ក្រុងញូវយ៉កៈ ក្រុមហ៊ុន Boeing កាលពីថ្ងៃសៅរ៍បានទទួលស្គាល់ថា ក្រុមហ៊ុនត្រូវកែតម្រូវបញ្ហាខ្វះខាតខាងផ្នែកសូហ្វវែរក្នុងទូរបណ្តុះបណ្តាលការហោះហើរ (flight simulator) សម្រាប់យន្តហោះ 737 MAX របស់ខ្លួន បន្ទាប់ពីការធ្លាក់យន្តហោះ ២ គ្រឿង ដែលបណ្ដាលឲ្យមនុស្សស្លាប់ ៣៤៦ នាក់។
ក្រុមហ៊ុនបានឲ្យដឹងក្នុងសេចក្ដីប្រកាសព័ត៌មានមួយថា៖ «ក្រុមហ៊ុន Boeing បានធ្វើការកែតម្រូវសូហ្វវែរក្នុងទូរ flight simulator សម្រាប់យន្តហោះ 737 MAX និងបានផ្ដល់ព័ត៌មានបន្ថែមដល់ក្រុមប្រតិបត្តិករ flight simulator ដើម្បីធានាថា បទពិសោធក្នុងទូរបណ្តុះបណ្តាលការហោះហើរនេះឆ្លុះបញ្ចាំងពីក្នុងស្ថានការណ៍ហោះហើរផ្សេងៗ»។
ក្រុមហ៊ុន Boeing មិនបានចង្អុលបង្ហាញទេថា តើពេលណាដែលក្រុមហ៊ុនបានដឹងពីបញ្ហានេះ និងថាតើក្រុមហ៊ុនបានជូនដំណឹងដល់និយតករដែរឬយ៉ាងណា?។
នេះជាលើកដំបូងហើយដែលក្រុមហ៊ុនបានទទួលស្គាល់ពីចំណុចខ្វះខាតនេះដោយលើកឡើងថា មានកំហុសផ្នែករចនាក្នុងសូហ្វវែរ ដែលជាប់ទាក់ទងនឹងយន្តហោះ 737 MAX។
យោងតាមក្រុមហ៊ុន Boeing សូហ្វវែររបស់ទូរ flight simulator គ្មានសមត្ថភាពបង្កើតឡើងវិញនូវស្ថានការណ៍ហោះហើរមួយចំនួនដែលស្រដៀងនឹងស្ថានភាពហោះហើរនៅពេលធ្លាក់យន្តហោះក្រុមហ៊ុន Ethiopian Airlines នៅខែមីនា ឬការធ្លាក់ចុះយន្តហោះក្រុមហ៊ុន Lion Air នៅខែតុលាទេ៕ AFP/LA