.jpg)
ឡូហ្គោ VW នៅបញ្ជរក្នុងពិព័រណ៍រថយន្តនៅក្រុងប្រ៊ុចសែល។ AFP
ក្រុង ហ្វ្រេងហ្វឺតៈ ក្រុមហ៊ុន ផលិតរថយន្ត Volkswagen (VW) បានឲ្យដឹងកាលពីថ្ងៃសុក្រសប្តាហ៍មុនថា ខ្លួនបានផ្ដល់ប្រាក់ ៨៣០ លានអឺរ៉ូ (៩០០ លានដុល្លារ) ដើម្បីដោះស្រាយបណ្ដឹងចំនួនច្រើនពីអតិថិជនអាល្លឺម៉ង់ ជុំវិញរឿងអាស្រូវក្លែងបន្លំការបំភាយឧស្ម័នរបស់រថយន្ត។
អ្នកនាំពាក្យក្រុមហ៊ុន VW បន្ថែមថា ប៉ុន្តែការដោះស្រាយដែលត្រូវបានស្នើឡើងជាមួយសហព័ន្ធអ្នកប្រើប្រាស់អាល្លឺម៉ង់ (VZBV) ដែលតំណាងដើមបណ្ដឹងចំនួន ៤០០ ០០០ នាក់នៅក្នុងដំណើរការបណ្តឹងជាក្រុមដំបូងរបស់ខ្លួន «បានបរាជ័យ» ដោយសារតែការទាមទារប្រាក់ «ដោយមិនមានសមាមាត្រ» ពីក្រុមមេធាវីរបស់ក្រុមហ៊ុន VZBV ។
លោកបញ្ជាក់ថា អ្នកតំណាងផ្នែកច្បាប់របស់សហព័ន្ធអ្នកប្រើប្រាស់នេះ បានស្នើសុំទឹកប្រាក់សរុប ៥០ លានអឺរ៉ូ។
សហព័ន្ធ VZBV ភា្លមៗមិនបានអត្ថាធិប្បាយលើការផ្ដល់ដំណោះស្រាយនេះទេ។
តម្លៃភាគហ៊ុនរបស់ក្រុមហ៊ុន Volkswagen បានប្រែប្រួលបន្តិចបន្តួច ដោយតាមសេចក្ដីប្រកាសនេះបានធ្លាក់ចុះ ០,៥ ភាគរយ នៅថ្ងៃសុក្រសប្តាហ៍មុនដោយជួញដូរក្នុងតម្លៃ ១៧១,៧០ អឺរ៉ូ ក្នុង ១ ហ៊ុន នៅផ្សារហ៊ុន Frankfurt ធៀបនឹងសន្ទស្សន៍ DAX ដែលប្រមូលផ្តុំដោយក្រុមហ៊ុនធំៗរបស់អាល្លឺម៉ង់ កើនឡើង ០, ២៥ ភាគរយ។
បណ្ដឹងជាក្រុមនេះគឺជាបញ្ហាមួយក្នុងចំណោមបញ្ហាផ្លូវច្បាប់ដ៏ធំមួយដែលកើតចេញពីការសារភាពកាលពីឆ្នាំ ២០១៥ របស់ក្រុមហ៊ុន VW ថាបានបំពាក់ឧបករណ៍ និងសូហ្វវែរបន្លំការធ្វើតេស្តបញ្ចេញកាបូនលើរថយន្ត ១១ លានគ្រឿងទូទាំងពិភពលោក។ រថយន្តដែលត្រូវបានបំពាក់សូហ្វវែរនេះនឹងបញ្ចេញឧស្ម័នកាបូនតិចជាងជាក់ស្តែងនៅពេលធ្វើតេស្តដោយនិយតករ។
ខណៈពេលដែលអ្នកទិញរថយន្តម៉ាស៊ូតនៅអាមេរិកទទួលបានការទិញរថយន្តវិញ និងសំណងជំងឺចិត្ត ក្រុមអ្នកបើកបរនៅប្រទេសអាល្លឺម៉ង់រហូតមកដល់ពេលនេះបានកន្លងហួសដោយមិនបានសងជំងឺចិត្តសម្រាប់ផលប៉ះពាល់ដោយសារតែរឿងអាស្រូវនេះឡើយ៕ LA
