ភ្នំពេញៈ កម្ពុជា និងប្រទេស នេប៉ាល់ បានសម្រេចកិច្ចព្រមព្រៀងតភ្ជាប់ផ្លូវអាកាសរវាងប្រទេសទាំង ២ ដែលនឹងអនុញ្ញាតឲ្យមានការហោះហើរចំនួន ១៤ លើកក្នុង ១ សប្តាហ៍សម្រាប់ការដឹកជញ្ជូនអ្នកដំណើរ។ នេះបើយោងតាមអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា។
កិច្ចព្រមព្រៀងនេះត្រូវបានធ្វើឡើងនៅក្នុងអំឡុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ទីក្រុងកាត់ថ្មាន់ឌូ ប្រទេស នេប៉ាល់ រយៈពេល ៣ ថ្ងៃកាលពីសប្តាហ៍មុន និងការចូលរួមកិច្ចប្រជុំកំពូលអាស៊ីប៉ាស៊ីហ្វិក។
លោក ស៊ិន ចាន់សិរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានឲ្យដឹងថា នេប៉ាល់ បានក្លាយជាប្រទេសទី ៤៥ ដែលកម្ពុជាចុះកិច្ចព្រមព្រៀងបើកផ្លូវអាកាស ខណៈកន្លងមកភ្ញៀវដែលធ្វើដំណើររវាងប្រទេសទាំង ២ ភាគច្រើនត្រូវឆ្លងកាត់តាមប្រទេស ថៃ ម៉ាឡេស៊ី ឬសិង្ហបុរី។
លោក ចាន់សិរីវុត្ថា បាននិយាយថា ការចុះកិច្ចព្រមព្រៀងនេះ គឺជាការបើកផ្លូវឲ្យក្រុមហ៊ុនអាកាសចរនានាធ្វើការសិក្សាទីផ្សារ មុនពេលឈានទៅបើកការហោះហើរដោយផ្ទាល់ជាមួយគ្នា។
លោកថ្លែងថា៖ «ការហោះហើរត្រង់រវាង កម្ពុជា-នេប៉ាល់ វាអាស្រ័យលើទីផ្សារ បើទីផ្សារធំ មានអតិថិជនច្រើន គេអាចហោះហើររវាងគ្នាដោយផ្ទាល់ តែបើមិនដូច្នោះទេ គេអាចធ្វើដូចជើងហោះហើររវាងកម្ពុជា ជាមួយប្រទេស កាតា និងអេមីរ៉ាតអារ៉ាប់រួម ដោយយន្តហោះត្រូវចុះចតនៅប្រទេសណាមួយ មុនបន្តដំណើរមកកម្ពុជា»។
លោកបន្តថា ការហោះហើរអាចចាប់ផ្តើមនៅ ៣ ខែក្រោយ បន្ទាប់ពីមាន កិច្ចព្រមព្រៀង។ ទោះបីយ៉ាងនេះក្តី អ្វីៗវាអាស្រ័យទៅលើការងារជាក់ស្តែងផងដែរ ពិសេសបញ្ហាទីផ្សារ។
នេប៉ាល់ ជាប្រទេសស្ថិតនៅអាស៊ីខាងត្បូង ដែលមានព្រំប្រទល់ជាប់ប្រទេសធំៗ ២ គឺចិន និងឥណ្ឌា ដោយមានប្រជាជនជិត ៣០ លាននាក់។
លោកស្រី ឆាយ ស៊ីលីន ប្រធានសមាគមទីភ្នាក់ងារទេសចរណ៍កម្ពុជា បានស្វាគមន៍ចំពោះការតភ្ជាប់ផ្លូវអាកាសជាមួយប្រទេស នេប៉ាល់ ព្រោះវានឹងអាចជួយធ្វើឲ្យវិស័យទេសចរណ៍រវាងប្រទេសទាំង ២ កាន់តែមានភាពរីកចម្រើនបន្ថែមទៀត។
លោកស្រីថ្លែងថា៖ «បើការហោះហើរត្រង់ចាប់ផ្តើមនោះ នឹងមានវិនិយោគិនទៅវិនិយោគនៅប្រទេសទាំង ២ ពិសេសវិស័យទេសចរណ៍»។
កន្លងមកសមាគមទីភ្នាក់ងារទេសចរណ៍កម្ពុជា ក៏ធ្លាប់ធ្វើកិច្ចព្រមព្រៀងជាមួយសមាគមទេសចរណ៍នេប៉ាល់ផងដែរ ដើម្បីជួយផ្សព្វផ្សាយពីសក្តានុពល និងទាក់ទាញភ្ញៀវទេសចរឲ្យធ្វើដំណើរទៅកម្សាន្តប្រទេសទាំង ២។
ការធ្វើដំណើររបស់ប្រជាជនខ្មែរទៅប្រទេស នេប៉ាល់ មិនមានចំនួនច្រើនទេ ដោយការធ្វើដំណើរទៅទីនោះភាគច្រើន គឺទៅកន្លែងគោរពប្រតិបត្តិព្រះពុទ្ធសាសនា និងខ្លះទៀតទៅកម្សាន្តបែប ផ្សងព្រេង (Adventure)។ ចំណែកភ្ញៀវទេសចរជនជាតិនេប៉ាល់ មកកម្ពុជាភាគច្រើនក្នុងគោលបំណងទេសចរណ៍។
របាយការណ៍របស់រដ្ឋលេខាធិការដ្ឋានអាកាសចរស៊ីវិល បានឲ្យដឹងថា គិតត្រឹមខែកញ្ញា ឆ្នាំ ២០១៨ អាកាសយានដ្ឋានអន្តរជាតិទាំង ៣ របស់កម្ពុជាទទួលបានកំណើនភ្ញៀវទេសចរជាង ២១ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៧។
ទិន្នន័យផ្លូវការពីក្រសួងទេសចរណ៍បានឲ្យដឹងថា នៅក្នុងរយៈពេល ៨ ខែដំបូងឆ្នាំ ២០១៨ កម្ពុជាទទួលបានភ្ញៀវទេសចរបរទេស ៣៩៤៩,៧៥៩ នាក់កើនឡើង ១១,៧ ភាគរយបើធៀបនឹងរយៈពេលដូចគ្នាកាលពីឆ្នាំមុន ដែលនាំមុខដោយភ្ញៀវទេសចរជនជាតិ ចិន និងវៀតណាម។
តាមការព្យាករនៅឆ្នាំ ២០១៨ នេះ កម្ពុជានឹងទទួលបានទេសចរបរទេសប្រមាណ ៦,២ លាននាក់ នៅឆ្នាំ ២០២០ នឹងទទួលបាន ៧ លាននាក់ ខណៈឆ្នាំ ២០៣០ នឹងទទួលបានទេសចរបរទេស ១៤ លាននាក់៕LA