ក្រុងគូឡាឡាំពួៈ ក្រុមហ៊ុនបុត្រសម្ព័ន្ធចំនួន ៣ របស់ក្រុមហ៊ុន Goldman Sachs កាលពីថ្ងៃចន្ទបានបដិសេធថា គ្មានកំហុសនៅប្រទេសម៉ាឡេស៊ីជុំវិញតួនាទីដែលត្រូវបានចោទប្រកាន់របស់ធនាគារវិនិយោគនេះក្នុងរឿងអាស្រូវបាត់ប្រាក់រាប់ពាន់លានដុល្លារក្នុងមូលនិធិរដ្ឋ 1MDB របស់ម៉ាឡេស៊ី។ នេះបើយោងតាមប្រព័ន្ធផ្សព្វផ្សាយរដ្ឋម៉ាឡេស៊ី។
មានការចោទប្រកាន់ថា ទឹកប្រាក់ដ៏ច្រើនត្រូវបានគេលួចពីមូលនិធិនេះនៅក្នុងរឿងអាស្រូវបោកបន្លំដែលល្បីសាយភាយនៅទូទាំងពិភពលោក ដែលត្រូវបានរាយការណ៍ថា មានការពាក់ព័ន្ធនឹងលោក Najib Razak អតីតនាយករដ្ឋមន្ត្រីម៉ាឡេស៊ី និងគ្នីគ្នារបស់លោក។
តួនាទីរបស់ក្រុមហ៊ុន Goldman ស្ថិតនៅក្រោមការឃ្លាំមើលយ៉ាងខ្លាំង ខណៈដែលធនាគារនេះបានជួយរៀបចំការបោះផ្សាយមូលបត្របំណុលជាច្រើនលើកដែលមានតម្លៃ ៦,៥ ពាន់លានដុល្លារ សម្រាប់មូលនិធិ 1MDB។
ប្រទេសម៉ាឡេស៊ីបានដាក់ពាក្យប្តឹងក្រុមហ៊ុនបុត្រសម្ព័ន្ធចំនួន ៣ របស់ក្រុមហ៊ុននេះគឺក្រុមហ៊ុន Goldman Sachs International ក្រុមហ៊ុន Goldman Sachs (Asia) និងក្រុមហ៊ុន Goldman Sachs (Singapore)។ ក្រុមហ៊ុនទាំង ៣ នេះត្រូវបានចោទប្រកាន់ថាបានផ្តល់របាយការណ៍ក្លែងក្លាយ។
ទីភ្នាក់ងារព័ត៌មានរដ្ឋរបស់ម៉ាឡេស៊ី Bernama បានរាយការណ៍ថា អ្នកតំណាងម្នាក់របស់ក្រុមហ៊ុន Goldman Sachs បានបដិសេធថា គ្មានកំហុស បន្ទាប់ពីមានការអានការចោទប្រកាន់នៅតុលាការជាន់ខ្ពស់ក្រុងគូឡាឡំពួ។
តុលាការគ្រោងជំនុំជម្រះនៅខែមេសា ហើយសវនាការគ្រោងធ្វើឡើងរហូតដល់ខែមេសា ឆ្នាំ ២០២១៕ KC