.jpg)
ពិធីចុះអនុស្សរណៈយោគយល់ រវាងធនាគារជាតិនៃកម្ពុជា និងធនាគារមេយប៊ែង កាលពីម្សិលមិញ។ រូបថត ធនាគារជាតិ
ភ្នំពេញៈ ធនាគារជាតិនៃកម្ពុជា (NBC) និងធនាគារ Maybank បានចុះអនុស្សរណៈនៃការយោគយល់គ្នា (MoU) ដើម្បីពិនិត្យលទ្ធភាពក្នុងការជំរុញការទូទាត់ និងផ្ទេរប្រាក់ឆ្លងដែនរវាងគ្នាទៅវិញទៅមកតាមរយៈប្រព័ន្ធបាគង។
បាគង គឺជាប្រព័ន្ធដែលអនុញ្ញាតឲ្យមនុស្ស ២ នាក់ ដែលមានគណនីធនាគារ ២ ផ្សេងគ្នាអាចផ្ទេរប្រាក់ ទូទាត់ប្រាក់ទៅវិញទៅមកតាមរយៈកម្មវិធីទូរសព្ទដៃ។
ក្នុងពិធីចុះ MoU កាលពីថ្ងៃម្សិលមិញ អ្នកស្រី ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា (NBC) បាននិយាយថា កិច្ចសហការនេះនឹងជួយសម្រួលដល់ប្រជាជនខ្មែរដែលរស់នៅប្រទេសម៉ាឡេស៊ីឲ្យមានភាពងាយស្រួលក្នុងការផ្ទេរប្រាក់មកកម្ពុជា ខណៈបច្ចុប្បន្នការផ្ញើប្រាក់ពីម៉ាឡេស៊ីមកកម្ពុជាពេលខ្លះត្រូវចំណាយខ្ពស់ ប្រើពេលយូរ និងត្រូវឆ្លងកាត់មនុស្សទី ៣។
អ្នកស្រីថ្លែងថា៖ «អនុស្សរណៈដែលចុះហត្ថលេខានេះនឹងនាំឲ្យស្ថាប័នទាំង ២ ឈានដល់កិច្ចសហប្រតិបត្តិការផ្នែកហិរញ្ញវត្ថុមួយកម្រិតទៀតក្នុងការទាញយកផលប្រយោជនបន្ថែមទៀតពីការរីកចម្រើនផ្នែកបច្ចេកវិទ្យាសម្រាប់ឲ្យប្រជាជនកម្ពុជា និងម៉ាឡេស៊ីប្រើ។
បើតាមអ្នកស្រី ជា សិរី កម្មវិធីបាគងនេះអ្នកប្រើប្រាស់ក៏អាចបង់ថ្លៃសាលាកូន ទឹក និងភ្លើងបានផងដែរ។
លោក Dato'' Mohd Hanif Suadi នាយកប្រតិបត្តិធនាគារ Maybank (ខេមបូឌា) បានឲ្យដឹងថាតាមរយៈ MoU នេះនឹងជំរុញឲ្យ Maybank ខិតខំធ្វើឲ្យប្រសើរឡើងនូវសេវាកម្មរបស់ខ្លួនជាមួយនឹងសេវាកម្មឌីជីថលថ្មីៗ ដែលជាការរួមចំណែកដល់ការអភិវឌ្ឍវិស័យធនាគារនៅកម្ពុជា។
លោកថ្លែងថា៖ «កិច្ចសហការនេះនឹងជួយលើកកម្ពស់បរិយាប័ន្នហិរញ្ញវត្ថុ និងកិច្ចគាំទ្រចំពោះការវិវឌ្ឍទៅរកសង្គមឌីជីថលនៅកម្ពុជា»៕
