ក្រុងវ៉ាស៊ីនតោនៈ ក្រុមហ៊ុនបច្ចេកវិទ្យា Huawei របស់ប្រទេស ចិន បានឲ្យដឹងកាលពីចុងសប្តាហ៍មុនថា ខ្លួននឹងប្រឆាំងនឹងសេចក្តីសម្រេចចិត្តរបស់ការិយាល័យឧស្សាហកម្ម និងសន្តិសុខ (BIS) នៃក្រសួងពាណិជ្ជកម្មអាមេរិក។
ក្រុមហ៊ុន Huawei បានធ្វើសេចក្តីប្រកាសនេះ បន្ទាប់ពីការិយាល័យ BIS នៅថ្ងៃពុធសប្តាហ៍មុនបានដាក់ក្រុមហ៊ុននេះ និងក្រុមហ៊ុនបុត្រសម្ព័ន្ធរបស់ខ្លួនទៅក្នុង «បញ្ជីអង្គភាព» មួយ ដែលនឹងរឹតបន្តឹងការលក់ ឬការផ្ទែរបច្ចេកវិទ្យាអាមេរិកទៅឲ្យក្រុមហ៊ុននេះ។
ក្រុមហ៊ុន Huawei បានឲ្យដឹងក្នុងសេចក្តីថ្លែងការណ៍មួយដែលផ្តល់ជូនទីភ្នាក់ងារព័ត៌មានស៊ីនហួថា សេចក្តីសម្រេចនេះមិនស្ថិតក្នុងប្រយោជន៍របស់អ្នកណាម្នាក់ទេ ហើយនឹងធ្វើឲ្យប៉ះពាល់ផ្នែកសេដ្ឋកិច្ចយ៉ាងខ្លាំងដល់ក្រុមហ៊ុនអាមេរិក ដែលធ្វើអាជីវកម្មជាមួយក្រុមហ៊ុន Huawei ប៉ះពាល់ដល់ការងារអាមេរិករាប់សែនកន្លែង និងរារាំងដល់កិច្ចសហប្រតិបត្តិការបច្ចុប្បន្ន និងទំនុកចិត្តទៅវិញទៅមកដែលមានក្នុងចង្វាក់ ផ្គត់ផ្គង់ពិភពលោក។
សេចក្តីថ្លែងការណ៍នេះឲ្យដឹងថា ក្រុមហ៊ុន Huawei នឹងស្វែងរកដំណោះស្រាយភ្លាមៗ និងស្វែងរកសេចក្តីសម្រេចមួយចំពោះបញ្ហានេះ ហើយក៏នឹងព្យាយាមចាត់វិធានការបង្ការផងដែរ ដើម្បីកាត់បន្ថយផលប៉ះពាល់ពីបញ្ហានេះ។
សេតវិមានក៏ចេញបញ្ជាប្រតិបត្តិផងដែរ ហាមឃាត់ការប្រើឧបករណ៍ទូរគមនាគមន៍បរទេស ដែលក្រុងវ៉ាស៊ីនតោនចាត់ទុកថាបង្កហានិភ័យមិនអាចទទួលយកបាន៕ People''s Daily/KC