ភ្នំពេញៈ ធនាគារអភិវឌ្ឍន៍ជនបទ (RDB) គ្រប់គ្រងដោយរដ្ឋ គ្រោងស្នើសុំថវិកា ៥០ លានដុល្លារបន្ថែមទៀតពីរដ្ឋាភិបាល សម្រាប់ផ្តល់កម្ចីទៅក្នុងឧស្សាហកម្មស្រូវអង្ករ ខណៈធនាគារនេះបានបញ្ចេញកម្ចី ៤៩ លានដុល្លាររួចហើយទៅដល់វិស័យនេះ។ នេះបើយោងតាមលោក កៅ ថាច អគ្គនាយក RDB។
លោក កៅ ថាច ឲ្យដឹងថា ខណៈឃ្លាំងស្ដុកស្រូវជាច្រើនកំពុងដាក់ឲ្យដំណើរការ តម្រូវការកម្ចីនឹងបន្តកើនឡើង។ លោកបន្ថែមថា RDB បច្ចុប្បន្នសល់ប្រាក់តែ ១ លានដុល្លារប៉ុណ្ណោះ ខណៈរដូវប្រមូលផលចាប់ផ្ដើម។
លោកបញ្ជាក់ថា៖ «យើងកំពុងមានអ្នកដាក់ពាក្យសុំកម្ចីបន្ថែមទៀត ឃ្លាំងស្ដុកស្រូវជាច្រើនត្រូវបានដាក់ឲ្យដំណើរការ ដូច្នេះតម្រូវការកម្ចីនឹងកើនឡើងផងដែរ»។
រដ្ឋាភិបាលសម្រេចបញ្ចេញកម្ចីដោយផ្ទាល់តាមរយៈ RDB ដើម្បីជួយដល់វិស័យស្រូវអង្ករឲ្យគេចផុតពីបញ្ហាតាំងពីខែ មីនា ឆ្នាំ ២០១៦។
កាលពីខែកញ្ញា ឆ្នាំ ២០១៦ រដ្ឋាភិបាលផ្តល់កញ្ចប់ថវិកា ២៧ លានដុល្លារដល់ RDB ដើម្បីឲ្យធនាគារនេះអាចបញ្ចេញកម្ចីដល់រោងម៉ាស៊ីនកិនស្រូវក្នុងការទិញស្រូវពីកសិករ ហើយខែសីហា ឆ្នាំ ២០១៧ ថវិកា ២៣ លានដុល្លារផ្សេងទៀត ត្រូវបានចាក់បញ្ចូល ដែលធ្វើឲ្យថវិកាសរុបកើនឡើងដល់ ៥០ លានដុល្លារ។
ដោយសារតែតម្រូវការកម្ចីកាន់តែខ្ពស់ RDB នឹងស្នើសុំកម្ចី ៥០ លានដុល្លារផ្សេងទៀតពីក្រសួងសេដ្ឋកិច្ច និងហិរញ្ញវត្ថុ (MEF) ដើម្បីឆ្លើយតបនឹងតម្រូវការរបស់ឧស្សាហកម្មនេះ។ នេះបើយោងតាមលោក កៅ ថាច។
លោកថ្លែងថា៖ «យើងចាំបាច់ត្រូវស្នើសុំទៅ MEF ឲ្យចាក់បញ្ចូលទឹកប្រាក់ ៥០ លានដុល្លារផ្សេងទៀត សម្រាប់រដូវប្រមូលផលក្រោយ ដោយសារតែថវិការបស់យើងនៅរដូវនេះមិនអាចឆ្លើយតបតាមតម្រូវការរបស់ឧស្សាហកម្មស្រូវអង្ករបានទេ»។
លោក ឡាយ ឈុនហួ ម្ចាស់រោងម៉ាស៊ីនកិនស្រូវ ឡាយ សែ នៅខេត្តបាត់ដំបង ដែលបានប្រើប្រាស់កម្ចីរួចហើយពី RDB រយៈពេល ២ ឆ្នាំមកហើយនេះ បានឲ្យដឹងថា ថវិការបស់រដ្ឋាភិបាលសម្រាប់ឧស្សាហកម្មស្រូវអង្ករ មានតួនាទីដ៏សំខាន់ក្នុងការរក្សាទីផ្សារ និងតម្លៃសម្រាប់កសិករ។
លោកថ្លែងថា៖ «ចាប់តាំងពីរដ្ឋាភិបាលផ្ដល់កម្ចីតាមរយៈ RDB វាមិនគ្រាន់តែជួយរោងម៉ាស៊ីនកិនស្រូវប៉ុណ្ណោះទេ ប៉ុន្តែថែមទាំងជួយដល់កសិករដោយរក្សាតម្លៃស្រូវ និងទប់ស្កាត់ស្រូវរបស់យើង មិនឲ្យហូរចូលក្រៅផ្លូវការច្រើនទៅប្រទេសជិតខាងផងដែរ»។
លោក ឡាយ ឈុនហួ ស្នើឲ្យរដ្ឋាភិបាលបង្កើនកម្ចីសម្រាប់ឧស្សាហកម្មស្រូវអង្ករ។ លោកថ្លែងថា៖ «ប្រសិនបើរដ្ឋាភិបាលបង្កើនកម្ចីឲ្យដល់ ៣ ដង វានឹងជួយដល់ការប្រមូលផលស្រូវទាំងអស់ ដើម្បីឆ្លើយតបតាមចង្វាក់ផលិតសម្រាប់ការនាំចេញជាមិនខាន»៕LA