ភ្នំពេញៈ កម្ពុជា នឹងចុះកិច្ចព្រមព្រៀងជាមួយប្រទេស ចិន នៅសប្ដាហ៍ក្រោយដើម្បីនាំចូលអំបិលចំនួន ៣០ ០០០ តោនមកកម្ពុជានៅចុងខែវិច្ឆិកា។ នេះបើតាមសហប្រធានសហគមន៍អ្នកផលិតអំបិល កែប កំពត (KKSPC)។
លោក លី សេង សហប្រធាន KKSPC បានប្រាប់ភ្នំពេញប៉ុស្ដិ៍កាលពីម្សិលមិញថា សហគមន៍នេះទទួលបានការយល់ព្រមពីក្រសួងឧស្សាហកម្មរួចហើយកាលពីសប្ដាហ៍មុន ដើម្បីនាំចូលអំបិលពីប្រទេស ចិន។
លោកឲ្យដឹងថា ក្រុមការងាររបស់សហគមន៍នេះ នឹងធ្វើដំណើរទៅប្រទេស ចិន ហើយការចុះកិច្ចព្រមព្រៀងនឹងធ្វើឡើងនៅថ្ងៃទី ២៥ ខែតុលា។
លោកបន្តថា យោងតាមផែនការនេះ អំបិលចំនួន ៣០ ០០០ តោន នឹងត្រូវបានបញ្ជូនមកកម្ពុជានៅចុងខែវិច្ឆិកា។
លោកថ្លែងថា៖ «យើងទទួលបានការយល់ព្រមរួចហើយពីក្រសួងឧស្សាហកម្ម សម្រាប់ការនាំចូលអំបិល ៣០ ០០០ តោន នេះជាលើកទី ២ ហើយសម្រាប់ការនាំចូលអំបិលរបស់កម្ពុជា»។
នេះជាលើកទី ២ ហើយដែលប្រទេស កម្ពុជា នាំចូលអំបិលពីប្រទេស ចិន។ កម្ពុជាធ្លាប់បានចំណាយប្រាក់ ២,២ លានដុល្លារក្នុងការនាំចូលអំបិល ២០ ០០០ តោនពីប្រទេស ចិន កាលពីឆ្នាំ ២០០៩។
KKSPC បានប្រកាសកាលពីដើមឆ្នាំនេះថា កម្ពុជាមិនអាចផលិតអំបិលគ្រប់គ្រាន់ ដើម្បីឆ្លើយតបតាមតម្រូវការក្នុងស្រុកបានទេ ដោយសារតែបញ្ហាអាកាសធាតុ។
លោក លី សេង បានឲ្យដឹងថា ភ្លៀងធ្លាក់ច្រើនបានរារាំងដល់ឧស្សាហកម្មអំបិល ដែលធ្វើឲ្យអ្នកផលិតអំបិលមិនអាចប្រមូលអំបិលពីស្រែអំបិលនោះទេ ហើយបានបង្ខំឲ្យឧស្សាហកម្មនេះត្រូវនាំចូលជាលើកទី ២។
លោកថ្លែងថា៖ «យើងសម្រេចចិត្តជ្រើសរើសប្រទេស ចិន ជាថ្មីម្ដងទៀត ដោយសារតែវាជាអំបិលធម្មជាតិ និងមានគុណភាពដូចអំបិលរបស់យើង យើងត្រូវការការនាំចូលអំបិលមានគុណភាព ដើម្បីឆ្លើយតបការប្រើប្រាស់ក្នុងស្រុក»។
លោក លី សេង បានឲ្យដឹងថា តម្លៃនៃកិច្ចព្រមព្រៀងនេះនឹងត្រូវបង្ហាញនៅថ្ងៃចុះហត្ថលេខា។
កម្ពុជាមានស្រែអំបិលជាង ៤ ៦០០ ហិកតា នៅក្នុងខេត្តកំពតនិងខេត្ត កែប ដោយមានកសិករធ្វើអំបិលជាង ២០០ គ្រួសារ។ រដូវប្រមូលផលអំបិលមានរយៈពេលចាប់ពីខែមករា ដល់ចុងខែមេសា។
ទិន្នន័យការផលិតអំបិលរបស់ខេត្ត កំពត និងខេត្ត កែប បង្ហាញថា កាលពីឆ្នាំមុន សហគមន៍នេះផលិតអំបិលបាន ៣៣ ០០០ តោន និងជាង ១០ ម៉ឺន តោនពីឆ្នាំ ២០១៦។
បច្ចុប្បន្នកម្ពុជានៅសល់អំបិលប្រហែល ៨ ០០០ តោន នៅក្នុងស្ដុក ដែលលក់ចេញទៅកាន់ទីផ្សារក្នុងតម្លៃ ៧៥ ដុល្លារក្នុង ១ តោន ខ្ពស់ជាងកាលពីឆ្នាំមុនដែលមានតម្លៃ ៥២ ដុល្លារក្នុង ១ តោន។ នេះបើតាមលោក លី សេង។
ឧស្សាហកម្មអំបិលរបស់កម្ពុជា រកបានប្រាក់ចំណូលប្រហែល ២២ លានដុល្លារកាលពីឆ្នាំមុន។ នេះបើយោងតាមទិន្នន័យពីក្រសួងឧស្សាហកម្ម និងសិប្បកម្ម៕LA