.jpg)
បញ្ជរក្រុមហ៊ុន Airbus នៅក្នុងពិព័រណ៍យន្តហោះក្នុងប្រទេសសិង្ហបុរី។ រូបថត AFP
ក្រុងវ៉ាស៊ីនតោនៈ អាជ្ញាធរបានប្រកាសថា អាមេរិកនឹងបង្កើនពន្ធនាំចូលលើយន្តហោះរបស់ក្រុមហ៊ុន Airbus ដែលបាននាំចូលពីអឺរ៉ុបដល់ ១៥ ភាគរយ ពោលគឺជាវិធានការមួយដែលក្រុមហ៊ុនផលិតយន្តហោះឈានមុខគេមួយនេះបានឲ្យដឹងកាលពីថ្ងៃសៅរ៍ថា គួរឲ្យសោកស្ដាយ «យ៉ាងខ្លាំង»។
ក្រុមហ៊ុនផលិតយន្តហោះឈានមុខគេមួយនេះបានឲ្យដឹងក្នុងសេចក្ដីប្រកាសព័ត៌មានមួយថា សេចក្ដីសម្រេចចិត្តកាលពីថ្ងៃសុក្រក្នុងការបង្កើនពន្ធនាំចូលចាប់ពីថ្ងៃទី ១៨ ខែមីនា ទៅនេះ «បង្កើនភាពតានតឹងផ្នែកពាណិជ្ជកម្មកាន់តែខ្លាំងបន្ថែមទៀតរវាងអាមេរិក និងសហភាពអឺរ៉ុប»។ ក្រុមហ៊ុននេះបន្ថែមថា ការដំឡើងពន្ធនេះបង្កើតឲ្យមាន «អស្ថិរភាពកាន់តែខ្លាំងសម្រាប់ក្រុមហ៊ុនអាកាសចរណ៍អាមេរិកដែលកំពុងទទួលរងផលប៉ះពាល់រួចហើយដោយសារតែកង្វះយន្តហោះ»។
សេចក្ដីប្រកាសនេះដែលចេញផ្សាយដោយការិយាល័យអ្នកតំណាងពាណិជ្ជកម្មអាមេរិក (USTR) បានធ្វើឡើងប៉ុន្មានថ្ងៃប៉ុណ្ណោះ បន្ទាប់ពីលោកប្រធានាធិបតី ដូណាល់ ត្រាំ បានឲ្យដឹងថា វាដល់ពេលក្នុងការនិយាយ «យ៉ាងហ្មត់ចត់បំផុត» អំពីកិច្ចព្រមព្រៀងពាណិជ្ជកម្មជាមួយសហភាពអឺរ៉ុប។
ពន្ធគយនេះមានអត្រា ១០ ភាគរយចាប់តាំងពីខែតុលាមក នៅពេលទីក្រុងវ៉ាស៊ីនតោនបានហូតពន្ធនាំចូលលើផលិតផលរបស់អឺរ៉ុបដែលមានតម្លៃ ៧,៥ ពាន់លានដុល្លារ។
សំដៅដល់ផលិតផលជាច្រើនដែលរួមមានស្រា ឈីស កាហ្វេ និងប្រេងអូលីវ ដែលត្រូវបានដកហូតពន្ធ ២៥ ភាគរយចាប់តាំងពីខែតុលាមកនោះ ក្រុមហ៊ុននេះបានឲ្យដឹងថា៖ «ក្រុមហ៊ុន Airbus សោកស្ដាយយ៉ាងខ្លាំងដល់ការសម្រេចចិត្តរបស់ការិយាល័យ USTR ក្នុងការបង្កើនពន្ធនាំចូលលើយន្តហោះនាំចូលពីសហភាពអឺរ៉ុប ព្រមទាំងសេចក្ដីសម្រេចចិត្តក្នុងការរក្សាពន្ធនាំចូលលើទំនិញមកពីវិស័យផ្សេងទៀត»។
ក្រុមហ៊ុន Airbus បានបន្ថែមថា សេចក្ដីសម្រេចចិត្តចុងក្រោយនេះ «មិនអើពើសំណើជាច្រើនដែលដាក់ដោយក្រុមហ៊ុនអាកាសចរណ៍អាមេរិកដែលបញ្ជាក់ពីការពិតដែលថា ក្រុមហ៊ុនទាំងនោះ និងសាធារណជនដែលហោះហើររបស់អាមេរិក ទីបំផុតនឹងត្រូវតែជាអ្នកបង់ពន្ធនាំចូលទាំងនេះ»។
នៅក្នុងសេចក្ដីប្រកាសព័ត៌មានមួយដែលបានផ្ញើទៅទីភ្នាក់ងារព័ត៌មាន AFP អំពីសេចក្ដីសម្រេចចិត្តរបស់អាមេរិកលើក្រុមហ៊ុន Airbus គណៈកម្មការអឺរ៉ុបបានលើកឡើងដោយប្រុងប្រយ័ត្ន។
គណៈកម្មការនេះបានឲ្យដឹងថា «តាមទស្សនៈរបស់យើង» «នៅពេលនេះការផ្ដោតគួរតែលើការស្វែងរកដំណោះស្រាយចរចាចំពោះជម្លោះក្រុមហ៊ុនយន្តហោះនេះដោយឈរលើមូលដ្ឋានជាក់ស្ដែងនៃសំណើរបស់សហភាពអឺរ៉ុបសម្រាប់ការឧបត្ថម្ភធនដែលមានស្រាប់ និងការពិន័យនៅពេលអនាគតនៅក្នុងវិស័យនេះ»។
ក្រសួងហិរញ្ញវត្ថុអាល្លឺម៉ង់បានឲ្យដឹងថា៖ «ជំហរជាមូលដ្ឋានរបស់យើងគឺច្បាស់លាស់ គឺយើងបដិសេធរាល់ការបង្កើនពន្ធគយជាឯកតោភាគីណាមួយ។ ពន្ធគយទីបំផុតបង្កគ្រោះថ្នាក់ដល់មនុស្សគ្រប់គ្នាដែលរួមទាំងអាមេរិកផងដែរ»៕ LA
