.jpg)
លោក Saad al-Kaabi ទេសរដ្ឋមន្ដ្រីទទួលបន្ទុកកិច្ចការថាមពល និងជាអគ្គនាយកក្រុមហ៊ុន Qatar Petroleum របស់ប្រទេស កាតា។ AFP
ក្រុងដូហាៈ ប្រទេស កាតា ដែលសម្បូរប្រភពថាមពល និងស្ថិតក្រោមការរារាំងដោយប្រទេសជិតខាងនៅឈូងសមុទ្រពែក្សរបស់ខ្លួន បានឲ្យដឹងកាលពីថ្ងៃអាទិត្យថា ខ្លួនគ្រោងនឹងវិនិយោគបន្ថែម ២០ ពាន់លានដុល្លារលើវិស័យថាមពលរបស់អាមេរិកក្នុងរយៈពេល ៥ ឆ្នាំក្រោយ។
លោក Saad al-Kaabi ទេសរដ្ឋមន្ដ្រីទទួលបន្ទុកកិច្ចការថាមពល និងជាអគ្គនាយកក្រុមហ៊ុន Qatar Petroleum របស់ប្រទេស កាតា បានប្រាប់សន្និសីទនៅទីក្រុងដូហាថា ប្រទេសឈូងសមុទ្រមួយនេះ កំពុងស្វែងរកការវិនិយោគលើវិស័យប្រេង និងឧស្ម័នរបស់អាមេរិក ព្រមទាំងធនធានមិនទាន់រុករកជាច្រើនទៀតផងដែរ។
លោក Kaabi បានប្រាប់វេទិកាមួយនៅទីក្រុងដូហាថា៖ «ទឹកប្រាក់ ២០ ពាន់លានដុល្លារ នឹងត្រូវវិនិយោគក្នុងពេល ៥ ឆ្នាំក្រោយនៅអាមេរិកក្នុងគម្រោងផ្សេងៗគ្នា»។
លោកបានឲ្យដឹងថា ទិសដៅកំណត់ដ៏សំខាន់របស់ប្រទេស កាតា នឹងធ្វើឲ្យរស់ឡើងវិញនៃ ស្ថានីយ Golden Pass LNG ដែលជារោងចក្រផលិតឧស្ម័នធម្មជាតិមានតម្លៃច្រើនពាន់លានដុល្លារនៅរដ្ឋតិចសាស។
លោកថ្លែងថា៖ «យើងកំពុងគិតអំពីការធ្វើឲ្យគម្រោងនេះដំណើរការឆ្ពោះទៅមុខជាមួយដៃគូរបស់យើង»។ លោកបន្ថែមថា ការសម្រេចចិត្តចុងក្រោយលើបញ្ហានេះនឹងត្រូវធ្វើឡើងក្នុងរយៈពេលឆាប់ៗខាងមុខនេះ។
ក្រុមហ៊ុន Qatar Petroleum គ្រប់គ្រង ៧០ ភាគរយនៃគម្រោងនេះ ហើយក្រុមហ៊ុន ExxonMobil និងក្រុមហ៊ុន ConocoPhillips គ្រប់គ្រងភាគហ៊ុនដែលនៅសល់។
លោក Kaabi បានបន្តថា ការផលិតឧស្ម័នធម្មជាតិ (LNG) របស់ប្រទេស កាតា នឹងកើន ១៦ លានតោនប្រចាំឆ្នាំ ដោយមានបំណងបង្កើនដល់ ១១០ លានតោនក្នុង ១ ឆ្នាំក្នុងរយៈពេល ៥ ឆ្នាំ។
ក្រុមហ៊ុន Qatar Petroleum កាលពីថ្ងៃអាទិត្យ បានចុះកិច្ចព្រមព្រៀងមួយជាមួយក្រុមហ៊ុន Eni របស់ប្រទេស អីុតាលី ដើម្បីទិញភាគហ៊ុន ៣៥ ភាគរយនៅក្នុងប្លុកប្រេងនៅសមុទ្រចំនួន ៣ ក្នុងប្រទេស ម៉ិកស៊ិក ក្នុងការវិនិយោគដ៏ធំលើកទី ២ របស់ប្រទេស កាតា នៅប្រទេស អាមេរិក ខាងជើងមួយនេះក្នុងឆ្នាំ ២០១៨។
កិច្ចព្រមព្រៀងនេះនឹងអភិវឌ្ឍការផលិតប្រេងក្នុងអណ្ដូងរ៉ែទាំង ៣ កន្លែងនេះដល់ប្រហែល ៩០ ០០០ បារ៉ែលក្នុង ១ ថ្ងៃក្នុងឆ្នាំ ២០២១។
ប្រទេស កាតា បានប្រកាសកាលពីដើមខែនេះថា ខ្លួននឹង ដកខ្លួនចេញពីអង្គការ OPEC ពោលគឺជាការសម្រេចចិត្តមួយ ដែលលោក Kaabi បានឲ្យដឹងថា មិនមែនជា «នយោបាយ» នោះទេ៕ AFP/LA
