជ្រាវ និងឃាត់ខ្លួនជនសង្ស័យចំនួន ១៩ នាក់។ ពួកគេត្រូវបានឃាត់ខ្លួននៅទីកន្លែង និងពេលវេលាខុសគ្នាដោយចាប់ខ្លួនពីថ្ងៃទី ១១ ដល់ថ្ងៃទី ១៣ ខែមករា ជាបន្តបន្ទាប់។
លោកបន្តថា ក្រោយពេលឃាត់ខ្លួនលោកបានបញ្ជូនជនសង្ស័យទាំងអស់នោះ និងវត្ថុតាងនានាដែលរឹបអូសបានទៅការិយាល័យប្រឆាំងគ្រឿងញៀនខេត្តកំពង់ចាមដើម្បីសាកសួរ និងចាត់ចែងតាមនីតិវិធីច្បាប់។
លោក សុគុណ បញ្ជាក់ថា៖ «ពេលនេះ ខ្ញុំអត់ទាន់ដឹងថា នគរបាលជំនាញយើងគាត់បញ្ជូនទៅតុលាការហើយ ឬនៅទេ ព្រោះខ្ញុំបានបញ្ជូនសំណុំរឿងទៅអស់ហើយ»។
ករណីស្រដៀងគ្នានេះដែរ កម្លាំងមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានឃាត់ខ្លួនជនសង្ស័យចែកចាយគ្រឿងញៀនទ្រង់ទ្រាយធំ ១ ករណីនៅខណ្ឌពោធិ៍សែនជ័យ រាជធានីភ្នំពេញ និងស្រុកថ្ពង ខេត្តកំពង់ស្ពឺ ដោយឃាត់ខ្លួនជនសង្ស័យចំនួន ២ នាក់ និងរឹបអូសបានគ្រឿងញៀនសរុបជិត ១០ គីឡូក្រាម។
លោក ឡឹក វណ្ណៈ នាយកមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិថ្លែងពីម្សិលមិញថា ជនសង្ស័យទាំង ២ នាក់នេះត្រូវបានសមត្ថកិច្ចជំនាញបញ្ជូនទៅសាលាដំបូងរាជធានីភ្នំពេញរួចរាល់ហើយកាលពីថ្ងៃទី ១២ ខែមករា ដើម្បីឲ្យតុលាការចាត់ចែងតាមនីតិវិច្បាប់ ។
លោកបញ្ជាក់ថា៖ «ក្រៅពីនេះតុលាការជាអ្នកសម្រេច ឥឡូវវាហួសពីដែនសមត្ថកិច្ចខ្ញុំហើយ»។
លោក គុជ គឹមឡុង អ្នកនាំពាក្យ និងជាព្រះរាជអាជ្ញារងនៃសាលាដំបូងរាជធានីភ្នំពេញពីម្សិលមិញមិនទាន់ឆ្លើយតបជុំវិញករណីនេះនៅឡើយទេ។
តាមរបាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានឲ្យដឹងពីម្សិលមិញថា ប្រតិបត្តិការនេះសមត្ថកិច្ចបានឃាត់ខ្លួនជនសង្ស័យនៅល្ងាចថ្ងៃទី ១០ ខែមករា ដោយឃាត់ខ្លួនមនុស្សម្នាក់នៅភូមិសំរោងក្រោម សង្កាត់សំរោង ខណ្ឌពោធិ៍សែនជ័យ រាជធានីភ្នំពេញ និងម្នាក់ទៀតឃាត់នៅភូមិជ្រាវ ឃុំអមលាំង ស្រុកថ្ពង ខេត្តកំពង់ស្ពឺ។
របាយការណ៍បន្តថា ការបង្ក្រាបនេះធ្វើឡើងក្រោយទទួលបញ្ជាពីលោក នេត សាវឿន អគ្គស្នងការនគរបាលជាតិ លោក ម៉ក់ ជីតូ អគ្គស្នងការរង និងលោក ឡឹក វណ្ណៈ ប្រធានមន្ទីរប្រឆាំងគ្រឿងញៀនក្រោមការសម្របសម្រួលពីតំណាងអយ្យការសាលាដំបូងរាជធានីភ្នំពេញ លោក ខាំ សុផារី និងដឹកនាំប្រតិបត្តិការផ្ទាល់ដោយលោក ឃឹង សារ៉ាត់ នាយករងមន្ទីរប្រឆាំងគ្រឿងញៀន។
របាយការណ៍បន្ថែមថា ជាលទ្ធផលសមត្ថកិច្ចឃាត់ខ្លួនជនសង្ស័យ ២ នាក់ឈ្មោះ គឹម វ៉ា និងឈ្មោះ កែវ សុធា ព្រមទាំងដកហូតសារធាតុញៀនប្រភេទមេតំហ្វេតាមីន (ICE) ទម្ងន់ ៩,៦ គីឡូក្រាម រថយន្ត ២ គ្រឿង ជញ្ជីងថ្លឹង ២ គ្រឿង និងទូរស័ព្ទ ២ គ្រឿង។ ភ្លាមៗនោះសមត្ថកិច្ចបានបញ្ជូនជនសង្ស័យ និងវត្ថុតាងមកមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិដើម្បីកសាងសំណុំរឿងចាត់ការបន្ដតាមនីតិវិធី។
លោក មាស សុវណ្ណ ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជាជំរុញឲ្យសមត្ថកិច្ចបន្តអនុវត្តច្បាប់បន្ថែមទៀត ដើម្បីកាត់បន្ថយការប្រើប្រាស់គ្រឿងញៀន និងអាចឈានទៅលុបបំបាត់ការជួញដូរគ្រឿងញៀនតែម្ដង។
លោកថា គ្រឿងញៀនពិតជាបំផ្លាញអនាគតខ្លួនឯង គ្រួសារ និងសង្គមជាតិ ជាពិសេសបង្កឲ្យមានអសន្ដិសុខសង្គម។ ដូច្នេះសមត្ថកិច្ចពាក់ព័ន្ធ និងអាណាព្យាបាលត្រូវតែសហការគ្នាផ្សព្វផ្សាយ អប់រំ ក៏ដូចជា បង្ក្រាបបទល្មើសជួញដូរឲ្យខាងតែបាន។
លោកបញ្ជាក់ថា៖ «ហើយកិច្ចការងារចុះបង្ក្រាបបទល្មើសគ្រឿងញៀនកន្លងមកនេះគឺយើងសាទរ និងលើកទឹកចិត្តមន្ត្រី យើងបន្ថែមទៀត។ កិច្ចការងារនេះត្រូវតែមានការចូលរួមពីគ្រប់ភាគីពាក់ព័ន្ធទាំងអស់ដើម្បីឲ្យប្រទេសជាតិយើងគ្មានគ្រឿងញៀន»៕
