.jpg)
សម្ព័ន្ធសមាគមសហគ្រាសធុនតូច និងមធ្យមកម្ពុជា (Fasmec) និងក្រុមហ៊ុនទូរស័ព្ទចល័ត Metfone ក្នុងពិធីចុះអនុស្សរណៈយោគយល់គ្នាកាលពីថ្ងៃចន្ទ។ Fasmec
ភ្នំពេញ: សម្ព័ន្ធសមាគមសហគ្រាសធុនតូច និងមធ្យមកម្ពុជា (Fasmec) និងក្រុមហ៊ុនទូរស័ព្ទចល័ត Metfone បានចុះអនុស្សរណៈយោគយល់គ្នាកាលពីថ្ងៃចន្ទ ដើម្បីលើកកម្ពស់ព័ត៌មានវិទ្យា និងបច្ចេកវិទ្យាដល់សហគ្រាសខ្នាតតូច និងមធ្យមនៅកម្ពុជា។ នេះបើយោងតាមប្រធាន Fasmec។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ដែលមានសហគ្រាសជាសមាជិកជាង ៦០ បានថ្លែងថា ការចុះ MoU នេះធ្វើឡើងក្នុងគោលបំណងជំរុញការផ្លាស់ប្តូរ និងចែករំលែកព័ត៌មានទីផ្សារ ការសម្របសម្រួល និងការផ្តល់វគ្គបណ្តុះបណ្តាលដល់សហគ្រាសខ្នាតតូច និងមធ្យមនៅកម្ពុជា។
លោកបន្តថា ក្រុមហ៊ុន Metfone នឹងគាំទ្រផ្នែកព័ត៌មានវិទ្យា និងបច្ចេកទេសដល់សហគ្រាសខ្នាតតូច និងមធ្យមផងដែរ។ លោកថ្លែងថា៖ «ក្រុមហ៊ុន Metfone នឹងជួយជំរុញ និងគាំទ្រលើសកម្មភាពមួយចំនួនទាក់ទងនឹងព័ត៌មានវិទ្យា បច្ចេកវិទ្យា ដើម្បីជួយអភិវឌ្ឍវិស័យកម្មន្តសាល សហគ្រាសធុនតូច និងមធ្យមឲ្យដើរស្របនឹងការវិវត្តឧស្សាហកម្ម ៤.០ របស់សកលលោក»។
លោកបន្តថា បច្ចុប្បន្នសហគ្រាសធុនតូច និងមធ្យមនៅកម្ពុជាកំពុងប្រឈមនឹងបញ្ហាទីផ្សារ ហិរញ្ញវត្ថុ ហើយពួកគេភាគច្រើនមានចំណេះដឹងផ្នែកព័ត៌មានវិទ្យា និងបច្ចេកវិទ្យានៅមានកម្រិតនៅឡើយ។ លោកបញ្ជាក់ថា៖ «ខ្ញុំសង្ឃឹមថា MoU នេះនឹងជាកម្លាំងចលករថ្មីមួយ ដើម្បីជំរុញភាពប្រកួតប្រជែងក្នុងទីផ្សារអន្តរជាតិ»។
លោក Phung Van Cuong នាយកប្រតិបត្តិក្រុមហ៊ុន Metfone បានថ្លែងថា ក្រុមហ៊ុនលោកនឹងចូលរួមសហការជាមួយសម្ព័ន្ធសមាគមសហគ្រាសធុនតូច និងមធ្យមកម្ពុជា ដើម្បីគាំទ្រដល់ការធ្វើធុរកិច្ចឲ្យមានការអភិវឌ្ឍរីកចម្រើនតាមរយៈគាំទ្រផ្នែកព័ត៌មានវិទ្យា និងបច្ចេកវិទ្យាដល់ពួកគេ។ លោកបានបន្តថា៖ «វត្តមានក្រុមហ៊ុន Metfone នៅកម្ពុជាបានជំរុញឲ្យតម្លៃសេវាក្នុងវិស័យទូរគមនាគមន៍មានតម្លៃទាបសមរម្យ ហើយក្រុមហ៊ុនចង់នាំយកបច្ចេកវិទ្យាចុងក្រោយ ដើម្បីបញ្ជ្រាបទៅក្នុងវិស័យ SME នៅកម្ពុជាផងដែរ»។
លោកបន្តថា ក្រុមហ៊ុន Metfone បានសាងសង់ហេដ្ឋារចនាសម្ព័ន្ធបណ្តាញឈានមុខមួយដែលមានស្ថានីយចំនួន ១ ១០០០ ស្ថានីយ និងមានខ្សែអុបទិកប្រវែង ២៣ ០០០ គីឡូម៉ែត្រ ដែលបានផ្តល់សេវាដល់ប្រជាជនកម្ពុជាជិត ៩ លាននាក់។
លោកបន្តថា ក្រុមហ៊ុនមានប្រាក់ចំណូលសរុប ២,៣ ពាន់លានដុល្លារ និងបង់ពន្ធឲ្យរដ្ឋាភិបាល ៦០០ លានដុល្លារក្នុងរយៈពេលប្រតិបត្តិការ ១១ ឆ្នាំនៅកម្ពុជា។ លោកថ្លែងថា៖ «ក្រុមហ៊ុនសន្យាផ្តល់សេវាកម្មឥតគិតថ្លៃមួយចំនួនដល់គ្រប់សមាជិក Fasmec ទាំងអស់»។
របាយការណ៍របស់ក្រសួងឧស្សាហកម្ម និងសិប្បកម្មបានបង្ហាញថា កម្ពុជាមានសហគ្រាសសរុប ៥១៣ ៧៥៩ ក្នុងនោះជាង ៩៧ ភាគរយជាសហគ្រាសខ្នាតតូច និង ២,២ ភាគរយជាសហគ្រាសធុនធំ៕LA
