វ៉ាស៊ីនតោនៈ លោក Bill Gates សហស្ថាបនិកក្រុមហ៊ុនបានឲ្យដឹងកាលពីថ្ងៃចន្ទថា ក្រុមហ៊ុន Microsoft បានខកខានឱកាសនៅក្នុងការក្លាយជាក្រុមហ៊ុនឈានមុខគេខាងផ្នែកបច្ចេកវិទ្យាទូរស័ព្ទចល័ត ដោយសារក្រុមហ៊ុនបាន «ធ្វេសប្រហែស» ក្នុងអំឡុងសង្គ្រាមប្រឆាំងភាពផ្ដាច់មុខរយៈពេលយូរជាមួយអាជ្ញាធរអាមេរិក។
លោក Gates ដែលថ្លែងនៅក្នុងវេទិកាមួយនៅទីក្រុងវ៉ាស៊ីនតោន បានឲ្យដឹងថា ក្រុមហ៊ុន Microsoft នឹងក្លាយជាក្រុមហ៊ុនកាន់តែមានតម្លៃប្រសិនបើក្រុមហ៊ុននេះបានឈ្នះសង្គ្រាមលើប្រតិបត្តិការសូហ្វវែរសម្រាប់ឧបករណ៍ចល័តទល់នឹងក្រុមហ៊ុន Google និងកម្មវិធីប្រព័ន្ធ Android របស់ខ្លួន។
លោក Gates បានថ្លែងក្នុងអំឡុងបទសម្ភាសនៅលើឆាកមួយដែលឧបត្ថម្ភដោយវេទិកាក្លិបសេដ្ឋកិច្ចរបស់ទីក្រុងវ៉ាស៊ីនតោនថា៖ «យើងកំពុងស្ថិតនៅក្នុងវិស័យនៃការធ្វើប្រព័ន្ធប្រតិបត្តិការសម្រាប់កុំព្យូទ័រផ្ទាល់ខ្លួន។ យើងបានដឹងថា ទូរស័ព្ទចល័តនឹងមានភាពពេញនិយមយ៉ាងខ្លាំង»។
លោកថ្លែងថា៖ «យើងខកខានក្នុងការធ្វើជាប្រព័ន្ធប្រតិបត្តិការទូរស័ព្ទចល័តឈានមុខគេដោយចំនួនតិចតួចបំផុត។ យើងធ្វេសប្រហែស ក្នុងអំឡុងការជម្រះក្ដីប្រឆាំងភាពផ្ដាច់មុខរបស់យើង។ យើងមិនបានប្រគល់ភារកិច្ចដល់មនុស្សល្អ បំផុតដើម្បីធ្វើការងារនេះ»។
លោក Gates ដែលបានចាកចេញពីការគ្រប់គ្រងប្រចាំថ្ងៃ ១ ទសវត្សរ៍កន្លងមក បានឲ្យដឹងថា ការបរាជ័យនៅក្នុងទូរស័ព្ទចល័តគឺជា «កំហុសដ៏ធំជាងគេដែលខ្ញុំបានធ្វើ» នៅក្នុងក្រុមហ៊ុន Microsoft ព្រោះជាជំនាញរបស់យើងស្រាប់ទៅហើយ។ លោកថ្លែងថា៖ «យើងច្បាស់ថា ក្រុមហ៊ុននោះគួរតែសម្រេចបានការងារនោះ ប៉ុន្តែយើងមិនបានធ្វើវា»។ លោកបន្តថា៖ «ប្រព័ន្ធ Android គឺជាទ្រព្យសកម្មដ៏ធំមួយសម្រាប់ក្រុមហ៊ុន Google »។
លោក Gates បានសរសើរលោក Satya Nadella ប្រធានប្រតិបត្តិបច្ចុប្បន្ន សម្រាប់ការជួយកែទម្រង់ក្រុមហ៊ុន Microsoft និងការធ្វើឲ្យក្រុមហ៊ុននេះត្រឡប់ទៅធ្វើជាក្រុមហ៊ុនដែលមានតម្លៃបំផុតរបស់ពិភពលោក ជាមួយមូលធនទីផ្សារជាង ១ ពាន់ពាន់លានដុល្លារ។
ប៉ុន្តែលោកក៏បានឲ្យដឹងថា ក្រុមហ៊ុន Microsoft និងក្រុមហ៊ុនសូហ្វវែរធំៗផ្សេងទៀតក៏បានធ្វើខុសក្នុងការអនុញ្ញាតឲ្យ Amazon កា្លយជាក្រុមហ៊ុនកុំព្យូទ័រខ្លោដឈានមុខគេទោះបីវាគ្រាន់តែជាកម្មវិធីសេវាគេហទំព័រ Amazon ក៏ដោយ។
លោក Gates ថ្លែងថា៖ «វាជាការគួរឲ្យភ្ញាក់ផ្អើលមួយ និងវាជាការកោតសរសើរដ៏ធំមួយចំពោះលោក Jeff Bezos អគ្គនាយកក្រុមហ៊ុន Amazon និងក្រុមរបស់លោកដែលពួកគេបានចេញមុខ ហើយជាមួយនឹង AWS បានផលិតផលិតផលខ្លោដល្អបំផុត»។
លោកបញ្ជាក់ថា៖ «បច្ចុប្បន្នក្រុមហ៊ុន Microsoft ជាក្រុមហ៊ុនលំដាប់លេខ ២ ដ៏រឹងមាំ ប៉ុន្តែមានក្រុមហ៊ុនជាច្រើនដែលរួមទាំងក្រុមហ៊ុន Microsoft ដែលគួរមានអារម្មណ៍មិនល្អ «ក្នុងការបរាជ័យដែលត្រូវបាននាំមុខ ដោយក្រុមហ៊ុន Amazon ខាងឧបករណ៍ខ្លោដ។
ពេលនេះទីប្រឹក្សាយោបល់ផ្នែកបច្ចេកវិទ្យាមួយរូបនៅក្រុមហ៊ុន Microsoft លោក Gates បានឲ្យដឹងថា លោកចំណាយពេលវេលាប្រហែល ១ ភាគ ៦ នៃពេលវេលារបស់លោកនៅក្នុងក្រុមហ៊ុននេះ និងលះបង់ពេលវេលាជាច្រើនរបស់លោកដល់មូលនិធិសប្បុរសធម៌របស់លោក និងមូលនិធិវិនិយោគរួមថាមពលមួយ ដែលធ្វើការវិនិយោគក្នុងគោលបំណងជួយទប់ស្កាត់ការបំភាយឧស្ម័ន និងផ្លាស់ប្តូរការប្រែប្រួលអាកាសធាតុ៕ AFP/LA