ក្រុងណៃរ៉ូប៊ីៈ ក្រុមហ៊ុនអាកាសចរណ៍ China Southern Airlines របស់ប្រទេស ចិន កាលពីថ្ងៃពុធ បានបើកដំណើរការជើងហោះហើររវាងទីក្រុងណៃរ៉ូប៊ី និងទីក្រុងឆាំងសា ដែលជាទីក្រុងរបស់ខេត្តហ៊ូណាន ប្រទេស ចិន។
លោកស្រី Judith Nashipai Kamai អ្នកគ្រប់គ្រងប្រចាំស្ថានីយនៅព្រលានយន្តហោះណៃរ៉ូប៊ីនៃក្រុមហ៊ុន China Southern Airlines បានថ្លែងក្នុងសន្និសីទសារព័ត៌មានខ្លីមួយក្នុងទីក្រុងណៃរ៉ូប៊ីថា ក្រុមហ៊ុនចិនមួយនេះ ប្រតិបត្តិការជើងហោះហើររួចហើយរវាងចិន និងកេនយ៉ា ដែលមាន ២ ជើងក្នុង ១ សប្តាហ៍ដោយ ត ភ្ជាប់ទីក្រុងណៃរ៉ូប៊ី និងក្វាងចូវ។
នៅពេលបើកសម្ពោធការមកដល់របស់ជើងហោះហើររវាងទីក្រុងឆាងសា និងទីក្រុងណៃរ៉ូប៊ីក្នុងទីក្រុងណៃរ៉ូប៊ី លោកស្រីថ្លែងថា៖ «ឥឡូវ យើងមានជើងហោះហើរមិនឈប់ចំនួន ៤ ជើងក្នុង ១ សប្តាហ៍ រវាងប្រទេស ចិន និងកេនយ៉ា ហើយកត្តានេះនឹងជួយជំរុញទំនាក់ទំនងអាជីវកម្ម និងទេសចរណ៍ ក្នុងចំណោមប្រទេសទាំង ២»។
ក្នុងពេលហោះហើរនោះ អ្នកដំណើរជាង ២៣០ នាក់ មកពីទីក្រុងឆាងសា បានធ្វើដំណើរតាមជើងហោះហើរដំបូងនេះ។
ទាក់ទងនឹងកាលវិភាគហោះហើរថ្មីនេះ ក្រុមហ៊ុនអាកាសចរណ៍ China Southern Airlines ហោះហើរពីទីក្រុងណៃរ៉ូប៊ី ទៅកាន់ទីក្រុងឆាងសា នៅថ្ងៃពុធ និងថ្ងៃអាទិត្យ ខណៈដែលការហោះហើរមិនឈប់រវាងទីក្រុងណៃរ៉ូប៊ី និងទីក្រុងក្វាងចូវ ចេញដំណើរនៅថ្ងៃចន្ទ និងថ្ងៃសុក្រ។
លោកស្រី Nashipai បានកត់សម្គាល់ថា ទីក្រុងឆាងសាជាទីក្រុងឧស្សាហកម្ម ដែលបណ្តុះដោយរោងចក្រជាច្រើនផលិតទំនិញដែលមានតម្រូវការខ្លាំងនៅក្នុងប្រទេស កេនយ៉ា៕ People''s Daily/KC