ហ្វ្រេងហ្វឺតៈ BMW ជាក្រុមហ៊ុនរថយន្តប្រណីតរបស់ប្រទេស អាល្លឺម៉ង់ បានឲ្យដឹងកាលពីសប្តាហ៍មុនថា ខ្លួនបានទម្លាក់ចោលផែនការឧបត្ថម្ភដល់ក្លិបបាល់ទាត់ Bayern Munich ដោយសារតែ Audi ជាក្រុមហ៊ុនប្រកួតប្រជែងបានឈ្នះការដេញថ្លៃដោយជោគជ័យ ដើម្បីរុញក្រុមហ៊ុន BMW ចេញ។
អ្នកនាំពាក្យរបស់ក្រុមហ៊ុននេះបានប្រាប់កាសែតប្រចាំសប្ដាហ៍ Frankfurter Allgemeine Sonntagszeitung (FAS) ថា៖ «យើងបានបញ្ចប់ការចរចានេះ ហើយយើងនឹងមិនក្លាយជាអ្នកឧបត្ថម្ភរបស់ក្រុមបាល់ទាត់ FC Bayern នោះទេ»។
ព័ត៌មាននៃកិច្ចព្រមព្រៀងនេះកើតឡើងភ្លាមៗ មុនពេលក្រុមបាល់ទាត់ Bayern បានរក្សាតំណែងជើងឯកក្នុងក្របខ័ណ្ឌ Bundesliga ៧ ដងជាប់គ្នារបស់ពួកគេ។
លោក Uli Hoeness ប្រធានក្រុមបាល់ទាត់ Bayern បានឲ្យដឹងកាលពីខែមីនាថា ក្រុមហ៊ុនរថយន្តរបស់ប្រទេស អាល្លឺម៉ង់ មួយនេះ បានចុះហត្ថលេខាលើអនុស្សរណៈនៃការយោគយល់គ្នា (MOU) ជាមួយក្រុមហ៊ុន BMW សម្រាប់ក្រុមហ៊ុនផលិតរថយន្តមួយនេះក្នុងការឧបត្ថម្ភ ដល់ក្រុមបាល់ទាត់ និងក្រុមបាល់បោះរបស់ពួកគេ។
ប៉ុន្តែកាសែតនេះបានបង្ហាញថា លោក Bram Schot ដែលជាប្រធានក្រុមហ៊ុន Audi នឹងមិនទទួលបានថវិកាពីកិច្ចព្រមព្រៀងរបស់ក្រុមហ៊ុនបុត្រសម្ព័ន្ធ Volkswagen ដើម្បីឧបត្ថម្ភដល់ក្រុមបាល់ទាត់ Bayern ទេរហូតដល់ឆ្នាំ ២០២៥ ដោយផ្ដល់ដល់ក្លិបបាល់ទាត់នេះនូវលក្ខខណ្ឌដែលកែលម្អជាច្រើន។
FAS បានរាយការណ៍ថា ជាមួយនឹងការឧបត្ថម្ភ ៦០ លានអឺរ៉ុប (៦៧ លានដុល្លារ) ក្នុង ១ ឆ្នាំ រួមនឹងផ្នែកផ្សេងទៀតនៃកិច្ចព្រមព្រៀងនេះ បានបន្ថែមឲ្យការឧបត្ថម្ភនេះកើនដល់ជាង ១ ពាន់លានអឺរ៉ូក្នុងរយៈពេល ១២ ឆ្នាំ។
ក្រុមហ៊ុន BMW ដែលផលិតរថយន្តប្រណីតធុនតូច និងរថយន្ត Rolls Royce រួមជាមួយនឹងយីហោប្រណីតរបស់ខ្លួន បានរាយការណ៍ពីការធ្លាក់ចុះប្រាក់ចំណេញ ៧៤,២ ភាគរយ មកនៅត្រឹម ៥៨៨ លានអឺរ៉ូ នៅត្រីមាសទី១ ឆ្នាំ ២០១៩។
ក្រុមហ៊ុន BMW ក៏ត្រូវតែលៃទុកប្រាក់ ១,៤ ពាន់លានអឺរ៉ូ សម្រាប់ការផាកពិន័យដែលអាចកើតឡើង និងការវិនិយោគលើបច្ចេកវិទ្យាពេលអនាគត ដូចជារថយន្តស្វ័យបើកបរ និងរថយន្តអគ្គិសនីផងដែរ។
ប្រាក់ចំណេញនៅក្នុងក្រុមហ៊ុន Audi ក៏បានបង្ហាញពីការធ្លាក់ចុះនៅចន្លោះខែមករា និងខែមីនា ផងដែរ បើទោះបីជានៅក្នុងចំនួនមួយតិចតួចក៏ដោយ៕ AFP/LA