ភ្នំពេញៈ ការនាំចេញកៅស៊ូរបស់កម្ពុជាបានកើនឡើង ២២ ភាគរយ ក្នុងអំឡុង ៩ ខែដំបូងឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមតួលេខបានពីក្រសួងកសិកម្ម។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូ នៅក្រសួងកសិកម្មបានឲ្យដឹងថា ក្រុមហ៊ុនផលិតក្នុងស្រុក បាននាំចេញកៅស៊ូ ១៤០-៣០៣ តោន ក្នុងអំឡុងពេលនេះកើនឡើង ២៥ ២៤០ តោន ធៀបនឹងឆ្នាំមុន។
លោក សុផា បានបញ្ជាក់ថា តម្លៃកៅស៊ូបន្តធ្លាក់ចុះ ១៨ ភាគរយក្នុងអំឡុងពេលនេះ បើធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ១ ៣៦៨ ដុល្លារក្នុង ១ តោន។ តម្លៃនេះក៏ធ្លាក់ចុះពី ១ ៤៣៤ ដុល្លារក្នុង ១ តោនធៀបនឹងឆមាសទី ១ ឆ្នាំនេះផងដែរ។
លោក ប៉ុល សុផា បានឲ្យដឹងថា ការកើនឡើងការនាំចេញគឺដោយសារការផលិតរបស់កម្ពុជាកាន់តែខ្ពស់ ហើយការធ្លាក់ចុះតម្លៃជានិន្នាការទីផ្សារអន្តរជាតិ។ ប៉ុន្តែលោករំពឹងថា តម្លៃនឹងកើនឡើងនៅ ២-៣ ឆ្នាំក្រោយផ្អែកតាមទីផ្សារអន្តរជាតិនេះ។
លោកថ្លែងថា៖ «ដោយសារតែការព្យាករតម្លៃទីផ្សារអន្តរជាតិ តម្លៃកៅស៊ូនឹងកើនឡើងនៅរយៈពេល ២-៣ ឆ្នាំក្រោយ ទោះបីជាតម្លៃបច្ចុប្បន្ន ទាបជាងកាលពីឆ្នាំមុនក៏ដោយ ប៉ុន្តែវានៅតែមិនប៉ះពាល់ដល់វិស័យកសិឧស្សាហកម្មនេះទេ ខណៈដែលអាជីវកម្មកៅស៊ូគ្រួសារ នៅតែទទួលបានប្រាក់ចំណេញ។
លោកបន្តថា៖ «ការដាំដុះកៅស៊ូនៅតែជាដំណាំមានសក្ដានុពលនៅកម្ពុជា ហើយមិនមានហានិភ័យច្រើនដូចដំណាំផ្សេងទៀតនោះទេ»។
លោក សុផា ឲ្យដឹងថា ផ្ទៃដីដាំដុះកៅស៊ូសរុប នឹងកើនឡើងដល់ ៤៥០ ០០០ ហិកតាក្នុងឆ្នាំ ២០២៥។ នៅពេលនេះកម្ពុជា មានផ្ទៃដីដាំដុះកៅស៊ូសរុប ៤២៧ ០០០ ហិកតា ក្នុងចំណោមនោះ ២០១ ០០០ ហិកតាអាចប្រមូលផលបាន។
លោកបន្ថែមថា រដ្ឋាភិបាលក៏កំពុងស្ថិតលើការពិចារណា ក្នុងការជួយសម្រួលការទូទាត់ពន្ធ ដើម្បីផ្ដល់លក្ខខណ្ឌកាន់តែប្រសើរ ដល់ក្រុមហ៊ុនផលិត និងក្រុមហ៊ុននាំចេញក្នុងស្រុកផងដែរ។
លោក ម៉ែន សុភក្ដិ ប្រធានសមាគមអភិវឌ្ឍន៍កៅស៊ូកម្ពុជា បានឲ្យដឹងថា តម្លៃបច្ចុប្បន្នមិនផ្ដល់ប្រាក់ចំណេញសម្រាប់ក្រុមហ៊ុនផលិតនោះទេ។
លោកថ្លែងថា៖ «វាមិនមានជម្រើសនោះទេ កៅស៊ូត្រូវតែលក់ចេញ ទោះបីជាក្នុងតម្លៃណាក៏ដោយ ដោយសារតែមិនមានរោងចក្រផលិត ផលិតផលសម្រេច»។
ឧស្សាហកម្មកៅស៊ូរបស់កម្ពុជាក៏ទទួលរងផលប៉ះពាល់ដោយសារតែការរីករាលដាលការរត់ពន្ធនៅតាមព្រំដែនទៅវៀតណាមផងដែរ។
ប្រទេស កម្ពុជា រកប្រាក់ចំណូលប្រហែល ៣០០ លានដុល្លារពីការនាំចេញកៅស៊ូជិត ១៨៩ ០០០ តោនកាលពីឆ្នាំមុន។ នេះបើយោងតាមរបាយការណ៍។ កំណើននេះត្រូវបានជំរុញដោយកំណើនតម្លៃ ដែលបានកើនឡើងដល់ ១ ៥៨៦ ដុល្លារកាលពីឆ្នាំមុន ធៀបនឹង ១ ២៨៣ ដុល្លារកាលពីឆ្នាំ ២០១៦។
លោក អ៊ុំ យិន ប្រធានសមាគមកៅស៊ូគ្រួសារមេមត់ បានឲ្យដឹងថា តម្លៃបច្ចុប្បន្នគឺជាតម្លៃដែលអាចរស់បាន ប៉ុន្តែវាមិនបានផ្តល់ប្រាក់ចំណេញច្រើននោះទេ។
លោកថ្លែងថា៖ «យើងអាចដោះស្រាយសម្រាប់តម្លៃនៃការផលិត តែវាមិនផ្តល់ជាប្រាក់ចំណេញច្រើនសម្រាប់ពួកយើងនោះទេ តម្លៃនេះគ្រាន់តែផ្ដល់ឲ្យរស់តែប៉ុណ្ណោះ យើងមិនមានជម្រើសក្រៅពីធ្វើជាកសិករកៅស៊ូនោះទេ»៕LA