.jpg)
លោក លឹម ហេង អនុប្រធានសភាពាណិជ្ជកម្មកម្ពុជា ថ្លែងនាពេលកន្លងមក។ រូបថត ភាពាណិជ្ជកម្មកម្ពុជា
ភ្នំពេញ: ក្រុមប្រឹក្សាអភិវឌ្ឍន៍កម្ពុជា (CDC) នឹងដាក់ឲ្យដំណើរការបញ្ជរតែមួយជាតិដើម្បីសម្រួលដល់ការស្នើសុំនាំចូលទំនិញសម្រាប់បម្រើឲ្យការអនុវត្តគម្រោងវិនិយោគ។ នេះបើតាមសេចក្តីជូនដំណឹងរបស់ CDC ចេញផ្សាយពីថ្ងៃចន្ទ។
បើតាមសេចក្តីជូនដំណឹងរបស់ក្រុមប្រឹក្សាអភិវឌ្ឍន៍កម្ពុជានឹងចាប់ផ្តើមអនុវត្តការពិនិត្យរាល់សំណើសុំនាំចេញចូលទាំងអស់ចាប់អនុវត្តន៍ពីពេលនេះតទៅតាមថ្នាលបច្ចេកវិទ្យានៃប្រព័ន្ធបញ្ជរតែមួយជាតិ។ សេចក្តីជូនដំណឹងបានឲ្យដឹងថា៖ «ការដាក់ដំណើរការបញ្ជរនេះ ដើម្បីសម្រួលដល់ការស្នើសុំនាំចូលប្រភេទទំនិញពាក់ព័ន្ធសម្រាប់បម្រើឲ្យការអនុវត្តគម្រោងវិនិយោគ»។
អ្នកវិនិយោគអាចបំពេញសំណើសុំនាំចូលទំនិញនេះតាមរយៈគេហទំព័រ https://live.nsw.gov.kh។ នេះបើយោងតាមសេចក្តីជូនដំណឹង។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា ការដាក់ឲ្យដំណើរការបញ្ជរតែមួយជាតិនេះនឹងមានតម្លាភាពដល់ការគ្រប់គ្រងទិន្នន័យនាំទំទិញចូលមកកម្ពុជា។ លោកបន្តថាប្រព័ន្ធនេះនឹងជួយទប់ស្កាត់ការនាំចូលទំនិញមិនប្រើប្រាស់ចំគោលដៅផងដែរ។
លោកថ្លែងថា៖ «ប្រព័ន្ធបញ្ជរតែមួយជាតិនេះផ្តល់ភាពងាយស្រួលដល់អ្នកស្នើសុំនាំចូលទំនិញមកប្រើប្រាស់ក្នុងគម្រោងវិនិយោគ»។
លោកបានបន្ថែមថា៖ «ជាទូទៅការស្នើសុំនាំចូលទំនិញបម្រើឲ្យគម្រោងវិនិយោគគឺមិនតម្រូវឲ្យបង់ពន្ធនាំចូលនោះទេ ដូច្នេះវានឹងអាចទប់ស្កាត់ការនាំចូលសម្រាប់គោលបំណងមកធ្វើអាជីវកម្ម»។
របាយការណ៍របស់ធនាគារជាតិនៃកម្ពុជាបានបង្ហាញថា ឆ្នាំ ២០១៩ កម្ពុជានាំចូលសម្ភារសំណង់មានតម្លៃ ១,៥ ពាន់លានដុល្លារកើនឡើង ៥០ ភាគរយ ធៀបនឹងឆ្នាំ ២០១៨ ក្នុងនោះប្រមាណ ៥០០ លានដុល្លារ គឺទៅលើការនាំចូលដែកថែប៕
