.jpg)
ប្រទេសមានសេដ្ឋកិច្ចរីកចម្រើនទាំង ២០ (G20) ផ្តល់ $៣០ ពាន់លាន ១ ឆ្នាំ ដល់គម្រោងឥន្ធនៈហ្វូស៊ីល។ រូបថត AFP
ក្រុងប៉ារីសៈ ការវិភាគថ្មីមួយបានបង្ហាញកាលពីថ្ងៃព្រហស្បតិ៍ថា បណ្ដាប្រទេសអ្នកមានកំពុងចាក់បញ្ចូលសាច់ប្រាក់តាមរយៈគ្រឹះស្ថានហិរញ្ញវត្ថុដែលគាំទ្រដោយរដ្ឋាភិបាល ដើម្បីផ្ដល់ទឹកប្រាក់ចំនួន ៣០ ពាន់លានដុល្លារ ដល់គម្រោងឥន្ធនៈហ្វូស៊ីលក្នុង ១ ឆ្នាំៗដែល «ប្រឆាំងកិច្ចព្រមព្រៀងទីក្រុងប៉ារីស»។
ការវិភាគនេះបានឲ្យដឹងថា ទីភ្នាក់ងារឥណទាននាំចេញ (ECAs) របស់ប្រទេសមានសេដ្ឋកិច្ចរីកចម្រើនទាំង ២០ (G20) បច្ចុប្បន្នផ្ដល់ហិរញ្ញប្បទានដែលគាំទ្រដោយរដ្ឋដល់គម្រោងប្រេង ឧស្ម័ន និងធ្យូងថ្ម នៅបរទេសពោលគឺច្រើនជាង ១០ ដងបើធៀបទំហំទឹកប្រាក់ដែលប្រទេសទាំងនោះបានផ្តល់ដល់ផែនការថាមពលកកើតឡើងវិញ។
ស្ថិតក្រោមកិច្ចព្រមព្រៀងទីក្រុងប៉ារីសការបំភាយឧស្ម័នពីគម្រោងទាំងនេះ មិនរាប់បញ្ចូលថាជាផ្នែកមួយនៃបរិមាណកាបូនបញ្ចេញទៅបរិយាកាសរបស់បណ្ដាប្រទេសម្ចាស់ជំនួយទេ។
ECAs ជាស្ថាប័នសាធារណៈដែលផ្ដល់កម្ចី និងការធានារ៉ាប់រងដែលគាំទ្រដោយរដ្ឋាភិបាលដល់ក្រុមហ៊ុននៅក្រៅប្រទេស។
អង្គការឃ្លាំមើលទីផ្សារ Oil Change International និង Friends of the Earth America បានបង្ហាញថា ការផ្ដល់ហិរញ្ញប្បទានរបស់ G20 សម្រាប់ធ្យូងថ្មតាមរយៈ ECA បានកើនឡើងជាភាគរយនៃការផ្ដល់ហិរញ្ញប្បទានគម្រោងថាមពលចាប់តាំងពីមានសន្ធិសញ្ញាទីក្រុងប៉ារីសឆ្នាំ ២០១៥។
ចំនួននោះស្មើនឹងចំនួន ៧,១ ពាន់លានដុល្លារ ប្រចាំឆ្នាំក្នុងរយៈពេលជាច្រើនឆ្នាំ ចាប់តាំងពីការចុះហត្ថលេខាលើកិច្ចព្រមព្រៀងទីក្រុងប៉ារីសដែលរួមបញ្ចូលប្រទេសជាច្រើនដើម្បីកាត់បន្ថយការបំភាយឧស្ម័នកាបូន។
អ្នកស្រី Bronwen Tucker អ្នកវិភាគនៅអង្គការ Oil Change បានថ្លែងថា៖ «វាជាការធ្វេសប្រហែស និងមិនអាចទទួលយកបានសម្រាប់រដ្ឋាភិបាលណាមួយដែលនៅតែផ្ដល់ហិរញ្ញប្បទានសាធារណៈរាប់ពាន់លានដុល្លារសម្រាប់ប្រេង ឧស្ម័ន និងធ្យូងថ្ម»។
អ្នកស្រីមានប្រសាសន៍ថា៖ «វាកាន់តែជារឿងអាក្រក់ថែមទៀត នៅពេលការផ្ដល់ប្រាក់ដល់គម្រោងឥន្ធនៈហ្វូស៊ីលទាំងនេះចេញមកពីរដ្ឋាភិបាលដែលមានការទទួលខុសត្រូវជាប្រវត្ដិសាស្ដ្រខ្លាំងបំផុតលើវិបត្តិអាកាសធាតុ»។
ការវិភាគនេះបានលើកឡើងពីចិន ជប៉ុន កូរ៉េខាងត្បូង និងកាណាដា ថាជាប្រទេសស្ថិតក្នុងប្រទេសល្មើសអាក្រក់បំផុតដែលមាន ៧៨ ភាគរយនៃការគាំទ្រឥន្ធនៈហ្វូស៊ីលរបស់ G20 ចាប់តាំងពីឆ្នាំ ២០១៦ ដល់ឆ្នាំ ២០១៨។
ការវិភាគនេះបានឲ្យដឹងថា៖ «ទោះបីជាមានភាពអាសន្នអាកាសធាតុក្តី ក៏ ECA នៅតែ [ប្រឹងផ្តល់ហិរញ្ញប្បទាន] ដល់ឥន្ធនៈហ្វូស៊ីលបន្ថែម»។
ការវិភាគបន្តថា៖ «ECA របស់ប្រទេស ជប៉ុន បន្តគាំទ្រគម្រោងធ្យូងថ្មថ្មីៗ។ ECA របស់ប្រទេស កាណាដា កំពុងចាក់បញ្ចូលសាច់ប្រាក់គម្រោងប្រេងដីខ្សាច់ (tar sands) ហើយ ECA ជាច្រើនកំពុងចាប់យកឱកាសក្នុងការគាំទ្រដល់ឧស្ម័នធម្មជាតិនៅប្រទេសភាគខាងម៉ូហ្សំប៊ិកខាងជើង និងទីកន្លែងផ្សេងទៀត»។
អង្គការសហប្រជាជាតិបានឲ្យដឹងថា ការបំភាយឧស្ម័នកាបូនត្រូវតែធ្លាក់ចុះ ៧,៦ ភាគរយ ប្រចាំឆ្នាំត្រឹមឆ្នាំ ២០៣០ ដើម្បីម្រេចបានការកម្រិតការកើនឡើងកម្ដៅ ១,៥ អង្សាសេ។
ផ្ទុយទៅវិញការបំភាយប្រេងឥន្ធនៈហ្វូស៊ីលកំពុងកើនឡើងប្រចាំឆ្នាំ ដោយសារតែតម្រូវការថាមពលកើនឡើង។
អ្នកស្រី Tucker ប្រាប់ AFP ថា៖ «ECA ជាអ្វីមួយដែលស្ទើរតែគ្មាននរណាម្នាក់បានដឹងឮ តែក្នុងនាមជាគ្រឹះស្ថានហិរញ្ញវត្ថុសាធារណៈ ពួកគេជួយរដ្ឋាភិបាលបន្តសម្រេចបានយុទ្ធសាស្ដ្រពាណិជ្ជកម្ម ហើយប្រទេសនីមួយៗអាចលាក់បាំងការវិនិយោគរបស់ពួកគេជុំវិញខ្លួនពួកគេ»៕ LA
