ក្រុងតូក្យូៈ ក្រុមអ្នកបង្កើតគោលនយោបាយហិរញ្ញវត្ថុជាន់ខ្ពស់មកពីក្រុមប្រទេសមានឧស្សាហកម្មរីកចម្រើនធំទាំង ២០ ក្នុងពិភពលោក (G20) នឹងជួបប្រជុំគ្នានៅចុងសប្តាហ៍នេះក្នុងប្រទេស ជប៉ុន ខណៈសង្គ្រាមពាណិជ្ជកម្មរវាងអាមេរិក និងចិនបង្កផលប៉ះពាល់ដល់សេដ្ឋកិច្ចពិភពលោក។
រដ្ឋមន្ត្រីក្រសួងហិរញ្ញវត្ថុ និងមន្ត្រីធនាគារកណ្តាលរបស់ក្រុមប្រទេស G20 ដែលនឹងជួបប្រជុំនៅទីក្រុងកំពង់ផែ Fukuoka ដែលស្ថិតនៅភាគនិរតីប្រទេស ជប៉ុន ក៏នឹងដោះស្រាយបញ្ហាលំបាកអំពីរបៀបដែលត្រូវដកហូតពន្ធលើក្រុមហ៊ុនឌីជីថលធំៗដូចជា ក្រុមហ៊ុន Google និងក្រុមហ៊ុន Facebook ផងដែរ។
ក្រុមអ្នកបង្កើតគោលនយោបាយកំពុងប្រឈមចក្ខុវិស័យមិនច្បាស់លាស់កាន់តែខ្លាំង ខណៈភាពចលាចលពីជម្លោះពាណិជ្ជកម្មដែលកើតមានកាន់តែខ្លាំងឡើង បានហៀរចូលទៅក្នុងសេដ្ឋកិច្ចពិត ដែលជំរុញឲ្យធនាគារកណ្តាលមួយចំនួនកាត់បន្ថយអត្រាការប្រាក់ ឬបង្ហាញសញ្ញាបន្ធូរបន្ថយគោលនយោបាយរូបិយវត្ថុ។
មុននឹងកិច្ចប្រជុំនេះ ធនាគារពិភពលោកបានកាត់បន្ថយការព្យាករកំណើនសេដ្ឋកិច្ចពិភពលោករបស់ខ្លួនសម្រាប់ឆ្នាំនេះ ខណៈដែលទំនុកចិត្តបានធ្លាក់ចុះ ហើយការវិនិយោគត្រូវបានពន្យារពេល ដោយសារបញ្ហាភូមិសាស្រ្តនយោបាយ ដូចជាការចាកចេញរបស់អង់គ្លេសពីសហភាពអឺរ៉ុបជាដើម។
សេដ្ឋកិច្ចពិភពលោក ត្រូវបានរំពឹងថានឹងកើនឡើង ២,៦ ភាគរយ នៅឆ្នាំនេះ ដែលទាបជាការព្យាករកាលពីខែមករា និងទាបជាងកំណើន ៣ ភាគរយ នៅឆ្នាំ ២០១៨។ នេះបើតាមរបាយការណ៍ស្តីពីចក្ខុវិស័យសេដ្ឋកិច្ចពិភពលោក។
មន្ត្រីជាន់ខ្ពស់ក្រសួងហិរញ្ញវត្ថុអាមេរិកមួយរូបបានឲ្យដឹងថា ទីក្រុងវ៉ាស៊ីនតោន មានផែនការដាក់សម្ពាធឲ្យសមាជិកក្រុមប្រទេស G20 ផ្សេងទៀត កាត់បន្ថយអតុល្យភាពពាណិជ្ជកម្ម៕ AFP/KC