ក្រុងហ្វ្រែងហ្វឺតៈ ក្រុមហ៊ុន Volkswagen (VW) បានឲ្យដឹងកាលពីថ្ងៃអង្គារថា ខ្លួនបានបញ្ឈប់ភាពជាដៃគូជាមួយក្រុមហ៊ុនទើបបង្កើតថ្មី Aurora របស់អាមេរិក ដែលអភិវឌ្ឍរថយន្តស្វ័យបើកបរ ខណៈដែលក្រុមហ៊ុនស្វែងរកសម្ព័ន្ធភាពកាន់តែទូលំទូលាយជាមួយក្រុមហ៊ុន Ford។
ដោយបញ្ជាក់ព័ត៌មានដែលរាយការណ៍លើកដំបូងដោយកាសែត Financial Times (FT) អ្នកនាំពាក្យក្រុមហ៊ុនផលិតរថយន្ត VW បានប្រាប់ ទីភ្នាក់ងារព័ត៌មាន AFP ថា៖ «សកម្មភាពស្ថិតក្រោមភាពជាដៃគូនេះ ត្រូវបានបញ្ចប់»។
លោកបន្ថែមថា ផែនការសម្រាប់កិច្ចសហប្រតិបត្តិការជាមួយក្រុមហ៊ុន Ford «កំពុងរីកចម្រើនយ៉ាងល្អ»។
យោងតាមសេចក្ដីរាយការណ៍របស់កាសែត FT ក្រុមហ៊ុន VW កំពុងស្វែងរកការធ្វើការងារជាមួយក្រុមហ៊ុន Argo AI ដែលជាអង្គភាពអាជីវកម្មស្វ័យបើកបររបស់ក្រុមហ៊ុន Ford ដើម្បីជំរុញឆ្ពោះទៅរកវិស័យដែលទើបនឹងចាប់ផ្ដើម ប៉ុន្តែជាវិស័យថ្មីដ៏សំខាន់ ដែលកិច្ចព្រមព្រៀងមួយអាចត្រូវបានប្រកាសក្នុងរយៈពេល ២-៣ សប្ដាហ៍ក្រោយ។ នេះបើយោងតាមកាសែត FT។
ក្រុមហ៊ុនផលិតរថយន្តរបស់ប្រទេស អាល្លឺម៉ង់ និងអាមេរិកទាំង ២ នេះ បានប្រកាសកាលពីខែមករាថា ពួកគេនឹងរួមគ្នាផលិតរថយន្តពាណិជ្ជកម្ម និងរថយន្តភីកអាប់ធុនមធ្យមនឹងថា ពួកគេនឹងធ្វើការងាររួមគ្នាលើរថយន្តស្វ័យបើកបរ។
ក្រុមហ៊ុន Aurora ដែលត្រូវបានបង្កើតឡើងដោយអតីតមន្ដ្រីប្រតិបត្តិមកពីក្រុមហ៊ុន Google, Tesla និង Uber ជាមួយចក្ខុវិស័យក្នុងការផ្ដល់ថាមពលក្នុងវិស័យរថយន្តស្វ័យបើកបរ បានទាក់ទាញក្រុមហ៊ុនផលិតរថយន្ត ក្រុមហ៊ុនបច្ចេកវិទ្យា និងក្រុមហ៊ុនផ្សេងៗទៀតឲ្យចូលវិនិយោគក្នុងវិស័យនេះ៕ AFP/LA