វ៉ាស៊ីនតោនៈ ធនាគារពិភពលោកបានឲ្យដឹងកាលពីថ្ងៃពុធថា គំនិតផ្តួចផ្ដើមខ្សែក្រវាត់ និងផ្លូវ (BRI) របស់ប្រទេសអាចបង្កើនសេដ្ឋកិច្ច និងកាត់បន្ថយអត្រាភាពក្រីក្រ នៅក្នុងបណ្ដាប្រទេសកំពុងអភិវឌ្ឍន៍ជាច្រើន ប៉ុន្តែផ្តល់នូវហានិភ័យនៃការខូចខាតបរិស្ថាន បំណុល និងអំពើពុករលួយ បើការកែលម្អមិនត្រូវបានធ្វើឡើង។
គោលនយោបាយបរទេសដែលចុះហត្ថលេខាដោយលោកប្រធានាធិបតី ស៊ី ជីនភីង មានបំណងក្នុងការបង្កើតឡើងវិញផ្លូវសូត្របុរាណ ដើម្បីតភ្ជាប់អាស៊ីទៅអឺរ៉ុប និងអាហ្រ្វិ តាមរយៈការវិនិយោគជាច្រើនលើគម្រោងផ្លូវសមុទ្រ ផ្លូវថ្នល់ និងផ្លូវដែក ជាមួយនឹងតម្លៃច្រើនពាន់លានដុល្លារ ដែលជាការផ្ដល់ហិរញ្ញប្បទានពីធនាគារចិន។
ប៉ុន្តែក្រុមអ្នករិះគន់ឲ្យដឹងថា BRI ដែលមានអាយុ ៦ ឆ្នាំ មកហើយនោះ គឺជាផែនការមួយដើម្បីបង្កើនឥទ្ធិពលលើពិភពលោករបស់ទីក្រុងប៉េកាំង ដែលពោរពេញដោយកិច្ចព្រមព្រៀងដ៏ពិបាកយល់ដែលគាំទ្រក្រុមហ៊ុនរបស់ប្រទេស ចិន ហើយនឹងដាក់បន្ទុកលើប្រទេសនានាជាមួយនឹងបំណុល និងការខូចខាតបរិស្ថាន។
របាយការណ៍ «សេដ្ឋកិច្ចខ្សែក្រវាត់ និងផ្លូវ» របស់ធនាគារពិភពលោកបានឲ្យដឹងថា គម្រោងនេះ មាន «សក្ដានុពលដើម្បីកែលម្អពាណិជ្ជកម្ម ការវិនិយោគបរទេស និងលក្ខខណ្ឌរស់នៅប្រកបដោយស្ថិរភាព» ប៉ុន្តែលុះត្រាតែប្រទេស ចិន និងបណ្ដាប្រទេសច្រករបៀងនានាធ្វើកំណែទម្រង់គោលនយោបាយ ដើម្បីកែលម្អតម្លាភាព ពង្រីកពាណិជ្ជកម្ម និងកាត់បន្ថយការប្រឆាំងនឹងហានិភ័យបរិស្ថាន និងអំពើពុករលួយ។
ខណៈពាណិជ្ជកម្មនឹងកើនឡើងយ៉ាងខ្លាំង ការទទួលបានសក្ដានុពលកំណើន នឹងស្របគ្នានឹងហានិភ័យដ៏ធំ។ នេះបើយោងតាមលោកស្រី Ceyla Pazarbasioglu អនុប្រធានធនាគារពិភពលោក។
របាយការណ៍បានប៉ាន់ប្រមាណថា BRI នឹងបង្កើនពាណិជ្ជកម្មពី ២,៨ ដល់ ៩,៧ ភាគរយ សម្រាប់បណ្ដាប្រទេសដែលចូលរួម និងចន្លោះពី ១,៧ ភាគរយ ទៅ ៦,២ ភាគរយ សម្រាប់ពិភពលោក។ ប៉ុន្តែការសិក្សាមួយបានរកឃើញថា ប្រហែលជា ១ ភាគ ៤ នៃប្រទេសទាំងនោះមានកម្រិតបំណុលខ្ពស់រួចហើយ ហើយសម្រាប់ប្រទេសខ្លះក្នុងចំណោមប្រទេសទាំងនោះ «ភាពងាយទទួលរងគ្រោះរយៈពេលមធ្យមអាចកើនឡើង»។
របាយការណ៍នេះ បានឲ្យដឹងថា គម្រោងហេដ្ឋារចនាសម្ព័ន្ធជាច្រើន «ត្រូវភ្ជាប់ដោយហានិភ័យ» ដោយសារតែគម្រោងទាំងនោះអាចបង្កើតឲ្យមានអំពើពុករលួយ និងការបរាជ័យលើលទ្ធកម្មសាធារណៈ។
ទាំងនេះធ្វើឲ្យអាមេរិក ឥណ្ឌា និងប្រទេសអឺរ៉ុបមួយចំនួនសម្លឹងមើលទៅគម្រោងនេះដោយការសង្ស័យ។
ការសិក្សារបស់ធនាគារពិភពលោកបានរកឃើញថា ភាគច្រើននៃកិច្ចព្រមព្រៀង BRI អនុវត្តដោយក្រុមហ៊ុនចិន។ របាយការណ៍នេះឲ្យដឹងថា ជាង ៦០ ភាគរយ នៃគម្រោង BRI ដែលផ្ដល់មូលនិធិដោយប្រទេស ចិន ត្រូវបានលៃទុកដើម្បីក្រុមហ៊ុនរបស់ចិន។
របាយការណ៍បានឲ្យដឹងថា៖ «តិចតួចណាស់ត្រូវបានដឹងអំពីនីតិវិធីសម្រាប់ការជ្រើសរើសក្រុមហ៊ុនទាំងនេះ»។ ធនាគារនេះបន្តថា៖ «ការឆ្ពោះទៅមុខដើម្បីអនុវត្តល្អជាអន្តរជាតិ ដូចជាលទ្ធកម្មសាធារណៈប្រកបដោយការបើកចំហ និងតម្លាភាព នឹងបង្កើនជីវភាពរស់នៅដែលគម្រោង BRI ត្រូវបានបម្រុងទុក ដើម្បីក្រុមហ៊ុនដែលជាប់ចំណាត់ថ្នាក់ល្អបំផុតជាច្រើន អនុវត្តគម្រោងទាំងនេះ»៕AFP/LA