មូលនិធិ The JTI Foundation ដែលជាអង្គការសប្បុរសធម៌ ចុះបញ្ជីក្រោមច្បាប់នៃប្រទេស ស្វ៊ីស និងផ្តល់ថវិកាហិរញ្ញវត្ថុដោយក្រុមហ៊ុន JT International SA មានមោទនភាពក្នុងការរួមចំណែកដល់សហគមន៍កម្ពុជា តាមរយៈកម្មវិធីផ្សេងៗគ្នាជាច្រើន ជាពិសេសគម្រោងសហការជាដៃគូជាមួយ APOPO (Anti-Persoonsmijnen Ontmijnende Product Ontwik- keling) ដែលជាអង្គការក្រៅរដ្ឋាភិបាលនៃប្រទេសបែលហ្ស៊ិក ជាអង្គការអភិវឌ្ឍន៍លុបបំបាត់ផលិតផលគ្រាប់មីនដោយមិនប៉ះពាល់ដល់មនុស្ស ដោយបានប្រើប្រាស់សត្វកណ្តុរដែលត្រូវបានហ្វឹកហាត់ជាពិសេសឲ្យកំណត់រកអត្តសញ្ញាណមីន ឬហៅកាត់ថា MDR ឬហៅម្យ៉ាងទៀតថាជា «វីរជនកណ្តុរ» ដើម្បីលុបបំបាត់គ្រាប់មីនកប់ក្នុងដីនៅក្នុងប្រទេសកម្ពុជា។
គម្រោងនេះបានរួមចំណែកដល់ការបោសសម្អាតគ្រាប់មីន និងគ្រាប់មិនទាន់ផ្ទុះសរុបចំនួន ១.២៣០.៤៧៧ ម៉ែត្រការ៉េ ដែលនៅក្នុងនោះមានគ្រាប់មីនសល់ពីសម័យសង្គ្រាមចំនួន ១២៨ គ្រាប់ និងសំណល់គ្រាប់ផ្សេងៗចំនួន ៩៥ គ្រាប់ត្រូវបានគេដកចេញដោយសុវត្ថិភាព។
ភាពជោគជ័យនេះបានជួយដល់កសិករ ចំនួន ៦.២៧៦ នាក់ហើយគ្រួសាររបស់ពួកគេ អាចប្រើប្រាស់ដីទាំងនោះសម្រាប់ការដាំដុះដំណាំកសិកម្មបានទៀតផង។
ដីដែលបានបោសសម្អាតគ្រាប់មីន និង គ្រាប់មិនទាន់ផ្ទុះ បាននាំឲ្យមានការបង្កបង្កើនផលិតកម្មដំណាំ ការកើនឡើងនៃប្រាក់ចំណូលក៏ដូចជាសន្តិសុខស្បៀងការបង្កើនលទ្ធភាពទទួលបានសេវាកម្មសាធារណៈ និងការកាត់បន្ថយចំនួនប្រជាជនធ្វើអន្តោប្រវេសន៍ដើម្បីស្វែងរកការងារធ្វើនៅទីកន្លែងផ្សេង។
មូលនិធិ The JTI Foundation បានផ្តល់ជំនួយហិរញ្ញប្បទានចាប់តាំងពីឆ្នាំ ២០១៥ ជាង ១ លានដុល្លារ អាមេរិកដល់អង្គការ APOPO ដែលកំពុងធ្វើការជាដៃគូ ជាមួយមជ្ឈមណ្ឌលសកម្មភាពកំចាត់មីនកម្ពុជា (CMAC)។
គម្រោងនេះត្រូវបានទទួលស្គាល់ដោយរដ្ឋាភិបាលកម្ពុជាថា ជាគន្លឹះក្នុងការកាត់បន្ថយភាពក្រីក្រនៅតំបន់ជនបទ និងជួយរួមចំណែកដល់គោលដៅអភិវឌ្ឍន៍រួមក្នុងប្រទេសកម្ពុជា។ វាក៏ស្របតាមការប្តេជ្ញាចិត្តរបស់ប្រទេសកម្ពុជាក្រោមសន្ធិសញ្ញាអូតាវ៉ាដើម្បីលុបបំបាត់គ្រាប់មីនទាំងអស់ចេញពីប្រទេសនេះនៅត្រឹមឆ្នាំ ២០២៥៕