សៀមរាបៈ ខណៈក្រុមហ៊ុនអឺរ៉ុប (EU) មួយចំនួនដែលកំពុងប្រតិបត្តិការនៅក្នុងប្រទេស កម្ពុជា បង្ហាញការបារម្ភពីការដកប្រព័ន្ធអនុគ្រោះពន្ធ អ្វីៗគ្រប់យ៉ាងលើកលែងតែអាវុធ (EBA) ឯកអគ្គរដ្ឋទូតអឺរ៉ុបប្រចាំប្រទេស កម្ពុជា សង្ឃឹមថា ការដក EBA ពីកម្ពុជានឹងមិនអាចកើតឡើងនោះទេ។
លោក George Edgar ឯកអគ្គរដ្ឋទូត EU ប្រចាំប្រទេស កម្ពុជា បានឲ្យដឹងក្នុងអំឡុងដំណើរទស្សនកិច្ចសារព័ត៌មានរយៈពេល ៣ ថ្ងៃទៅកាន់ខេត្តសៀមរាបនៅសប្ដាហ៍នេះ ដែលរៀបចំដោយគណៈប្រតិភូអឺរ៉ុបថា ក្រុមហ៊ុន EU គឺជាដៃគូដ៏រឹងមាំ និងជាដៃគូទុកចិត្តបានរបស់កម្ពុជា ដែលមិនគ្រាន់តែរួមចំណែកដល់កំណើនសេដ្ឋកិច្ចប៉ុណ្ណោះទេ ប៉ុន្តែថែមទាំងនាំមកជាមួយទិដ្ឋភាពទទួលខុសត្រូវសង្គម ដូចជាស្ដង់ដារការងារ បច្ចេកវិទ្យាខ្ពស់ និងបរិស្ថានផងដែរ។
លោកថ្លែងថា៖ «ការផ្លាស់ប្តូរសេដ្ឋកិច្ច គឺជាកត្តាជំរុញសម្រាប់កំណើន។ ក្រុមហ៊ុន EU បង្កើតការងារនៅក្នុងប្រទេសកម្ពុជា ក្រុមហ៊ុនទាំងនោះមានចក្ខុវិស័យរយៈពេលវែង ជំរុញនវានុវត្តន៍ និងលើកកម្ពស់ការ ទទួលខុសត្រូវសង្គម និងការអនុវត្តមិនប៉ះពាល់ដល់បរិស្ថាន»។
លោកបានឲ្យដឹងថា ខណៈការអនុគ្រោះពន្ធ EBA របស់កម្ពុជា កំពុងស្ថិតក្នុងការពិភាក្សា លោកសង្ឃឹមថា វានឹងមិនអាចកើតឡើងនោះទេ។ លោកថ្លែងថា៖ «EBA គឺកំពុងស្ថិតក្នុងការ ពិភាក្សា ប៉ុន្តែខ្ញុំសង្ឃឹមថា ការដកការអនុគ្រោះពន្ធ EBA នឹងមិនកើតឡើងនោះទេនៅក្នុងប្រទេស កម្ពុជា»។
បច្ចុប្បន្ន មានក្រុមហ៊ុនវិនិយោគអឺរ៉ុបជាង ៣០០ ដែលកំពុងរួមចំណែកដល់ការអភិវឌ្ឍប្រទេស កម្ពុជា និងជំរុញកំណើនសេដ្ឋកិច្ច។ នេះបើយោងតាម George Edgar។
មានក្រុមហ៊ុនអឺរ៉ុប ៤ ដែលបានចូលរួមក្នុងដំណើរទស្សនកិច្ចនេះ ដូចជា ក្រុមហ៊ុន Artisans Angkor ក្រុមហ៊ុន Pactic ក្រុមហ៊ុន VINCI និងក្រុមហ៊ុន TOTAL។
លោក Pierre Andre Romano អគ្គនាយកក្រុមហ៊ុន Artisans Angkor ដែលត្រូវបានបង្កើតឡើងចាប់តាំងពីឆ្នាំ ១៩៩២ បានផ្ដល់ការបណ្ដុះបណ្ដាលប្រកបដោយស្ដង់ដារទាក់ទងនឹងសិប្ប កម្មកែច្នៃនៅក្នុងប្រទេស កម្ពុជា។
ក្រុមហ៊ុននេះបានលក់ផលិតផលផលិតដោយដៃជាង ៣០០,០០០ ជារៀងរាល់ឆ្នាំ និងទាក់ទាញភ្ញៀវទេសចរអន្តរជាតិជាងកន្លះលាននាក់ មកទស្សនាហាងសិប្បកម្មទាំង ៤៨ របស់ខ្លួននៅខេត្តសៀមរាប។ រហូតដល់ពេលនេះក្រុមហ៊ុនបង្កើតការងារ ១,២០០ នាក់។ នេះបើយោងតាមលោក Pierre Andre Romano។
លោកថ្លែងថា៖ «យើងលើកកម្ពស់ការធ្វើឲ្យរស់ឡើងវិញនៃសិល្បៈ និងសិប្បកម្មខ្មែរ តាមរយៈការផ្ដល់ការបណ្ដុះបណ្ដាលជំនាញដល់ប្រជាជនក្នុងស្រុក និងអនុញ្ញាតឲ្យភ្ញៀវទេសចរអន្តរជាតិទស្សនាសហគមន៍សិប្បកម្មរបស់យើងផងដែរ»។
លោកថ្លែងថា៖ «ផលិតផលរបស់យើងត្រូវបានផលិតដោយដៃ ដែលមានតម្លៃខ្ពស់បន្តិច ដើម្បីប្រកួតប្រជែងជាមួយទីផ្សារជិតខាង យើងកំពុងមានការបារម្ភថា ប្រសិនបើ EBA ត្រូវបានដកចេញ វានឹងប៉ះពាល់ដល់អាជីវកម្មរបស់យើង វានឹងបង្កើនការចំណាយបន្ថែមទៀត ហើយនឹងមានការពិបាកក្នុងការប្រកួតប្រជែងនៅលើទីផ្សារនេះផងដែរ»។
អ្នកស្រី ឃឿន ផល្លា ដែលកំពុងធ្វើការងារជាសិប្បករចម្លាក់ថ្ម ឲ្យក្រុមហ៊ុន Artisans Angkor រយៈពេល ១០ ឆ្នាំ បានឲ្យដឹងថា អ្នកស្រីស្រឡាញ់ការងារនេះខ្លាំងណាស់។ អ្នកស្រីថ្លែងថា៖ «បន្ទាប់ពីបញ្ចប់ការបណ្ដុះបណ្ដាល រយៈពេល ៦ ខែ ខ្ញុំសម្រេចចិត្តធ្វើការងារនៅទីនេះ ដោយសារតែប្រាក់ខែល្អ ដើម្បីជួយគ្រួសាររបស់ខ្ញុំ ហើយខ្ញុំមានការធានារ៉ាប់រងសង្គមផងដែរ»។
លោក Arjen LAAN អគ្គនាយកក្រុមហ៊ុន Pactics group ដែលផលិតក្រណាត់ជូតវ៉ែនតា និងផលិតផលធ្វើដំណើរ និងវ៉ាលី និងទីផ្សារសំខាន់របស់ខ្លួនពឹងផ្អែកលើអឺរ៉ុប អាមេរិក និងចិន បានបង្ហាញការ បារម្ភអំពីការដកការអនុគ្រោះពន្ធ EBA នឹងប៉ះពាល់ដល់អាជីវកម្មនេះ ជាពិសេសបុគ្គលិកជាច្រើន។
លោកថ្លែងថា៖ «វានឹងប៉ះពាល់ភ្លាមៗដល់ពួកយើង ជាពិសេសកម្មករនៅទីនេះ»។ លោកបន្តថា៖ «បើគ្មានការអនុគ្រោះពន្ធ EBA យើងនឹងពិបាកប្រកួតប្រជែង[នៅក្នុងទីផ្សារនេះ]»។
ជាមួយកម្មករជាង ៦០០ នាក់ លោកជំរុញឲ្យ EU គួរតែមានកិច្ចព្រមព្រៀងកាន់តែប្រសើរជាមួយកម្ពុជា៕LA