.jpg)
ទង់ជាតិប្រទេស ចិន និងទង់ជាតិសហរដ្ឋអាមេរិច។ AFP
ក្រុងវ៉ាស៊ីនតោនៈ ប្រធានាធិបតីអាមេរិកលោក ដូណាល់ ត្រាំ កាលពីថ្ងៃអាទិត្យបានបង្កឲ្យមានមន្ទិលសង្ស័យបន្ថែមទៀតលើឱកាសក្នុងការសម្រេចបានកិច្ចព្រមព្រៀងពាណិជ្ជកម្មជាមួយទីក្រុងប៉េកាំង ដោយបានបង្ហាញថា លោកអាចលុបចោលការចរចានានាដែលគ្រោងនឹងធ្វើឡើងនៅខែកញ្ញាក្នុងគ្រាដែលសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិនកំពុងឡើងកម្តៅ។
លោក ត្រាំ បានប្រាប់ក្រុមអ្នកយកព័ត៌មាននៅសេតវិមានមុនពេលធ្វើដំណើរទៅកាន់ព្រឹត្តិការណ៍រៃអង្គាសប្រាក់ក្នុងទីក្រុងញូវយ៉កថា៖ «យើងនឹងមើលឃើញថា តើយើងរក្សាទុកកិច្ចប្រជុំរបស់យើងនៅខែកញ្ញាឬអត់?»។
ទំនាក់ទំនងរវាងប្រទេសទាំង ២ បានប្រែក្លាយជាជូរចត់ក្នុងរយៈពេលមួយសប្តាហ៍ចុងក្រោយនេះ បន្ទាប់ពីលោក ត្រាំ បានប្រកាសវិធានការដកហូតពន្ធពិន័យជុំថ្មីមួយលើទំនិញរបស់ចិន បើទោះជាមានកិច្ចព្រមព្រៀងឈប់ដកហូតពន្ធដែលបានព្រមព្រៀងគ្នាជាមួយលោកប្រធានាធិបតីចិន ស៊ី ជីនភីង កាលពីខែឧសភាក្តី ហើយទីក្រុងប៉េកាំងបានឆ្លើយតបវិញជាមួយការផ្អាកទិញទំនិញកសិកម្មរបស់អាមេរិកទាំងអស់។
ក្រសួងរតនាគារអាមេរិកក្រោយមកបានប្រកាសថា ចិនគឺជាប្រទេសគ្រប់គ្រងតម្លៃរូបិយប័ណ្ណ បន្ទាប់ពីប្រាក់យន់បានបាត់បង់តម្លៃខ្លាំងក្នុងគ្រាដែលជុំថ្មីមួយនៃការដកហូតពន្ធគយគ្រោងនឹងធ្វើឡើងនៅថ្ងៃទី ១ ខែកញ្ញា។
លោក ត្រាំ បានថ្លែងទៀតថា៖ «យើងមិនទាន់ត្រៀមខ្លួនរួចរាល់ដើម្បីសម្រេចបានកិច្ចព្រមព្រៀងមួយនៅឡើយទេ ប៉ុន្តែយើងនឹងមើលឃើញអ្វីដែលនឹងកើតឡើង។ យើងមានសន្លឹកបៀគ្រប់ក្នុងដៃ។ យើងកំពុងធ្វើបានល្អ»៕AFP/KC
