.jpg)
ទិដ្ឋភាពនៃការប្រមូលផលនេសាទទឹកសាប នៅក្នុងបឹងទន្លេសាប នាពេលកន្លងមក។ រូបថត Chhut Chheana/Wonders of the Mekong
ភ្នំពេញៈ កម្ពុជាប្រមូលប្រាក់ចំណូលពីសេវានានាក្នុងវិស័យជលផលបានជាង ៣២ ម៉ឺនដុល្លារក្នុងរយៈពេល ៩ ខែនៃឆ្នាំនេះ ខណៈចំណូលសួយសារពីវិស័យព្រៃឈើបានជិត ៤ លានដុល្លារ។ នេះបើតាមទិន្នន័យបានពីក្រសួងកសិកម្ម។
របាយការណ៍បានបង្ហាញថា នៅក្នុងវិស័យជលផល កម្ពុជា បាននាំចេញផលិតផលនេសាទស្រស់ជាង ១០ ០០០ តោន កើនឡើង ២០០ តោនធៀបនឹងរយៈពេលដូចគ្នាកាលពីឆ្នាំមុន។
ទិន្នន័យបង្ហាញថា ការនាំចេញផលនេសាទបានចំនួន ១១ ០៣០ តោន ក្នុងចំណោមនោះផលិតផលកែច្នៃមានចំនួន ៣ ៩៧០ តោន។ រដ្ឋាភិបាលកំណត់ទិសដៅនាំចេញផលទឹកសាប ២០ ០០០តោនក្នុងឆ្នាំ ២០១៨។ នេះបើយោងតាមរបាយការណ៍។
ខណៈរបាយការណ៍មិនបានបង្ហាញតម្លៃនាំចេញដូចនឹងវិស័យព្រៃឈើដែរនោះ រដ្ឋាភិបាលបានប្រមូលចំណូលបានពីតម្លៃសេវាពីវិស័យជលផលបាន ៣២១ ៣០៤ ដុល្លារក្នុងអំឡុងពេលនេះ។
ផែនការប្រចាំឆ្នាំរបស់រដ្ឋាភិបាល នឹងត្រូវប្រមូលចំណូល ៧៥២ ២៤៩ ដុល្លារពីសេវានានាក្នុងវិស័យជលផល នៅឆ្នាំនេះ ធ្លាក់ចុះពី ៣១៥ ដុល្លារធៀបនឹងឆ្នាំមុន។ នេះបើយោងតាមរបាយការណ៍។
លោក ស្រី វុឌ្ឍី អ្នកនាំពាក្យក្រសួងកសិកម្មបានឲ្យដឹងថា ប្រាក់ចំណូលពីវិស័យជលផល និងព្រៃឈើ គឺជាផ្នែកមួយនៃចំណូលសម្រាប់ថវិកាជាតិ ដែលបានពីការផាកពិន័យ ឬតម្លៃសេវាពីការធ្វើជំនួញនៅក្នុងវិស័យនេះ។
លោកថ្លែងថា៖ «ប្រាក់ចំណូលធ្លាក់ចុះបន្តិច ដោយសារបទឧក្រិដ្ឋនេសាទខុសច្បាប់បានធ្លាក់ចុះ ដូច្នេះតម្លៃផាកពិន័យក៏ធ្លាក់ចុះផងដែរ»។ លោកបន្តថា ការនាំចេញផលិតផលនេសាទនឹងកើនឡើងត្រឹមខែធ្នូ បន្ទាប់ពីរដូវនេសាទ។
របាយការណ៍ដដែលក៏បានបង្ហាញដែរថា រដ្ឋាភិបាលប្រមូលប្រាក់ចំណូល សួយសារជាង ៣,៨លានដុល្លារ ពីវិស័យព្រៃឈើក្នុងអំឡុងពេលនេះ ទោះបីមិនបានផ្ដល់ទិន្នន័យឆ្នាំ ២០១៧ សម្រាប់ការប្រៀបធៀបក៏ដោយ។
ប៉ុន្តែតួលេខកាលពីឆ្នាំ ២០១៦ បង្ហាញថា រដ្ឋាភិបាលប្រមូលចំណូលសួយសារដូចគ្នានេះបានជាង ៣ លានដុល្លារដែរ។ របាយការណ៍នេះមិនបានកត់ត្រា ចំណូលបានពីការនាំចេញផលិតផលព្រៃឈើនោះទេ។
ទាក់ទងនឹងវិស័យព្រៃឈើ លោក វុឌ្ឍី បានឲ្យដឹងថា ទិន្នន័យនេះស្ថិតក្រោមនាយកដ្ឋានរុក្ខាប្រមាញ់ ដោយលោកមិនមានឯកសារពេញលេញនោះទេ។
លោកបានបន្តថា៖ «យើងត្រូវការស្នើសុំនៅក្នុងនាយកដ្ឋានរុក្ខាប្រមាញ់ ដើម្បីទទួលបានព័ត៌មានច្បាស់លាស់សម្រាប់ការប្រៀបធៀប»។
ភ្នំពេញប៉ុស្ដិ៍បានរាយការណ៍កាលពីដើមឆ្នាំ ២០១៨ ថា ទោះបីជាការហាមឃាត់លើការនាំចេញឈើ និងការប្រកាសម្ដងហើយម្ដងទៀតរបស់រដ្ឋាភិបាលថា ការកាប់ឈើ «ទ្រង់ទ្រាយធំ» ត្រូវបានបញ្ឈប់ក៏ដោយ ក៏ទិន្នន័យគយវៀតណាមដែលប្រមូលដោយអង្គការឃ្លាំមើល Forest Trends បានបង្ហាញការកើនឡើងខ្លាំងក្នុងការនាំចេញឈើហុបពីកម្ពុជា និងឈើអារទៅវៀតណាម កាលពីឆ្នាំ ២០១៧។
ទិន្នន័យនេះបង្ហាញថា ឈើហុបកម្ពុជាប្រហែល ១៦៣ ០៧១ ម៉ែត្រគុប ត្រូវបាននាំចេញទៅវៀតណាម កាលពីឆ្នាំ ២០១៧ កើនឡើង ១៧ ភាគរយធៀបនឹងឆ្នាំមុនហ្នឹង។ តម្លៃការនាំចេញកើនឡើង ២១ ភាគរយដល់ ៤០ លានដុល្លារ៕LA
