ក្រុងញូវយ៉កៈ ប្រភពមួយបានប្រាប់ទីភ្នាក់ងារព័ត៌មាន AFP កាលពីថ្ងៃចន្ទថា ក្រុមហ៊ុន SoftBank ដែលមានមូលដ្ឋាននៅប្រទេសជប៉ុនបានត្រៀមខ្លួនរួចរាល់ក្នុងការទិញភាគហ៊ុនមានសិទ្ធិគ្រប់គ្រងនៅក្នុងក្រុមហ៊ុនបង្កើតថ្មី WeWork ដែលផ្ដល់សេវាទីតាំងការិយាល័យរួម និងកំពុងត្រូវការសាច់ប្រាក់ខ្លាំង។
ប្រភពនេះបានឲ្យដឹងដោយស្នើសុំមិនបញ្ចេញឈ្មោះថា ក្រុមហ៊ុន Softbank ត្រៀមខ្លួនរួចរាល់ហើយក្នុងការវិនិយោគទឹកប្រាក់ចំនួនពី ៤ ពាន់លានដុល្លារទៅ ៥ ពាន់លានដុល្លារបន្ថែមក្នុងក្រុមហ៊ុន We-Work ដែលធ្វើឲ្យក្រុមហ៊ុន Softbank កាន់កាប់ភាគហ៊ុនភាគច្រើននៅក្រុមហ៊ុនដែលមានមូលដ្ឋាននៅទីក្រុងញូវយ៉កមួយនេះ ខណៈដែលវាយតម្លៃក្រុមហ៊ុននេះថាមានតម្លៃរួមចំនួន ៨ ពាន់លានដុល្លារ។
ក្រុមហ៊ុន WeWork ដែលបដិសេធអត្ថាធិប្បាយលើបញ្ហានេះត្រូវបានវាយតម្លៃថា មានចំនួនជាង ៤៧ ពាន់លានដុល្លារកាលពីដើមឆ្នាំនេះ។
សំណើរបស់ក្រុមហ៊ុន SoftBank រួមមានការដាក់សំណើក្នុងតម្លៃជាង ១ ពាន់លានដុល្លារ ដើម្បីទិញភាគហ៊ុនជាច្រើនរបស់ក្រុមហ៊ុន WeWork ពីក្រុមវិនិយោគិន និងនិយោជិតដែលក្នុងចំណោមពួកគេក៏មានលោក Adam Neumann ដែលជាសហស្ថាបនិកផងដែរ។
ក្រុមហ៊ុន JPMorgan Chase ដែលជាធនាគារវិនិយោគដែលមានការចាប់អារម្មណ៍រួចហើយលើក្រុមហ៊ុន WeWork នោះត្រូវបានរំពឹងថានឹងមានផែនការហិរញ្ញប្បទានបំណុលសម្រាប់ក្រុមប្រឹក្សាភិបាលរបស់ក្រុមហ៊ុនបង្កើតថ្មីនេះដើម្បីពិចារណានៅក្នុងកិច្ចប្រជុំមួយកាលពីថ្ងៃអង្គារ។ នេះបើយោងតាមប្រភពដដែល។
ក្រុមហ៊ុន WeWork ចាំបាច់ត្រូវប្រមូលមូលនិធិយ៉ាងហោចណាស់ ៣ ពាន់លានដុល្លារដើម្បីរ៉ាប់រងលើតម្រូវការហិរញ្ញប្បទានរបស់ខ្លួនរហូតដល់ចុងឆ្នាំនេះ។ នេះបើយោងតាមប្រភពនានា។
ប្រសិនបើក្រុមហ៊ុន WeWork ជ្រើសរើសយកសំណើទិញរបស់ក្រុមហ៊ុន SoftBank នោះក្រុមហ៊ុនពហុផលិតផលរបស់ជប៉ុនដែលបានដឹកនាំដោយលោកមហាសេដ្ឋី Masayoshi Son នឹងគ្រប់គ្រងភាគហ៊ុនជាង ៨០ ភាគរយរបស់ក្រុមហ៊ុនបង្កើតថ្មីនេះ។
កិច្ចព្រមព្រៀងនេះក៏នឹងដាក់កម្រិតឥទ្ធិពលរបស់លោក Neumann អតីតប្រធានប្រតិបត្តិ និងជាសហស្ថាបនិកផងដែរ។
លោក Neumann បានចុះចេញពីតំណែងជាប្រធានប្រតិបត្តិកាលពីខែកញ្ញា ដោយសារតែមានសំណួរជុំវិញការដោះស្រាយដោយខ្លួនឯងរវាងទ្រព្យសកម្មផ្ទាល់ខ្លួនរបស់លោក និងរបស់ក្រុមហ៊ុន WeWork និងជុំវិញការប្រព្រឹត្តផ្ទាល់ខ្លួនមិនល្អដែលរួមទាំងការប្រើប្រាស់ថ្នាំផងដែរ។
ក្រុមហ៊ុន WeWork ក៏បានបញ្ឈប់ផែនការក្នុងការបោះផ្សាយមូលបត្រជាសាធារណៈលើកដំបូង (IPO) ផងដែរ ដែលបានបញ្ចប់ផ្លូវហិរញ្ញប្បទានដ៏សំខាន់មួយ។
ក្រុមហ៊ុនវាយតម្លៃចំណាត់ថ្នាក់បំណុលអន្តរជាតិនានាបានទម្លាក់ចំណាត់ថ្នាក់បំណុលរបស់ក្រុមហ៊ុន WeWork ដល់ «ចំណាត់ថ្នាក់មិនល្អ (Junk)” ដោយសារកង្វះខាតសាច់ប្រាក់។ ក្រុមហ៊ុនបានរាយការណ៍ការខាតបង់ចំនួន ១,៩ ពាន់លានដុល្លារនៅឆ្នាំ ២០១៨ ខណៈក្រុមហ៊ុនបានពង្រីកខ្លួនយ៉ាងលឿន៕ LA