ក្រុងដូហាៈ ប្រទេស កាតា កាលពីថ្ងៃពុធបានរិះគន់ប្រទេស អេមីរ៉ាតអារ៉ាប់រួម បន្ទាប់ពីអង្គការពាណិជ្ជកម្មពិភពលោក (WTO) បានយល់ព្រមស៊ើបអង្កេតបណ្ដឹងមួយដែលដាក់ដោយអេមីរ៉ាតអារ៉ាប់រួម ជុំវិញការចោទប្រកាន់ពីបទរឹតបន្តឹងលើទំនិញរបស់ខ្លួន។
អេមីរ៉ាតអារ៉ាប់រួមដែលបានប្តឹងទៅកាន់គណៈកម្មការដោះស្រាយវិវាទរបស់អង្គការ WTO រួមជាមួយប្រទេស អារ៉ាប៊ីសាអ៊ូឌីត និងសម្ព័ន្ធមិត្តក្នុងតំបន់ផ្សេងទៀត កំពុងអនុវត្តការហ៊ុមព័ទ្ធសេដ្ឋកិច្ចទាំងស្រុងទៅលើប្រទេស កាតា។
ប្លុកដែលអនុវត្តការហ៊ុមព័ទ្ធសេដ្ឋកិច្ចដែលដឹកនាំដោយអារ៉ាប៊ីសាអ៊ូឌីត ដែលរួមបញ្ចូលទាំងប្រទេស បារ៉ែន និងអេហ្ស៊ីប ផងដែរនោះ ចោទប្រកាន់ទីក្រុងដូហាពីបទគាំទ្រចលនាអ៊ីស្លាម និងគាំទ្រប្រទេស អ៊ីរ៉ង់ ពោលគឺជាការចោទប្រកាន់ដែលកាតាបានបដិសេធ។
អង្គការ WTO បានឲ្យដឹងក្នុងសេចក្ដីប្រកាសព័ត៌មានមួយថា៖ «កាលពីថ្ងៃទី ២៨ ខែ មករា ឆ្នាំ ២០១៩ អេមីរ៉ាតអារ៉ាប់រួម បានស្នើសុំឲ្យមានការប្រឹក្សាយោបល់ជាមួយប្រទេស កាតា ទាក់ទងនឹងវិធានការដែលបានដាក់ដោយកាតា ជាប់ទាក់ទងនឹងការនាំចូល ការស្ដុក ការចែកចាយ ការធ្វើទីផ្សារ ឬការលក់ទំនិញមកពីប្រទេស អេមីរ៉ាតអារ៉ាប់រួម »។
ប្រទេស អេមីរ៉ាតអារ៉ាប់រួម បានឲ្យដឹងថា វិធានការដែលប្រទេសរបស់ខ្លួនកំពុងប្រឈម «ទំនងជាមានភាពមិនស្រប» ទៅនឹងកិច្ចព្រមព្រៀងរបស់អង្គការ WTO។
ប៉ុន្តែកាលពីថ្ងៃពុធ ប្រទេស កាតា បានវាយប្រហារតបតវិញ ដោយលើកឡើងនៅក្នុងសេចក្ដីប្រកាសព័ត៌មានមួយថា៖ «ការឈឺចាប់ដែលទទួលរងដោយក្រុមហ៊ុននាំចេញរបស់ប្រទេស អេមីរ៉ាតអារ៉ាប់រួម» គឺដោយសារតែវិធានការពាណិជ្ជកម្មបង្ខិតបង្ខំរបស់ប្រទេស អេមីរ៉ាតអារ៉ាប់រួម ដែលបានកំណត់ទិសដៅប្រទេស កាតា និងប្រជាជនកាតា»។
កាតា បានចេញបញ្ជាឲ្យគ្រប់ហាងលក់ទំនិញទាំងអស់ឈប់លក់ទំនិញដែលមានប្រភពមកពីក្រុមសម្ព័ន្ធមិត្តដែលដឹកនាំដោយអារ៉ាប៊ីសាអ៊ូឌីត។
រដ្ឋាភិបាលកាតាបានប្រាប់នៅពេលនោះថា៖ «ផលិតផលដែលមានប្រភពមកចេញពីរដ្ឋនានាដែលបិទផ្លូវគមនាគមន៍ [មិនឲ្យកាតាឆ្លងកាត់] ដែលជាលទ្ធផលនៃការបិទផ្លូវនេះ បណ្ដាលឲ្យមិនអាចឆ្លងកាត់គយរបស់ក្រុមប្រឹក្សាកិច្ចសហប្រតិបត្តិការឈូងសមុទ្រពែក្ស (GCC) បាននោះ ត្រូវតែឆ្លងកាត់ការត្រួតពិនិត្យការនាំចូល និងនីតិវិធីគយត្រឹមត្រូវ»។
កាតាបន្តថា៖ «កាតាធ្វើគោលនយោបាយពាណិជ្ជកម្មរបស់ខ្លួនស្របជាមួយកិច្ចព្រមព្រៀងពហុភាគី និងទ្វេភាគីទាំងអស់របស់ខ្លួន»។
កាតាកំពុងសំដៅទៅក្រុមប្រឹក្សាកិច្ចសហប្រតិបត្តិការឈូងសមុទ្រពែក្ស ដែលរួមមានប្រទេស បារ៉ែន កូវ៉ែត អូម៉ង់ កាតា អារ៉ាប៊ីសាអ៊ូឌីត និងអេមីរ៉ាតអារ៉ាប់រួម៕AFP/LA