.jpg)
ទិដ្ឋភាពខូចខាតដោយសារបាតុភូតខ្យល់កន្ត្រាក់ថ្មីៗកន្លងមកនេះ។ រូបថត ប៉ូលិស
ភ្នំពេញៈ យ៉ាងហោចណាស់មានមនុស្សស្លាប់ និងរបួសសរុបជាង ៣០០ នាក់ ដោយសារបាតុភូតខ្យល់កន្ត្រាក់ រន្ទះបាញ់ និងទឹកជំនន់ក្នុងរយៈពេល ៩ ខែឆ្នាំនេះ។ នេះបើតាមទិន្នន័យដែលផ្ដល់ឲ្យដោយគណៈកម្មាធិការជាតិគ្រប់គ្រងគ្រោះមហន្តរាយកាលពីម្សិលមិញ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្តិ៍ពីម្សិលមិញថាក្នុងរយៈពេល ៩ ខែឆ្នាំ ២០១៩ នេះ (ពីដើមខែមករាដល់ដំណាច់ខែកញ្ញា) មានមនុស្សយ៉ាងហោចណាស់ ១១៤ នាក់បានស្លាប់ និង ២០៤ នាក់ទៀត បានរងរបួសដោយសារគ្រោះមហន្តរាយខ្យល់កន្ត្រាក់ រន្ទះបាញ់ និងទឹកជំនន់។ តួលេខនេះបានថយចុះប្រមាណ ២០ ភាគរយ បើធៀបរយៈពេលដូចគ្នាជាមួយនឹងឆ្នាំមុនដែលមានអ្នកស្លាប់រហូតដល់ ១៦៣ នាក់ និងអ្នករបួស ២២៤ នាក់។
លោក វី បានថ្លែងថាក្នុងរយៈពេលនេះដោយសារបាតុភូតភ្លៀងលាយឡំខ្យល់កន្ត្រាក់បានធ្វើឲ្យមនុស្ស ៩ នាក់ស្លាប់ និង ១១៧ នាក់រងរបួស ខណៈផ្ទះរបស់ពលរដ្ឋ ១ ៥៩៥ ខ្នង បានរងការខូចខាតទាំងស្រុង និង ១៣ ០៦៧ ខ្នងទៀតបានរងការខូចខាតជាមធ្យម។ ក្រៅពីនេះបាតុភូតខ្យល់កន្ត្រាក់ក៏បានបំផ្លិចបំផ្លាញតូបលក់ដូររបស់អាជីវករនៅតំបន់ឆ្នេរសរុបអស់ ៦៨ តូប និងបង្កការខូចខាតអគារសាធារណៈរួមមាន សាលារៀនសាលាឃុំ មណ្ឌលសុខភាព និងប៉ុស្តិ៍នគរបាលសរុប ១២៩ ខ្នងផងដែរ។
ចំណែកបាតុភូតរន្ទះបាញ់វិញបានធ្វើឲ្យមនុស្ស ៨៥ នាក់ស្លាប់ និង ៧៥ នាក់ទៀតរងរបួសធ្ងន់ និងស្រាល ព្រមទាំងបង្កឲ្យសត្វពាហនៈសរុបចំនួន ៨៦ ក្បាលបានងាប់ និងបង្កការខូចខាតផ្ទះពលរដ្ឋចំនួន ១០ ខ្នង ខណៈគ្រោះទឹកជំនន់ទន្លេមេគង្គ និងជំនន់ទឹកភ្លៀងបានបង្កឲ្យមនុស្សយ៉ាងតិច ២០ នាក់ស្លាប់ និង ១១ នាក់ទៀតរងរបួស។
លោក កែវ វី បានថ្លែងដោយផ្ដោតលើគ្រោះមហន្តរាយពីទឹកជំនន់ថា៖ «នៅឆ្នាំនេះទឹកជំនន់បានចាប់ផ្ដើមជន់ឡើងនៅដើមខែកញ្ញាគឺយឺតជាងកាលពីឆ្នាំមុនប្រមាណជាងមួយខែ។ រីឯផលប៉ះពាល់ដល់ជីវិតមនុស្ស និងដំណាំកសិផលរបស់ពលរដ្ឋក៏មានការថយចុះគួរឲ្យកត់សម្គាល់ផងដែរបើធៀបទៅនឹងឆ្នាំមុនក្នុងរយៈពេលដូចគ្នា»។
បើតាមលោក កែវ វី កាលពីឆ្នាំមុនក្នុងរយៈពេលដូចគ្នានេះ គ្រោះទឹកជំនន់ បានធ្វើឲ្យមនុស្ស ៦១ នាក់ស្លាប់ និង ១២៣ នាក់រងរបួស ព្រមទាំងបង្កការខូចខាតដំណាំស្រូវអស់ ៥៤ ៤៩៥ ហិកតា និងដំណាំរួមផ្សំចំនួន ១១ ៣៨៥ ហិកតា។
យ៉ាងណាក៏ដោយសម្រាប់ឆ្នាំនេះជំនន់ទឹកភ្លៀងនៅតែបន្តការជន់លិចជាបន្តបន្ទាប់នៅតាមបណ្ដាខេត្តវាលទំនាបមួយចំនួនដោយសារតែបញ្ហាអាកាសធាតុ។
ជុំវិញករណីនេះ ក្រសួងធនធានទឹក និងឧតុនិយមបានព្យាករថា កម្ពុជានៅតែបន្តរងនូវឥទ្ធិពលនៃជ្រលងប្រព័ន្ធសម្ពាធទាបរួមទាំងខ្យល់ពីសមុទ្រចិនខាងត្បូងបានបង្កឲ្យមានភ្លៀងធ្លាក់រហូតដល់ថ្ងៃទី ៥ ខែតុលា ខាងមុខនេះក្នុងកម្រិតពីមធ្យមទៅច្រើននៅតាមបណ្ដាខេត្តមួយចំនួនជាប់ព្រំប្រទល់ប្រទេសវៀតណាម និងរាជធានីខេត្តមួយចំនួនទៀតដែលស្ថិតនៅក្នុងតំបន់វាលទំនាប។
កាលពីម្សិលមិញអាជ្ញាធរខេត្តបន្ទាយមានជ័យបានប្រកាសបិទចរាចរណ៍ជាបណ្ដោះអាសន្នលើកំណាត់ផ្លូវមួយចំនួនក្នុងខេត្តនេះដោយសារតែមានទឹកជន់លិច។
លោក គឹម សុវណ្ណ ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យបានប្រកាសថា ផ្លូវជាតិ ២៦៨A ចាប់ពីចំណុចព្រៃមាន់ដល់ផ្លូវលេខ ៦ (ផ្លូវទៅអាងត្រពាំងថ្មនៃស្រុកភ្នំស្រុក) ត្រូវបានទឹកជន់លិច និងហូរឆ្លងកាត់ចំនួន ៤ កន្លែងដែលមិនអាចធ្វើចរាចរណ៍ឆ្លងកាត់ទៅមកបាន។
លោកបានបញ្ជាក់ថា៖ «ដើម្បីការពារកុំឲ្យមានការខូចខាតផ្លូវធ្ងន់ធ្ងរជាងនេះ អាជ្ញាធរយើងបានសម្រេចបិទចរាចរណ៍លើកំណាត់ផ្លូវខាងលើនេះជាបណ្ដោះអាសន្នរហូតដល់ទឹកស្រកអស់វិញ»៕
