ក្រុងសានហ្រ្វានស៊ីស្កូៈ ក្រុមហ៊ុន Samsung កាលពីថ្ងៃពុធ បានដាក់បង្ហាញអេក្រង់ដែលអាចបត់បាន ដែលអាចឲ្យទូរស័ព្ទស្មាតហ្វូនក្លាយជាថេប្ល៊ិតនៅពេលបើកឡើង។
លោក Justin Denison អនុប្រធានជាន់ខ្ពស់ទទួលបន្ទុកផ្នែកទីផ្សារផលិតផលចល័ត បានដកយកគំរូស្មាតហ្វូនដែលអាចបត់បានចេញពីហោប៉ាវអាវធំក្នុងសន្និសីទក្រុមហ៊ុនអភិវឌ្ឍន៍របស់ក្រុមហ៊ុន Samsung នៅទីក្រុងសានហ្វ្រានស៊ីស្កូ ដោយថ្លែងថា ក្រុមហ៊ុននឹងត្រៀមជាស្រេចក្នុងការចាប់ផ្ដើមការផលិតអេក្រង់ក្នុងបរិមាណច្រើននៅក្នុងរយៈពេលប៉ុន្មានខែខាងមុខ។
លោក Denison បានផ្ដល់បទបង្ហាញសង្ខេបអំពីឧបករណ៍គំរូមួយ ដែលបានផលិតឡើងមានបំពាក់ «អេក្រង់ Infinity Flex» របស់ក្រុមហ៊ុន Samsung នៅលើវេទិកាមួយក្នុងអំឡុងពេលធ្វើបទបង្ហាញដ៏សំខាន់មួយ ដោយមិនបានផ្ដល់ព័ត៌មានលម្អិតទាក់ទងនឹងថា តើពេលណាដែលទូរស័ព្ទដែលមានបំពាក់អេក្រង់អាចបត់បាននេះ អាចរកបានសម្រាប់អតិថិជន។
លោក Denison មានប្រសាសន៍ថា៖ «អេក្រង់នេះគឺជាមូលដា្ឋនមួយសម្រាប់ទូរស័ព្ទស្មាតហ្វូននៅថ្ងៃស្អែក»។
លោកបន្តថា៖ «នៅពេលទូរស័ព្ទបើកឡើង វាជាថេប្ល៊ិត ដែលផ្ដល់អេក្រង់ធំ។ នៅពេលបិទវិញ វាក្លាយជាទូរស័ព្ទ និងត្រូវនឹងហោប៉ៅរបស់អ្នក»។
អេក្រង់ Infinity Flex ត្រូវបានផលិតឡើងឲ្យធន់នឹងការបត់ និងបើកឡើងជាច្រើនដង។ នេះបើយោងតាមលោក Denison។
ក្រុមហ៊ុន Samsung ដែលមានមូលដ្ឋាននៅប្រទេស កូរ៉េខាងត្បូង គឺជាក្រុមហ៊ុនផលិតទូរស័ព្ទស្មាតហ្វូនឈានមុខគេរបស់ពិភពលោក ដែលភាគនៃទូរស័ព្ទរបស់ខ្លួនដំណើរការដោយប្រព័ន្ធប្រតិបត្តិការ Android របស់ក្រុមហ៊ុន Google ដែលផ្តល់ដោយមិនគិតថ្លៃ តែក្រុមហ៊ុន Samsung ក៏លក់គ្រឿងផ្គុំផងដែរ ដូចជាបន្ទះឈីប និងអេក្រង់ឲ្យក្រុមហ៊ុនផលិតទូរស័ព្ទផ្សេងទៀត។
ក្រុមហ៊ុន Samsung ក៏បានបង្ហាញផងដែរនូវកម្មវិធីសម្គាល់ផ្ទៃមុខអ្នកប្រើប្រាស់ «One UI» ដែលនឹងបំពាក់ក្នុងឧបករណ៍ចល័តនាពេលអនាគត។ កម្មវិធីនេះបង្កើតឡើងដើម្បីដំណើរការយ៉ាងរលូនជាមួយនឹងអេក្រង់ដែលអាចបត់បានថ្មីនេះ។
ក្រុមហ៊ុន Google កំពុងធ្វើការងារជាមួយក្រុមហ៊ុន Samsung ដើម្បីកែតម្រូវប្រព័ន្ធ Android ទៅនឹងតម្រូវការអេក្រង់ដែលអាចបត់បាននេះ៕ AFP/LA