ភ្នំពេញ: ក្រុមហ៊ុន Minebea Cambodia Co.,Ltd ដែលជាក្រុមហ៊ុនផលិតឧបករណ៍អេឡិចត្រូនិករបស់ជប៉ុននឹងផលិតឧបករណ៍ក្មេងលេង ដែលនឹងបិទស្លាកថា «ផលិតនៅកម្ពុជា (Made in Cambodia)» ដើម្បីនាំទៅកាន់ទីផ្សារពិភពលោក។ នេះបើតាមការឲ្យដឹងពីប្រធានក្រុមហ៊ុន។
លោក Yoshihisa Kainuma ប្រធានក្រុមហ៊ុន Minebea Cambodia Co.,Ltd បានឲ្យដឹងនៅក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃពុធថា រាល់ផលិតផលឧបករណ៍ក្មេងដែលក្រុមហ៊ុនផលិតនឹងបិទស្លាកសញ្ញា «ផលិតនៅកម្ពុជា»។
លោកថ្លែងថា៖ «ក្រុមហ៊ុនទើបទទួលបានការអនុញ្ញាតឲ្យផលិតឧបករណ៍កម្សាន្តរបស់ក្មេង។ ផលិតផលនេះនឹងនាំចេញទៅទូទាំងពិភពលោក»។
នៅក្នុងជំនួបនេះលោក ហ៊ុន សែន បានថ្លែងថា គោលនយោបាយរបស់រដ្ឋាភិបាលកំពុងតែធ្វើកំណែទម្រង់ក្នុងការកាត់បន្ថយថ្លៃដើមផលិត និងសេវាដឹកជញ្ជូន ដើម្បីជំរុញការប្រកួតប្រជែងរបស់កម្ពុជា។
លោកបានថ្លែងថា៖ «នេះជាមោទនភាពរបស់កម្ពុជាចំពោះការបិទស្លាកសញ្ញាសម្គាល់ប្រភពដើមផលិតនៅកម្ពុជាលើឧបករណ៍ក្មេងលេង»។
បើតាមលោក Yoshihisa Kainuma ក្រុមហ៊ុន Minebea Cambodia មានទុនវិនិយោគនៅកម្ពុជាប្រមាណ ៣៧២ លានដុល្លារកាលពីឆ្នាំ ២០១៨ ហើយក្រុមហ៊ុនរំពឹងថា ទុននេះនឹងកើនដល់ ៤០០ លានដុល្លារក្នុងឆ្នាំ ២០១៩ នេះ។ លោកបន្តថា ក្រៅពីផលិតផលឧបករណ៍ក្មេងលេង ក្រុមហ៊ុនក៏ផលិតអំពូលភ្លើងឆ្លាតវៃផងដែរ។
Minebea គឺជាក្រុមហ៊ុនជប៉ុនធំជាងគេនៅកម្ពុជាដែលបានចាប់ផ្តើមវិនិយោគនៅឆ្នាំ ២០១១ ជាមួយនឹងទឹកប្រាក់ប្រហែល ២៣ លានដុល្លារ ដើម្បីផលិតផលិតផលអេឡិចត្រូនិកនានាដូចជាឌីណាម៉ូ និងម៉ូទ័រ ដើម្បីនាំចេញទៅកាន់បរទេស៕LA