.jpg)
ថ្នាក់ដឹកនាំក្រុមហ៊ុនក្នុងពេលបើកសម្ពោធដំណើរការក្រុមហ៊ុនជាផ្លូវការ។ រូបថត ហ៊ឹន ពិសី
ភ្នំពេញៈ កម្ពុជាបានក្លាយជាប្រទេសទី ៣៣ លើពិភពលោកដែលទិញសិទ្ធិអាជីវកម្ម Master Franchise ពីក្រុមហ៊ុនភ្នាក់ងារអចលនទ្រព្យ Electronic Realty Associates (ERA) ដែលមានមូលដ្ឋាននៅសហរដ្ឋអាមេរិក។
ក្នុងពិធីប្រកាសបើកដំណើរការក្រុមហ៊ុន ERA Cambodia ជាផ្លូវការនៅថ្ងៃអាទិត្យនេះ លោក ខន គង្គា អគ្គនាយកក្រុមហ៊ុនភ្នាក់ងារអចលនទ្រព្យមួយនេះ បានឲ្យដឹងថា កំណើនប្រជាជន និងសេដ្ឋកិច្ច បានធ្វើឲ្យទីផ្សារវិស័យអចលនទ្រព្យនៅកម្ពុជារីកធំឡើងជាលំដាប់។
លោកបន្ថែមថា ក្រុមហ៊ុន ERA Cambodia ដែលចាប់ផ្តើមធ្វើប្រតិបត្តិការនាអំឡុងត្រីមាសទី១ ឆ្នាំ ២០១៨ មុនពេលបើកសម្ពោធជាផ្លូវការនេះ រហូតដល់ពេលនេះទទួលបានសិទ្ធិជួយប្រឹក្សាយោបល់ និងលក់ឲ្យគម្រោងធំៗចំនួន ៣ រួចមកហើយដូចជាគម្រោង Urban Village, Lingnan និង R&F Property។
លោកបានថ្លែងថា៖ «កម្ពុជាជាប្រទេសកំពុងមានការអភិវឌ្ឍ ដូច្នេះឱកាសក្នុងការវិនិយោគលើវិស័យអចលនទ្រព្យ នៅមានច្រើនណាស់»។ លោកបន្តថា៖ «ជាមួយនឹងភ្នាក់ងារបច្ចុប្បន្ន ចំនួន ១០០ នាក់ ខ្ញុំរំពឹងថា នៅដំណាច់ឆ្នាំ ២០១៩ នឹងកើនដល់ជិត ១ ០០០នាក់»។
លោក Jack Chua នាយកប្រតិបត្តិក្រុមហ៊ុន ERA Asia Pacific ដែលលក់ Master Franchise ឲ្យក្រុមហ៊ុន ERA Cambodia បានឲ្យដឹងថា កម្ពុជាជាទីផ្សារថ្មីដែលមានសក្តានុពលខ្លាំងនៅក្នុងតំបន់ ហើយដើម្បីអាចឲ្យក្រុមហ៊ុន ក្រុមហ៊ុន ERA Cambodia ទទួលជោគជ័យក្នុងវិស័យនេះ ក្រុមហ៊ុននឹងផ្តោតជាចម្បងទៅលើការបណ្តុះបណ្តាលភ្នាក់ងាររបស់ក្រុមហ៊ុន ដើម្បីឲ្យយល់ពីតម្រូវការ និងការជួយអតិថិជន។
លោកបានថ្លែងថា៖ «ការបណ្តុះបណ្តាលភ្នាក់ងារឲ្យមានចំណេះដឹង ជំនាញ និងក្រមសីលធម៌វិជ្ជាជីវៈ គឺជាគន្លឹះដ៏សំខាន់សម្រាប់ភាពជោគជ័យរបស់ក្រុមហ៊ុន ERA Cambodia»។
ក្រុមហ៊ុន ERA ត្រូវបានបង្កើតឡើងនៅសហរដ្ឋអាមេរិកក្នុងឆ្នាំ ១៩៧១ ដែលបច្ចុប្បន្នមានភ្នាក់ងារជិត ៤០ ០០០នាក់៕
