.jpg)
លោក ឈៀង យ៉ាណា (កណ្ដាល) អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍នៃក្រុមប្រឹក្សាអភិវឌ្ឍន៍កម្ពុជា។ ហ្វេសប៊ុក
ភ្នំពេញៈ កម្ពុជា និងសហភាពអឺរ៉ុបបានពិភាក្សាគ្នាដើម្បីបន្តការអនុវត្តកម្មវិធីយុទ្ធសាស្ត្ររួមរបស់អឺរ៉ុប ស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជារយៈពេល ១០ ឆ្នាំទៀត។ នេះបើតាមសេចក្តីប្រកាសព័ត៌មាន។
ក្នុងជំនួបរវាងលោក ឈៀង យ៉ាណា អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍នៃក្រុមប្រឹក្សាអភិវឌ្ឍន៍កម្ពុជា ជាមួយលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជាកាលពីថ្ងៃទី ១១ មិថុនា ភាគីទាំង ២ បានពិភាក្សាពីការត្រៀមរៀបចំយុទ្ធសាស្ត្ររួមថ្មីរបស់សហភាពអឺរ៉ុបស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា សម្រាប់រយៈពេលមធ្យម ៧ ទៅ ១០ ឆ្នាំទៀត ដោយផ្តោតលើការអនុវត្តគោលដៅអភិវឌ្ឍន៍ប្រកបដោយចីរភាពកម្ពុជា និងការចាកផុតពីប្រទេសមានការអភិវឌ្ឍតិចតួច។
សេចក្តីប្រកាសព័ត៌មាន បានឲ្យដឹងថា៖ «យុទ្ធសាស្ត្ររួមថ្មីរបស់អឺរ៉ុបនេះ នឹងបន្តអនុវត្ត និងពង្រឹងបន្ថែមលើភាពជោគជ័យ ដែលសម្រេចបានដោយយុទ្ធសាស្ត្រអឺរ៉ុបឆ្នាំ ២០១៤-២០១៩»។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា សហភាពអឺរ៉ុបបានផ្តល់ហិរញ្ញប្បទានដល់កម្ពុជាប្រហែល១ ១៣០ លានដុល្លារសម្រាប់កម្មវិធីយុទ្ធសាស្ត្ររួមរបស់អឺរ៉ុបស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា ២០១៤-២០១៩ ក្នុងចំនួនទឹកប្រាក់ ៨១៨ លានដុល្លារ ជាជំនួយឥតសំណង និង ៣១១ លានដុល្លារ ជាកម្ចីសម្បទាន៕ ភ្នំពេញ ប៉ុស្តិ៍ /LA
