.jpg)
ឡូហ្គោរបស់ក្រុមហ៊ុន Google និងក្រុមហ៊ុន Huawei។ រូបថត AFP
ក្រុងសានហ្រ្វានស៊ីស្កូៈ ក្រុមហ៊ុនអ៊ីនធឺណិត Google របស់អាមេរិក ដែលជាម្ចាស់ប្រព័ន្ធប្រតិបត្តិការឧបករណ៍អេឡិចត្រូនិកចល័ត Android ដែលដំណើរការលើទូរស័ព្ទភាគច្រើនលើពិភពលោក បានឲ្យដឹងកាលពីថ្ងៃអាទិត្យថា ក្រុមហ៊ុនកំពុងចាប់ផ្តើមកាត់ផ្តាច់ទំនាក់ទំនងជាមួយក្រុមហ៊ុន Huawei របស់ប្រទេស ចិន ដែលទីក្រុងវ៉ាស៊ីនតោនចាត់ទុកថាជាការគំរាមផ្នែកសន្តិសុខជាតិរបស់ខ្លួន។
ក្នុងគ្រាដែលកើតមានសង្គ្រាមពាណិជ្ជកម្មជាមួយប្រទេស ចិន លោកប្រធានាធិបតី ដូណាល់ ត្រាំបានហាមក្រុមហ៊ុនអាមេរិកជាច្រើនមិនឲ្យធ្វើពាណិជ្ជកម្មទូរគមនាគមន៍ជាមួយក្រុមហ៊ុនបរទេស ដែលត្រូវបានចោទថា គំរាមដល់សន្ដិសុខជាតិអាមេរិក។
វិធានការនេះផ្តោតទិសដៅលើក្រុមហ៊ុន Huawei ដែលជាក្រុមហ៊ុនទូរគមនាគមន៍ដ៏ធំរបស់ប្រទេស ចិន ដែលក្នុងភ្នែករបស់ទីក្រុងវ៉ាស៊ីនតោនបានចុះបញ្ជីក្រុមហ៊ុននេះថាស្ថិតក្នុងចំណោមក្រុមហ៊ុនដែលក្រុមហ៊ុនអាមេរិកអាចធ្វើពាណិជ្ជកម្មជាមួយបានតែនៅពេលដែលទទួលបានភ្លើងខៀវពីអាជ្ញាធរប៉ុណ្ណោះ។
ការហាមឃាត់នេះរួមទាំងការចែករំលែកបច្ចេកវិទ្យាផងដែរ។
អ្នកនាំពាក្យរបស់ក្រុមហ៊ុន Google បានប្រាប់ទីភ្នាក់ងារព័ត៌មាន AFP ថា៖ «យើងកំពុងអនុលោមតាមបទបញ្ជានេះ ហើយកំពុងពិនិត្យមើលភាពជំពាក់ជំពិននានា»។
អ្នកនាំពាក្យរូបនេះថ្លែងថា៖ «សម្រាប់អ្នកប្រើប្រាស់សេវារបស់យើងដូចជា Google Play និងសេវាការពារសន្តិសុខនានាពី Google Play Protect នឹងបន្តមានមុខងារដដែលលើឧបករណ៍ Huawei ដែលមានស្រាប់»។
វិធានការនេះអាចបង្កឲ្យមានភាពជំពាក់ជំពិនខ្លាំង ដោយសារក្រុមហ៊ុន Google ដូចទៅនឹងក្រុមហ៊ុនបច្ចេកវិទ្យាទាំងអស់ដែរ ត្រូវសហការជាមួយក្រុមហ៊ុនផលិតទូរស័ព្ទ ដើម្បីធានាថា ប្រព័ន្ធរបស់ខ្លួនមានភាពស៊ីគ្នានឹងទូរស័ព្ទរបស់ក្រុមហ៊ុនផលិតទូរស័ព្ទទាំងនោះ។
ប្រភពមួយដែលស្និទ្ធនឹងបញ្ហានេះបានប្រាប់ AFP ថា ក្រុមហ៊ុន Goolge នឹងត្រូវតែផ្អាកសកម្មភាពអាជីវកម្មជាមួយក្រុមហ៊ុន Huawei ដែលពាក់ព័ន្ធនឹងការផ្ទេរហាដវែរ សូហ្វរែរ និងសេវាបច្ចេកទេសនានា ដែលមិនត្រូវបានបង្ហាញឲ្យដឹងជាសាធារណៈ ពោលគឺមានន័យថា ក្រុមហ៊ុន Huawei នឹងត្រឹមតែអាចប្រើប្រាស់ប្រព័ន្ធប្រតិបត្តិការ Android ជំនាន់បើកឲ្យប្រើប្រាស់ជាសាធារណៈដោយសេរី (open source) តែប៉ុណ្ណោះ។
ក្រុមហ៊ុន Huawei នឹងលែងមានលទ្ធភាពចូលទៅប្រើប្រាស់កម្មវិធី (App) និងសេវាដែលជាទ្រព្យសម្បត្តិរបស់ក្រុមហ៊ុន Google ដូចជាសេវាអ៊ីមែល Gmail តទៅទៀតហើយ។
ក្រុមហ៊ុន Huawei មិនបានឆ្លើយតបភ្លាមៗនោះទេទៅនឹងសំណើសុំអត្ថាធិប្បាយ។
តែកាលពីថ្ងៃសៅរ៍ លោក Ren Zhengfei ស្ថាបនិក ក្រុមហ៊ុន Huawei បានថ្លែងថា៖ «យើងមិនបានធ្វើអ្វីដែលរំលោភច្បាប់ទេ»។ លោកបានបន្ថែមថា វិធានការអាមេរិកនឹងមានផលប៉ះពាល់តិចតួច។
លោកបន្ថែមថា ក្រុមហ៊ុនបានត្រៀមខ្លួនរួចហើយដើម្បីដោះស្រាយជាមួយវិធានការបង្ក្រាបរបស់ទីក្រុងវ៉ាស៊ីនតោននេះ ហើយក្រុមហ៊ុននឹងបន្តអភិវឌ្ឍគ្រឿងផ្គុំផ្ទាល់របស់ខ្លួន ដើម្បីបន្ថយការពឹងផ្អែកលើក្រុមហ៊ុនផ្គត់ផ្គង់ខាងក្រៅ។
ក្រៅពីក្រុមហ៊ុន Google ក្រុមហ៊ុនផលិតបន្ទះឈីបអាមេរិកមួយចំនួនទៀត ដូចជាក្រុមហ៊ុន Qualcomm Inc ក្រុមហ៊ុនXilinx Inc. ក្រុមហ៊ុន Broadcom Inc. ក៏បានប្រាប់និយោជិតរបស់ខ្លួនផងដែរថា ក្រុមហ៊ុនទាំងនេះនឹងឈប់ ផ្គត់ផ្គង់ឲ្យក្រុមហ៊ុន Huawei រហូតទាល់តែមានការជូនដំណឹងបន្ថែម។ នេះបើតាមសេចក្តីរាយការណ៍របស់ទីភ្នាក់ងារ Bloomberg ពីម្សិលមិញដែលដកស្រង់ប្រភពដែលដឹងពីចំណាត់ការនេះ៕ AFP/KC
