ក្រុងវ៉ាស៊ីនតោនៈ ក្រុមហ៊ុនទូរគមនាគមន៍ចិន Huawei ដែលជាកម្មវត្ថុចំពោះការដាក់ទណ្ឌកម្មរបស់អាមេរិកជុំវិញក្តីបារម្ភពីទំនាក់ទំនងរបស់ក្រុមហ៊ុននេះជាមួយរដ្ឋាភិបាលក្រុងប៉េកាំង កំពុងមានផែនការកាត់បន្ថយបុគ្គលិកក្នុងទ្រង់ទ្រាយធំមួយនៅប្រតិបត្តិការរបស់ខ្លួននៅសហរដ្ឋអាមេរិក។ នេះបើយោងតាមកាសែត Wall Street Journal កាលពីថ្ងៃអាទិត្យ។
Wall Street Journal បានរាយការណ៍ដោយដកស្រង់ប្រភពដែលបានដឹងពីស្ថានភាពនេះថា ការជម្រុះបុគ្គលិកនេះត្រូវបានរំពឹងថានឹងធ្វើឡើងនៅអង្គភាពស្រាវជ្រាវ និងអភិវឌ្ឍន៍ Futurewei Technologies ដែលមានមូលដ្ឋាននៅសហរដ្ឋអាមេរិក។
កាសែតនេះបានរាយការណ៍បន្តថា ក្រុមហ៊ុន Futurewei Technologies បច្ចុប្បន្នមានបុគ្គលិកចំនួន ៨៥០ នាក់ដែលកំពុងបម្រើការងារនៅមន្ទីរពិសោធន៍មួយចំនួននៅសហរដ្ឋអាមេរិក ប៉ុន្តែបុគ្គលិករាប់រយនាក់អាចត្រូវបានជម្រុះចោល។
និយោជិតជនជាតិចិនមួយចំនួនរបស់ក្រុមហ៊ុននេះត្រូវបានផ្តល់ជូនជម្រើសក្នុងការរក្សាការងាររបស់ពួកគេ ហើយវិលត្រឡប់ទៅបម្រើការងារ នៅប្រទេសកំណើតវិញ។
រដ្ឋបាលរបស់លោកប្រធានាធិបតីអាមេរិក ដូណាល់ ត្រាំ បានដាក់ក្រុមហ៊ុន Huawei ចូលទៅក្នុងបញ្ជីមួយឈ្មោះថា បញ្ជីអង្គភាព ពោលគឺជាបញ្ជីខ្មៅ ដែលមានន័យថា ក្រុមហ៊ុនអាមេរិកចាំបាច់ត្រូវការអាជ្ញាប័ណ្ណដើម្បីផ្គត់ផ្គង់បច្ចេកវិទ្យាអាមេរិកទៅឲ្យក្រុមហ៊ុនបច្ចេកវិទ្យាចិនដ៏ធំមួយនេះ។
Huawei ដែលជាក្រុមហ៊ុននាំមុខគេខាងផ្នែកបច្ចេកវិទ្យាអ៊ីនធឺណិតឥតខ្សែជំនាន់ថ្មី 5G នៅតែត្រូវបានរារាំងមិនឲ្យអភិវឌ្ឍបណ្តាញ 5G នៅអាមេរិក ហើយរដ្ឋបាលរបស់លោក ត្រាំ កំពុងព្យាយាមបញ្ចុះបញ្ចូលប្រទេសជាសម្ព័ន្ធមិត្តរបស់ខ្លួនឲ្យធ្វើដូចអាមេរិកដែរ។
នៅសប្តាហ៍មុន ប្រទេស ម៉ូណាកូ បានក្លាយជាប្រទេសទី១ នៅអឺរ៉ុបដែលបានដាក់បង្ហាញបណ្តាញបច្ចេកវិទ្យា 5G ដែលមានមូលដ្ឋានលើបច្ចេកវិទ្យារបស់ Huawei។
ទីក្រុងវ៉ាស៊ីនតោនបានចោទប្រកាន់ក្រុមហ៊ុន Huawei ថាបានធ្វើការងារដោយផ្ទាល់ជាមួយរដ្ឋាភិបាលក្រុងប៉េកាំង ពោលគឺជាអះអាងមួយដែលត្រូវបានច្រានចោលដោយក្រុមហ៊ុនចិនមួយនេះ។
បន្ទាប់ពីលោក ត្រាំ បានជួបជាមួយលោក ស៊ី ជីនភីង នៅក្រៅជំនួបកិច្ចប្រជុំ G20 ក្នុងប្រទេស ជប៉ុន កាលពីខែមុន ក្រុមហ៊ុន Huawei ទទួលបានការបន្ធូរបន្ថយបន្តិចនៅពេលលោក ត្រាំ បាននិយាយថា លោកនឹងបន្ធូរបន្ថយវិធានការទណ្ឌកម្មដរាបណាឧបករណ៍ដែលលក់ទៅឲ្យក្រុមហ៊ុនចិនមួយនេះមិនបង្កហានិភ័យដល់សន្តិសុខជាតិ៕ AFP/KC