ប៉ារីសៈ អង្គការកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) កាលពីថ្ងៃអង្គារ បានកាត់បន្ថយការព្យាកររបស់ខ្លួនសម្រាប់សេដ្ឋកិច្ចពិភពលោក ដោយបានជំរុញឲ្យរដ្ឋាភិបាលជាច្រើនត្រូវដោះស្រាយជម្លោះពាណិជ្ជកម្មរបស់ពួកគេ ខណៈមានការកើនឡើងខ្លាំងឡើងៗនៅពេលថ្មីៗនេះនៅក្នុងសង្គ្រាមពាណិជ្ជកម្មរវាងប្រទេស ចិន និងអាមេរិក ដែលគំរាមកំហែងដល់កំណើន សេដ្ឋកិច្ចពិភពលោក។
អង្គការ OECD បានឲ្យដឹងថា ខណៈពេលអង្គការនេះបានកាត់បន្ថយការព្យាករកំណើនសេដ្ឋកិច្ចពិភពលោកមកនៅត្រឹម ៣,២ ភាគរយ នៅឆ្នាំនេះធៀបនឹង ៣,៣ ភាគរយ កាលពីឆ្នាំ ២០១៨ ថា រដ្ឋាភិបាលទាំងអស់ត្រូវតែចាត់វិធានការជាបន្ទាន់ក្នុងការធ្វើឲ្យកំណើនស្ទុះងើបឡើងវិញដែលផ្ដល់អត្ថប្រយោជន៍ដល់ទាំងអស់គ្នា។
អង្គការ OECD ឲ្យដឹងថា៖ «ការដោះស្រាយជម្លោះពាណិជ្ជកម្មតាមរយៈការបង្កើនកិច្ចសហប្រតិបត្តិការអន្តរជាតិជាមួយនឹងការកែលម្អប្រព័ន្ធមានមូលដ្ឋានច្បាប់អន្តរជាតិ»។ អង្គការនេះបន្តថា៖ «ការវិនិយោគលើហេដ្ឋារចនាសម្ព័ន្ធ ការផ្ទេរឌីជីថល និងជំនាញ ដើម្បីឆ្លើយតបនឹងបញ្ហាប្រឈមនៅថ្ងៃអនាគត។ នៅក្នុងតំបន់ចាយប្រាក់អឺរ៉ូ រចនាសម្ព័ន្ធរួមជាមួយគោលនយោបាយសារពើពន្ធ ដើម្បីជំរុញសកម្មភាព»។
ប្រភពពីអង្គការបានប្រាប់ទីភ្នាក់ងារព័ត៌មាន AFP ថា ការព្យាករបច្ចុប្បន្នភាពរបស់អង្គការ OECD មិនបានពិចារណាដោយផ្ទាល់ពីសង្គ្រាមពាណិជ្ជកម្មកាន់តែខ្លាំងឡើងៗនៅពេលថ្មីៗនេះ រវាងទីក្រុងវ៉ាស៊ីនតោន និងទីក្រុងប៉េកាំងទេ នៅតែមានភាពមិនច្បាស់លាស់ដ៏ធំអំពីរយៈពេល (ពន្ធនាំចូល) នឹងនៅតែមានការវិវត្តនៅពេលអនាគតនៃទំនាក់ទំនងពាណិជ្ជកម្មរវាងប្រទេសទាំង ២ នេះ»។ ប្រភពនេះបន្តថា ប៉ុន្តែការព្យាករនេះ បាន «ដាក់បញ្ចូល» ភាពមិនច្បាស់លាស់ខ្លាំងឡើងៗដែលបានបង្កើតឡើងដោយភាពតានតឹងផ្នែកពាណិជ្ជកម្មនេះ។
ខណៈទាំងទីក្រុងវ៉ាស៊ីនតោន និងទីក្រុងប៉េកាំង បានសង្កត់ពន្ធនាំចូលទំនិញលើគ្នាទៅវិញទៅមកបានរារាំងក្រុមហ៊ុនរបស់អាមេរិកមិនឲ្យចូលរួមក្នុងពាណិជ្ជកម្មទូរគមនាគមន៍ជាមួយក្រុមហ៊ុនបរទេសដោយនិយាយថា នឹងគំរាមកំហែងដល់សន្ដិសុខជាតិអាមេរិក។
Google ជាក្រុមហ៊ុនអ៊ីនធឺណិតឈានមុខគេរបស់អាមេរិក ដែលប្រព័ន្ធប្រតិបត្តិការទូរស័ព្ទចល័ត Android របស់ខ្លួន ដាក់ឲ្យដំណើរការលើទូរស័ព្ទស្មាតហ្វូនរបស់ពិភពលោកភាគច្រើន ពេលនេះប្រកាសថា ខ្លួនចាប់ផ្ដើមកាត់ផ្ដាច់ទំនាក់ទំនងជាមួយ Huawei ជាក្រុមហ៊ុនរបស់ចិន ដែលក្រុងវ៉ាស៊ីនតោនចាត់ទុកថា ជាការគំរាមកំហែងមួយដល់សន្ដិសុខជាតិ។
ខណៈ OECD បានកាត់បន្ថយការព្យាករកំណើនសេដ្ឋកិច្ចពិភពលោករបស់ខ្លួនសម្រាប់ឆ្នាំនេះ អង្គការនេះបានព្យាករកំណើនដល់ទៅ ៣,៤ ភាគរយនៅឆ្នាំក្រោយ។
អង្គការនេះបានព្យាករពីកំណើនសេដ្ឋកិច្ចអាមេរិក នៅឆ្នាំនេះពី ០,២ ភាគរយ ដល់ ២,៨ ភាគរយ ប៉ុន្តែបានព្យាករថា នឹងធ្លាក់ចុះមកនៅត្រឹម ២,៣ ភាគរយ នៅឆ្នាំក្រោយ។
កំណើនសេដ្ឋកិច្ចរបស់ប្រទេស ចិន ត្រូវបានព្យាករថា នឹងធ្លាក់ចុះមកនៅ ៦,២ ភាគរយនៅឆ្នាំនេះ និង ៦ ភាគរយនៅឆ្នាំក្រោយ។ ចក្ខុវិស័យសម្រាប់កំណើនសេដ្ឋកិច្ចតំបន់ចាយប្រាក់អឺរ៉ូ ត្រូវបានរក្សានៅដដែលក្នុងចំនួន ១,២ ភាគរយ នៅឆ្នាំនេះ៕ AFP/LA