តូក្យូៈ ក្រុមហ៊ុន SoftBank Group ដែលជាប្រតិបតិ្តករទូរគមនាគមន៍ និងបច្ចេកវិទ្យាឈានមុខគេមានបំណងស្វែងរកមូលនិធិជាង ២៣ ពាន់លានដុល្លារ តាមរយៈការចុះបញ្ជីក្រុមហ៊ុនទូរស័ព្ទចល័តនៅជប៉ុន របស់ខ្លួននៅសប្ដាហ៍ក្រោយ ដែលជាការបោះផ្សាយមូលបត្រជាសាធារណៈលើកដំបូង (IPO) បច្ចេកវិទ្យាធំជាងគេមួយក្នុងរយៈពេលជាច្រើនឆ្នាំ។
នៅក្នុងសេចក្ដីប្រកាសព័ត៌មានមួយកាលពីថ្ងៃចន្ទ ក្រុមហ៊ុននេះបានសម្រេចចិត្តជាផ្លូវការក្នុងការលក់ភាគហ៊ុន ១,៧៦ ពាន់លានភាគហ៊ុន ច្រើនជាង ១ ភាគ ៣ នៃភាគហ៊ុន នៅក្រុមហ៊ុនទូរស័ព្ទ SoftBank Corp ដោយភាគហ៊ុនបានកំណត់តម្លៃ ១,៥០០ យ៉េន (១៣ដុល្លារ) ក្នុង ១ ភាគហ៊ុន។
IPO នេះនឹងជួយរកមូលនិធិសម្រាប់ក្រុមហ៊ុន ខណៈវានឹងប្រែក្លាយទៅជាក្រុមហ៊ុនវិនិយោគមួយ ដែលចាក់បញ្ចូលសាច់ប្រាក់ទៅក្នុងក្រុមហ៊ុន និងគម្រោងលំដាប់ធំៗ ជុំវិញពិភពលោក។
សេចក្ដីប្រកាសព័ត៌មាននេះបានបញ្ជាក់ពីតម្លៃលក់បណ្ដោះអាសន្ន ដែលបានកំណត់កាលពីខែវិច្ឆិកា ទោះបីជាទីផ្សារហ៊ុនបច្ចុប្បន្នត្រូវបានគេលក់ចេញដោយសារមានការបារម្ភជម្លោះពាណិជ្ជកម្មអាមេរិក និងចិន ដែលជាមហាអំណាចសេដ្ឋកិច្ចធំជាងគេរបស់ពិភពលោក និងកិច្ចព្រមព្រៀងចាកចេញរបស់ចក្រភពអង់គ្លេសពីសហភាពអឺរ៉ុប។
បន្ទាប់ពីការចុះបញ្ជីនៅផ្សារហ៊ុនតូក្យូ នៅថ្ងៃទី ១៩ ខែធ្នូ ក្រុមហ៊ុន SoftBank Group នឹងគ្រប់គ្រងក្រុមហ៊ុនទូរស័ព្ទមួយនេះប្រហែល ៦៣ ភាគរយ។
ប្រព័ន្ធព័ត៌មានក្នុងប្រទេស ជប៉ុន បានឲ្យដឹងថា ការផ្តល់ជូនតម្លៃនេះ បានផ្ដល់តម្លៃដល់ក្រុមហ៊ុនទូរស័ព្ទមួយនេះក្នុងចំនួនជាង ៧ ពាន់ពាន់លានយ៉េន ហើយ IPO នេះអាចជា IPO ធំជាងគេមិនធ្លាប់មានរបស់ប្រទេស ជប៉ុន។
ស្ថិតក្រោមការគ្រប់គ្រងលោក Masayoshi Son អគ្គនាយករបស់ខ្លួន ក្រុមហ៊ុន SoftBank Group បានប្រែក្លាយពីការចាប់ផ្ដើមពីផែ្នកសូហ្វវែរ ហើយត្រូវបានគេមើលឃើញថាបានវិវឌ្ឍខ្លាំងឡើងៗជាក្រុមហ៊ុនវិនិយោគមួយ។
ក្រោមការប្រើប្រាស់មូលនិធិ SoftBank Vision Fund ដែលមានតម្លៃប៉ាន់ប្រមាណ ១០០ ពាន់លានដុល្លារ លោក Son ត្រូវបានគ្រប់គ្រងភាគហ៊ុនមួយចំនួនរបស់ក្រុមហ៊ុនដ៏ពេញនិយមជាច្រើន នៅក្នុងវិស័យបច្ចេកវិទ្យា ដែលរួមមានក្រុមហ៊ុន Uber ក្រុមហ៊ុន Slack ក្រុមហ៊ុន WeWork និងក្រុមហ៊ុន Nvidia។
ប្រាក់ជិតពាក់កណ្ដាលនៅក្នុងមូលនិធិនេះ បានមកពីទំនាក់ទំនងដ៏ជិតស្និទ្ធរបស់ប្រទេស អារ៉ាប៊ីសាអ៊ូឌីត និងក្រុមហ៊ុន SoftBank ជាមួយប្រទេស ជប៉ុន បានស្ថិតក្រោមការត្រួតពិនិត្យនៅពេលថ្មីៗ បន្ទាប់ពីការសម្លាប់អ្នកកាសែត Jamal Khashoggi នៅក្នុងស្ថានកុងស៊ុលរបស់អារ៉ាប៊ីសាអូ៊ឌីត នៅទីក្រុងអុីស្ដង់ប៊ុល។
កាលពីខែមុន លោក Son បានថ្កោលទោសការសម្លាប់នេះ ប៉ុន្តែបានឲ្យដឹងថា លោកនឹងបន្តធ្វើពាណិជ្ជកម្មជាមួយអារ៉ាប៊ី សាអ៊ូឌីត។
Uber ជាក្រុមហ៊ុនហៅតាក់ស៊ីជិះ គ្រោងនឹងធ្វើទីផ្សារដំបូងត្រឹមចុងឆ្នាំ ២០១៩ ជាផ្នែកមួយនៃកិច្ចព្រមព្រៀងវិនិយោគ ជាមួយក្រុមហ៊ុន SoftBank ដែលមានភាគហ៊ុនប្រហែល ១៥ ភាគរយ៕ AFP/LA