.jpg)
បុគ្គលិកកំពុងឈរនៅតុផ្តល់ព័ត៌មាននៃផ្សារមូលបត្រកម្ពុជានាពេលកន្លងមក។ ហេង ជីវ័ន
ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) នឹងដំណើរការផ្លូវការនូវវិធីសាស្ដ្រជួញដូរតាមការចរចា (NTM) សម្រាប់ទីផ្សារមូលបត្រមូលធននៅថ្ងៃទី ១៧ ខែកុម្ភៈ ដើម្បីផ្ដល់ជម្រើសថ្មីមួយដល់ក្រុមវិនិយោគិនសាធារណៈនៅក្នុងទីផ្សារនេះ។
សេចក្ដីប្រកាសរបស់ CSX កាលពីចុងសប្ដាហ៍មុនបានឲ្យដឹងថា CSX នឹងជូនដំណឹងដល់សមាជិកក្រុមវិនិយោគិន និងសាធារណជនថា CSX នឹងអនុវត្តជាផ្លូវការការកម្រិតតម្លៃប្រចាំថ្ងៃ ១០ ភាគរយសម្រាប់ការជួញដូរមូលបត្រមូលនិធិនៅ CSX តាមរយៈវិធីសាស្ដ្រជួញដូរតាមការចរចាចាប់ពីថ្ងៃទី ១៧ ខែកុម្ភៈ ឆ្នាំ ២០២០ តទៅ ស្របតាមប្រកាសលេខ ០០២/២០ SECC/Prk ចុះថ្ងៃទី ១១ ខែ កុម្ភៈ ឆ្នាំ ២០២០ ស្ដីពីការអនុវត្តច្បាប់ប្រតិបត្តិការនៃផ្សារមូលបត្រនៃផ្សារមូលបត្រកម្ពុជាដែលបានប្រកាសឲ្យប្រើប្រាស់ដោយគណៈកម្មការមូលបត្រកម្ពុជា (SECC)។
សេចក្ដីប្រកាសនេះឲ្យដឹងថា៖ «គោលបំណងនៃការកែប្រែការកម្រិតតម្លៃប្រចាំថ្ងៃសម្រាប់ការជួញដូរមូលបត្រ មូលធនតាមរយៈ NTM ចាប់ពី ០ ភាគរយដល់ ១០ ភាគរយ គឺដើម្បីការពារក្រុមវិនិយោគិន និងទីផ្សារមិនឲ្យមានការជួញដូរមិនស្មើភាពជាមួយតម្លៃ ខុសគ្នាខ្លាំងពីតម្លៃទីផ្សារ។ បន្ទាប់ពីការអនុវត្តនេះការជួញដូរមូលបត្រមូលធនតាមរយៈការដេញថ្លៃ និង NTM នៅ CSX នឹងមានការកម្រិតតម្លៃដូចគ្នា ដែលមាន ១០ ភាគរយ នៃតម្លៃបិទកាលពីមុន»។
លោកស្រី គីម សុផាននីតា ប្រធាននាយកដ្ឋានប្រតិបត្តិការទីផ្សាររបស់ CSX ដែលមិនអាចទាក់ទងសុំការអត្ថាធិប្បាយបានកាលពីថ្ងៃអាទិត្យបានឲ្យដឹងកាលពីមុនថា សម្រាប់ CSX មានប្រភេទ ២ នៃវិធីសាស្ដ្រជួញដូរ ការដេញថ្លៃដោយផ្អែកលើវិធីសាស្ដ្រមានមូលដ្ឋានលើការចរចាដែលមានន័យថា ប្រសិនបើនរណាម្នាក់ចង់បានទិញ ឬលក់ភាគហ៊ុន ប៉ុន្តែពួកគេមិនចង់មានសមភាគីកណ្ដាលជាធម្មតាពួកគេចាំបាច់ត្រូវដាក់ការបញ្ជាទិញដល់ទីផ្សារនេះហើយវាតាមរយៈវិធីសាស្ដ្រជួញដូរដេញថ្លៃ (ATM)។
ទោះបីយ៉ាងណាប្រសិនបើពួកគេចង់ទិញ ឬលក់ចំនួនច្រើនអាចនិយាយថា រាប់លានភាគហ៊ុន ដើម្បីធ្វើឲ្យវាមានលទ្ធភាពខ្ពស់ក្នុងការកើតឡើង ពួកគេចាំបាច់ត្រូវស្វែងរកភាគទុនិកសំខាន់ៗ និងការចរចាកិច្ចព្រមព្រៀង (ជាធម្មតាឈ្មួញជើងសាអាចជួយបាន)។ លោកស្រីថ្លែងបន្តថា៖ «ក្នុងករណីនេះប្រសិនបើអ្នកស្វែងរកសមភាគីកណ្ដាល អ្នកអាចធ្វើការជួញដូរផ្លូវការនៅ CSX ដោយប្រើប្រាស់វិធីសាស្ដ្រជួញដូរទៅតាមការចរចា (NTM)»។
សេចក្ដីប្រកាសរបស់ CSX ឲ្យដឹងថា NTM គឺជាវិធីសាស្ដ្រជួញដូរមួយដែលអាចឲ្យវិនិយោគិន ២ រូបដាក់ និងអនុវត្តការបញ្ជាទិញរបស់ពួកគេដោយសម្ងាត់នៅក្នុងប្រតិបត្តិការធំតែមួយគត់ បន្ទាប់ពីការចរចាទទួលបានជោគជ័យលើលក្ខខណ្ឌប្រតិបត្តិការ។ វាត្រូវបានអនុវត្តជាផ្លូវការនៅ CSX កាលពីថ្ងៃទី ៩ ខែ មករា ឆ្នាំ ២០១៨។ មានការជួញដូរ ៦ ដែលអនុវត្តតាមរយៈ NTM ចាប់តាំងពីពេលនោះដោយមានបរិមាណជួញដូរសរុប ១៤ ៨៦៤ ១១៤ ភាគហ៊ុន៕LA
