ក្រុងស៊ីដនីៈ ក្រុមហ៊ុន BHP នឹងផ្តល់ជូនភាគលាភពិសេសដល់ភាគហ៊ុនិក បន្ទាប់ពីលក់អាជីវកម្មរ៉ែថ្មសែលនៅអាមេរិករបស់ខ្លួន ខណៈដែលក្រុមហ៊ុននេះបានបញ្ចប់ការទិញភាគហ៊ុនត្រលប់មកវិញក្នុងទឹកប្រាក់ ៧,៣ ពាន់លានដុល្លារ។
ក្រុមហ៊ុនរ៉ែធំបំផុតក្នុងពិភពលោកមួយនេះ នាពេលថ្មីៗនេះបានលក់ប្រតិបត្តិការប្រេងនិងឧស្ម័នពីថ្មសែលនៅអាមេរិករបស់ខ្លួនទៅឲ្យក្រុមហ៊ុនថាមពលដ៏ធំរបស់ចក្រភពអង់គ្លេស BP ក្នុងតម្លៃ ១០,៥ ពាន់លានដុល្លារ ហើយបានឲ្យដឹងថា ក្រុមហ៊ុននឹងផ្ទេរប្រាក់នេះទៅឲ្យភាគហ៊ុនិក។
ភាគលាភពិសេស ១,០២ ដុល្លារក្នុងមួយហ៊ុន នឹងត្រូវបានផ្តល់ទៅឲ្យភាគហ៊ុនិកនៅពាក់កណ្តាលខែមករា ហើយការទិញយកភាគហ៊ុនត្រឡប់មកវិញត្រូវបានកំណត់ថ្លៃ ២៧,៦៤ ដុល្លារក្នុង ១ ហ៊ុន។
លោក Peter Beaven ប្រធានផ្នែកហិរញ្ញវត្ថុរបស់ក្រុមហ៊ុន BHP បានឲ្យដឹងក្នុងសេចក្តីថ្លែងការណ៍មួយថា៖ «ការបញ្ចប់កម្មវិធីនេះ នឹងនាំមកនូវប្រាក់សរុបដែលនឹងផ្ទេរទៅឲ្យភាគហ៊ុនិកមានចំនួន ២១ ពាន់លានដុល្លារក្នុងរយៈពេល ២ ឆ្នាំចុងក្រោយនេះ»។
ការលក់ទ្រព្យសកម្មនៅអាមេរិករបស់ក្រុមហ៊ុន BHP បានរងការខាតបង់ខ្លាំង បន្ទាប់ពីក្រុមហ៊ុនបានទិញប្រតិបត្តិការនេះក្នុងឆ្នាំ ២០១១ ក្នុងតម្លៃ ២០ ពាន់លានដុល្លារ។
ការខាតបង់ពីការលក់ទ្រព្យសកម្មនេះ បានបង្កឲ្យក្រុមហ៊ុន BHP ទទួលរងការធ្លាក់ចុះប្រាក់ចំណេញសុទ្ធប្រចាំឆ្នាំចំនួន ៣៧ ភាគរយមកនៅត្រឹម ៣,៧ ពាន់លានដុល្លារក្នុងរយៈពេល ១ ឆ្នាំគិតត្រឹមថ្ងៃទី ៣០ ខែមិថុនា។
ក្រុមហ៊ុន BHP បានបញ្ចប់ការដកការវិនិយោគក្នុងទឹកប្រាក់ជាង ១៨ ពាន់លានដុល្លារក្នុងរយៈពេល ៦ ឆ្នាំចុងក្រោយនេះ ដើម្បីផ្តោតការយកចិត្តទុកដាក់លើប្រតិបត្តិការស្នូល រ៉ែដែក ទង់ដែក ប្រេង ធ្យូងថ្ម និងប៉ូតាស ដែលផ្តល់ប្រាក់ចំណេញច្រើនបំផុតរបស់ខ្លួនវិញ៕ AFP/KC