ក្រុងដូហាៈ ប្រទេសកាតានឹងចាកចេញពីអង្គការប្រទេសនាំចេញប្រេង (OPEC) នៅខែក្រោយនេះ ដើម្បីផ្តោតទៅលើផលិតកម្មឧស្ម័ន។ នេះបើយោងតាមការប្រកាសដ៏គួរឲ្យភ្ញាក់ផ្អើលមួយកាលពីល្ងាចថ្ងៃចន្ទដោយលោក Saad al-Kaabi រដ្ឋមន្ត្រីក្រសួងថាមពលរបស់ប្រទេសក្នុងឈូងសមុទ្រពែក្សមួយនេះ។
ប្រទេសកាតា ជាសមាជិករបស់អង្គការ OPEC ចាប់តាំងពីឆ្នាំ ១៩៦១ មកម្ល៉េះ ហើយការសម្រេចចិត្តដកខ្លួនចេញបន្ទាប់ពីចូលរួមជាមួយអង្គការនេះអស់រយៈពេលជាច្រើនទសវត្សរ៍មកហើយនោះកើតមានឡើងក្នុងគ្រាដែលមានការរង្គោះរង្គើនយោបាយនៅក្នុងតំបន់ឈូងសមុទ្រពែក្សជាមួយសម្ព័ន្ធមិត្តជិតខាងរបស់ខ្លួនអស់រយៈពេល ១៨ ខែរួមទាំងអារ៉ាប៊ីសាអ៊ូឌីតផងដែរ។
លោក Kaabi ថ្លែងក្នុងសន្និសីទសារព័ត៌មានមួយកាលពីល្ងាចថ្ងៃចន្ទនៅទីក្រុងដូហាថា៖ «ប្រទេសកាតាបានសម្រេចចិត្តដកសមាជិកភាពរបស់ខ្លួនចេញពីអង្គការ OP-EC ដែលនឹងចូលជាធរមានគិតចាប់ពីខែមករា ឆ្នាំ ២០១៩ តទៅ ហើយការសម្រេចចិត្តនេះត្រូវបានបញ្ជូនទៅកាន់អង្គការ OPEC នៅព្រឹកនេះ [ព្រឹកថ្ងៃចន្ទ]»។
លោក Kaabi ដែលជាប្រធានគ្រប់គ្រងក្រុមហ៊ុនប្រេង Qatar Petroleum របស់រដ្ឋបានបដិសេធថា ការសម្រេចចិត្តនេះជាប់ទាក់ទងទៅនឹងជម្លោះជាមួយអារ៉ាប៊ីសាអ៊ូឌីត និងសម្ព័ន្ធមិត្តរបស់ខ្លួន។
លោកថ្លែងថាការសម្រេចចិត្តនេះគឺជា «បច្ចេកទេស និងយុទ្ធសាស្ត្រ» ហើយមិនមានអ្វីជាប់ពាក់ព័ន្ធនឹងករណីបិទផ្ទប់កាតានោះទេ។
លោក Kaabi បានឲ្យដឹងថា ប្រទេសកាតានឹងបន្តផលិតប្រេង និងស្វែងរកកិច្ចព្រមព្រៀងជាមួយប្រទេសមួយចំនួនរួមទាំងប្រទេសប្រេស៊ីលដែលជាប្រទេសផលិតប្រេងធំៗនៅអាមេរិកឡាទីនផងដែរ។
ប៉ុន្តែទោះបីជាមានការបដិសេធរបស់ប្រទេសកាតាថាមិនពាក់ព័ន្ធនឹងនយោបាយក៏ដោយ ក៏អ្នកវិភាគមួយចំនួនបានចាត់ទុកថាវាជា «ការសម្រេចចិត្តបែបនយោបាយដើម្បីប្រឆាំងនឹងប្រទេសអារ៉ាប៊ីសាអ៊ូឌីត»។
លោក Thierry Bros អ្នកស្រាវជ្រាវមកពីវិទ្យាស្ថានសិក្សាថាមពល Oxford Institute for Energy Studies ថ្លែងថា អារ៉ាប៊ីសាអ៊ូឌីត សហរដ្ឋអាមេរិក និងរុស្ស៊ី ជាប្រទេសផលិតប្រេងដ៏ធំបំផុត។ លោកថ្លែងថា៖ «ដូច្នេះតើវាពិតជាមានតម្លៃទេ ដែលនរណាម្នាក់ដូចប្រទេសកាតាធ្វើដំណើរទៅកាន់ទីក្រុងវីយែន ដើម្បីជួបជាមួយនរណាម្នាក់ដែលនឹងដឹកនាំកិច្ចប្រជុំនោះ ហើយតើនរណាជាសត្រូវរបស់អ្នក?»។
លោកបានបន្ថែមថា៖ «នៅទីបញ្ចប់ប្រហែលជាអ្នកអាចធ្វើបានដោយគ្មានវា»។
លោក Kaabi បានថ្លែងថាផលិតកម្មឧស្ម័ននឹងនៅតែជាអាទិភាពកំពូលសម្រាប់កាតាដែលជាប្រទេសនាំចេញឧស្ម័នធម្មជាតិ LNG ធំជាងគេបំផុតនៅក្នុងពិភពលោក។
លោក Kaabi បានថ្លែងឲ្យដឹងថា៖ «យើងមិនមានសក្តានុពលច្រើន (នៅក្នុងប្រេង) ទេ យើងពិតជាមានភាពប្រាកដនិយម។ សក្តានុពលរបស់យើងគឺឧស្ម័ន»៕ NS