ក្រុងញូវយ៉កៈ ក្រុមហ៊ុន McDonald''s កាលពីថ្ងៃអង្គារបានប្រកាសផែនការកាត់បន្ថយថ្នាំអង់ទីប៊ីយ៉ូទិកនៅក្នុងសាច់គោ ដោយពង្រីកកំណែទម្រង់ដែលផ្តោតទៅរកសុខភាពឆ្ពោះទៅរកប្រភពសាច់ថ្មីក្រៅពីសាច់មាន់។
ក្រុមហ៊ុនអាហារហ្វាស់ហ៊្វូតដ៏ធំមួយនេះបានរៀបរាប់ដំណើរការមួយដែលមានបីដំណាក់កាល ដែលដំបូងក្រុមហ៊ុននឹងធ្វើការសិក្សាទៅលើទីផ្សារប្រភពសាច់គោធំៗទាំង ១០ របស់ខ្លួនដែលមានប្រើថ្នាំអង់ទីប៊ីយ៉ូទិកនាពេលបច្ចុប្បន្នក្នុងបសុសត្វ ហើយនៅត្រឹមឆ្នាំ ២០២០ បង្កើតទិសដៅកាត់បន្ថយ។
ដោយចាប់ផ្តើមពីឆ្នាំ ២០២០ ទៅ ក្រុមហ៊ុន McDonald''s នឹងចាប់ផ្តើមរាយការណ៍ពីវឌ្ឍនភាពទិសដៅកាត់បន្ថយជាតិអង់ទីប៊ីយ៉ូទិក។
លោក Keith Kenny អនុប្រធានពិភពលោកទទួលបន្ទុកផ្នែកចីរភាពរបស់ក្រុមហ៊ុន McDonald''s បានថ្លែងថា៖ «ក្រុមហ៊ុន McDonald''s ជឿថា ភាពស៊ាំទៅនឹងថ្នាំអង់ទីប៊ីយ៉ូទិកគឺជាបញ្ហាសុខភាពសាធារណៈយ៉ាងសំខាន់មួយ ហើយយើងគិតគូរបន្តដោះស្រាយបញ្ហាប្រឈមនេះ»។
ក្រុមហ៊ុន McDonald''s ក្រុមហ៊ុន Walmart ក្រុមហ៊ុន Tyson Foods និងក្រុមហ៊ុនដទៃៗទៀតបានប្រកាសផែនការរួចហើយក្នុងការដាក់កម្រិតឬកាត់បន្ថយការប្រើប្រាស់ថ្នាំអង់ទីប៊ីយ៉ូទិកនៅក្នុងសត្វមាន់។
ចំណាត់ការនេះបានធ្វើឡើងបន្ទាប់ពីមានការព្រមានពីភាពស៊ាំទៅនឹងអង់ទីប៊ីយ៉ូទិកពីមន្រ្តីសុខាភិបាល និងបន្ទាប់ពីមានសេចក្តីសម្រេចរបស់មហាសន្និបាតរបស់អង្គការសហប្រជាជាតិកាលពីខែ កញ្ញា ឆ្នាំ ២០១៦ ដែលបានប្តេជ្ញាចិត្តសម្របសម្រួលឲ្យមានចំណាត់ការដោះស្រាយការប្រើប្រាស់ថ្នាំអង់ទីប៊ីយ៉ូទិកហួសកម្រិត។
ប៉ុន្តែបើទោះបីជាមានរលកនៃការប្រកាសនានាស្តីពីសត្វមាន់ក៏ដោយ ក៏មិនទាន់មានវឌ្ឍនភាពដែលអាចប្រៀបធៀបចំពោះអំពីសាច់គោឡើយ។ នេះបើយោងតាមលោកស្រី Lena Brook អ្នកជំនាញផ្នែកគោលនយោបាយស្បៀងអាហារនៅក្រុមប្រឹក្សាការពារធនធានធម្មជាតិ ដែលបានសរសើរក្រុមហ៊ុន McDonald''s ដែលបានការចាត់វិធានការនាំមុខគេបន្ទាប់ពីមានសម្ពាពពីស្ថាប័នរបស់លោកស្រី និងស្ថាប័នដទៃៗទៀត។
លោកស្រី Brook បានថ្លែងថា ៤៣ ភាគរយនៃថ្នាំអង់ទីប៊ីយ៉ូទិកដែលសំខាន់ផ្នែកវេជ្ជសាស្រ្តដែលត្រូវបានលក់ទៅឧស្សាហកម្មបសុសត្វ មានប្រើនៅក្នុងឧស្សាហកម្មសាច់គោ ខណៈមានតែ ៦ ភាគរយប៉ុណ្ណពោះប្រើនៅក្នុងសាច់មាន់៕ AFP/PS