ក្រុងឡាអេៈ ក្រុមហ៊ុនផលិតស្រាបៀរ Heineken របស់ប្រទេស ហូឡង់ បានឲ្យដឹងកាលពីថ្ងៃចន្ទថា ខ្លួនបានសម្រេចកិច្ចព្រមព្រៀងក្នុងតម្លៃ ៣ ពាន់លានដុល្លារក្នុងការច្របាច់បញ្ចូលគ្នានូវប្រតិបត្តិការនៅប្រទេស ចិន របស់ខ្លួនជាមួយក្រុមហ៊ុនផលិតស្រាបៀរឈានមុខគេរបស់ចិន ដែលពង្រីកលទ្ធភាពចូលទីផ្សារស្រាបៀរឈានមុខគេរបស់ពិភពលោក។
ស្ថិតក្រោមកិច្ចព្រមព្រៀងនេះ ក្រុមហ៊ុនផលិតស្រាបៀររបស់ប្រទេស ហូឡង់ មួយនេះ បានឲ្យដឹងថា ខ្លួននឹងកាន់កាប់ភាគហ៊ុន ៤០ ភាគរយក្នុងភាគហ៊ុនក្រុមហ៊ុនហូលឌីងនេះ (holding company) ដែលគ្រប់គ្រងក្រុមហ៊ុន China Resources Beer (CR Beer) នឹងច្របាច់បញ្ចូលប្រតិបត្តិការរបស់ខ្លួនក្នុងប្រទេស ចិន ទៅក្នុងក្រុមហ៊ុននេះ និងផ្តល់អាជ្ញាប័ណ្ណឲ្យក្រុមហ៊ុននេះផលិតស្រាបៀរយីហោ Heineken សម្រាប់ការប្រើប្រាស់នៅក្នុងប្រទេសនេះ។
លោក Jean-Francois van Boxmeer អគ្គនាយកក្រុមហ៊ុន Heineken បានថ្លែងថា៖ «ភាពជាដៃគូយុទ្ធសាស្ដ្ររយៈពេលវែងរបស់យើង នឹងជួយក្រុមហ៊ុន Heineken ពង្រីកភាពអាចរកបាននៃស្រាបៀរ Heineken ហើយនឹងពង្រឹងការលក់របស់ក្រុមហ៊ុន CR Beer ក្នុងផ្នែកស្រាបៀរតម្លៃខ្ពស់ដែលកើនឡើងយ៉ាងរហ័សនៅក្នុងប្រទេស ចិន»។
ក្រុមហ៊ុន Heineken ដែលជាក្រុមហ៊ុនផលិតស្រាបៀរលំដាប់លេខ ២ ក្នុងពិភពលោក កាលពីខែសីហា បានចុះកិច្ចព្រមព្រៀងបឋមមួយស្ដីពីការលក់ភាគហ៊ុនតម្លៃ ២,៦៨ ពាន់លានអឺរ៉ូ (៣,១ ពាន់លានដុល្លារ) ក្នុងក្រុមហ៊ុន CR Beer។ កិច្ចព្រមព្រៀងនេះនៅតែកំពុងស្ថិតក្រោមការអនុម័តដោយបទប្បញ្ញត្តិនៅឡើយ។
ក្រុមហ៊ុនទាំង ២ នេះនឹងរួមកម្លាំងគ្នានៅក្នុងពេលមួយដែលមានការប្រកួតប្រជែងកាន់តែខ្លាំងឡើងៗនៅក្នុងទីផ្សាររបស់ប្រទេស ចិន ដោយសារតែអតិថិជនជាច្រើនបានងាកទៅរកស្រាបៀររបស់បរទេស និងផលិតផលតម្លៃខ្ពស់ ដោយសារតែមានកំណើនប្រាក់ចំណូលប្រជាជនចិនថ្នាក់កណ្ដាល៕ AFP/LA