ក្រុងហ្សិនចិនៈ ក្រុមហ៊ុនពាណិជ្ជកម្មអេឡិចត្រូនិក Alibaba កាលពីថ្ងៃពុធបានចុះកិច្ចព្រមព្រៀងមួយជាមួយរដ្ឋាភិបាល បែលហ្ស៊ិក ដើម្បីបើកដំណើរការគេហទំព័រពាណិជ្ជកម្មពិភពលោកអេឡិចត្រូនិក (eWTP) នៅអឺរ៉ុប ក្នុងគោលបំណងលើកកម្ពស់ពាណិជ្ជកម្មឆ្លងព្រំដែនរយៈពេលវែង។
កិច្ចព្រមព្រៀងនេះ ត្រូវបានចុះហត្ថលេខាដោយឧបនាយករដ្ឋមន្ត្រីបែលហ្ស៊ិក Kris Peeters និងនាយកជាន់ខ្ពស់របស់ក្រុមហ៊ុន Alibaba Group លោក James Song។
លោកនាយករដ្ឋមន្ត្រី Michel បានប្រកាសថា៖ «ថ្ងៃនេះគឺជាថ្ងៃប្រវត្តិសាស្រ្តមួយ។ កិច្ចសហប្រតិបត្តិការនេះ នឹងពង្រឹងការប្រកួតប្រជែងរបស់ក្រុមហ៊ុនបែលហ្ស៊ិក និងអឺរ៉ុបនៅលើពិភពលោក»។
លោក Cao Zhongming ឯកអគ្គរដ្ឋទូតចិនទើបតែងតាំងថ្មីប្រចាំប្រទេសបែលហ្ស៊ិកបានថ្លែងក្នុងបទសម្ភាសផ្តាច់មុខមួយជាមួយទីភ្នាក់ងារព័ត៌មាន Xinhua របស់ចិនថា កិច្ចព្រមព្រៀងចុងក្រោយបំផុតនេះគឺជាសញ្ញានៃកិច្ចសហប្រតិបត្តិការ ដែលកំពុងស្ទុះងើបឡើងរវាងប្រទេស បែលហ្ស៊ិក និងចិន ប៉ុន្តែលោកបានបង្ហើបថា កិច្ចសហប្រតិបត្តិការអាចត្រូវបាន ពង្រីកបន្ថែមទៀត។
សមាសធាតុធំបំផុតនៃកិច្ចព្រមព្រៀង eWTP ដែលត្រូវបានចុះហត្ថលេខានេះ គឺការបង្កើតហេដ្ឋារចនាសម្ព័ន្ធឡូជីស្ទីកមួយ ដើម្បីគាំទ្រដល់ពាណិជ្ជកម្មឆ្លងព្រំដែន។
ក្រុមហ៊ុន Cainiao Smart Logistics Network ដែលជាក្រុមហ៊ុនឡូជីស្ទីករបស់ក្រុមហ៊ុន Alibaba Group និងក្រុមហ៊ុន Liege Airport របស់បែលហ្ស៊ិក ក៏បានចុះហត្ថលេខាលើកិច្ចសន្យាមួយដើម្បីជួលទីតាំងទំហំ ២២០,០០០ ម៉ែត្រការ៉េផងដែរ ដើម្បីសាងសង់មជ្ឈមណ្ឌលឡូជីស្ទីកឆ្លាតវៃលំដាប់ថ្នាក់ពិភពលោកនៅព្រលានយន្តហោះ។
ការវិនិយោគដំបូងនឹងមានទំហំ ៧៥ លានអឺរ៉ូ ដោយនៅដំណាក់កាលដំបូងនៃមជ្ឈមណ្ឌលនេះនឹងចាប់ផ្តើមប្រតិបត្តិការនៅដើមឆ្នាំ ២០២១។
មជ្ឈមណ្ឌលឡូជីស្ទីកឆ្លាតវៃ Liege នេះ ត្រូវបានរំពឹងថានឹងពង្រឹងប្រសិទ្ធភាពឡូជីស្ទីករួម និងជួយសហគ្រាសធុនតូច និងមធ្យមឲ្យគ្រប់គ្រងកាន់តែប្រសើរនូវការនាំចេញរបស់ខ្លួន។
ក្រុមហ៊ុន Alibaba និងទីភ្នាក់ងារពាណិជ្ជកម្ម និងវិនិយោគនានារបស់បែលហ្ស៊ិក ក៏នឹងសហប្រតិបត្តិការ ដើម្បីបង្កើនការលក់ផលិតផលរបស់បែលហ្ស៊ិក នៅលើគេហទំព័រពាណិជ្ជកម្មអនឡាញស្ថិតក្នុងប្រព័ន្ធរបស់ក្រុមហ៊ុន Alibaba ផងដែរ។
ក្រុមហ៊ុន Alibaba ក៏នឹងធ្វើការយ៉ាងជិតស្និទ្ធជាមួយរដ្ឋាភិបាលបែលហ្ស៊ិកផងដែរ ដើម្បីផ្សព្វផ្សាយប្រទេសនេះឲ្យក្លាយជាទិសដៅទេសចរណ៍ដ៏ទាក់ទាញមួយ សម្រាប់ភ្ញៀវទេសចរជនជាតិចិន៕
People''s Daily/KC