ភ្នំពេញ: ការនាំចេញអង្ករកម្ពុជាទៅកាន់ទីផ្សារអន្តរជាតិមានចំនួន ៥០ ៤៥០ តោន ធ្លាក់ចុះ ១៥,៣៩ ភាគរយ ដែលមានតម្លៃ ៣៩ លានដុល្លារ នៅក្នុងខែមករា ឆ្នាំ ២០២០ ធៀបនឹងខែមករា ឆ្នាំ ២០១៩។ នេះបើតាមអគ្គលេខាធិការសហព័ន្ធស្រូវអង្ករកម្ពុជា។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) បានប្រាប់ ភ្នំពេញប៉ុស្តិ៍កាលពីថ្ងៃអាទិត្យថា ការនាំចេញអង្ករកម្ពុជាទៅកាន់សហភាពអឺរ៉ុបបានធ្លាក់ចុះ ២២ ភាគរយ ឬស្មើនឹង ៥ ២៦៩ តោន ចាប់តាំងពីសហភាពអឺរ៉ុបបានដាក់ចេញរបាំងពន្ធគយកាលពីឆ្នាំមុនមក ខណៈការនាំចេញអង្ករទៅកាន់ទីផ្សារប្រទេស ចិន ក៏បានបង្ហាញពីការធ្លាក់ចុះ ២០ ភាគរយ ឬស្មើនឹង ៣ ៦៦៤ តោនផងដែរ។
លោកថ្លែងថា៖ «ទោះយ៉ាងណា ការនាំចេញអង្ករកម្ពុជាទៅសហភាពអឺរ៉ុបនឹងមានកំណើនវិញចាប់ពីខែក្រោយទៅ ដោយសារពន្ធនាំចូលអង្ករទៅអឺរ៉ុបនឹងធ្លាក់ចុះពី ១៧៥ អឺរ៉ូមកត្រឹម ១៥០ អឺរ៉ូ។ ការគិតពន្ធនេះនឹងចាប់អនុវត្តពីពាក់កណ្តាលខែកុម្ភៈឆ្នាំនេះទៅ»។
សំដៅដល់ការប្រារព្ធពិធីបុណ្យចូលឆ្នាំចិននៅខែមករាឆ្នាំនេះលឿនជាងកាលពីឆ្នាំមុនដែលធ្វើឡើងនៅខែកុម្ភៈលោកបន្ថែមថា៖ «ពិធីបុណ្យចូលឆ្នាំចិនដែលប្រារព្ធធ្វើលឿនជាងឆ្នាំមុនបាននាំឲ្យចិនកាត់បន្ថយការបញ្ជាទិញអង្ករពីកម្ពុជា។ ខ្ញុំគិតថា ការនាំចេញអង្ករទៅចិននឹងបន្តទទួលរងប៉ះពាល់ជាអវិជ្ជមានក្នុងរយៈពេលវែង ដោយសារការផ្ទុះវីរុសកូរ៉ូណាប្រភេទថ្មីនៅទីក្រុងវូហាន ប្រទេសចិន»។ លោកបន្តថា ក្រុមហ៊ុននាំចេញអង្ករកម្ពុជាមួយចំនួនបានប្រកាសពន្យារពេលនាំចេញទៅប្រទេសចិនតាំងពីសប្តាហ៍មុនមកម្ល៉េះ។
ទន្ទឹមនឹងនេះដែរ សហភាពអឺរ៉ុបនៅតែបន្តជាទីផ្សារឈានមុខគេសម្រាប់អង្ករកម្ពុជាក្នុងខែមករានេះ ដោយមានចំណែកទីផ្សារ ៣៧ ភាគរយស្របពេលប្រទេសចិនមាន ៣០ ភាគរយ អាស៊ានមាន ១១ ភាគរយ និងបណ្តាប្រទេសផ្សេងៗទៀតមាន ២២ ភាគរយ។ នេះបើតាមរបាយការណ៍របស់ CRF។
របាយការណ៍ដដែលនេះបានបង្ហាញថា ការនាំចេញអង្កររបស់កម្ពុជាបានកើនឡើងដល់ចំនួន ៦២០ ១០៦ តោននៅឆ្នាំ ២០១៩ ធ្លាក់ចុះ ០,៩៧ ភាគរយធៀបនឹងឆ្នាំ ២០១៨ ដែលនាំចេញបានចំនួន ៦២៦ ២២៥ តោន។
ថ្លែងក្នុងសន្និសីទមួយនៅពិធីពិព័រណ៍ពាណិជ្ជកម្មរយៈពេល ២ ថ្ងៃស្តីពី «ឱកាសពាណិជ្ជកម្មក្នុងវិស័យកសិកម្ម» ដែលធ្វើឡើងកាលពីសប្តាហ៍មុន លោក Patrick Murphy ឯកអគ្គរដ្ឋទូតអាមេរិកប្រចាំនៅកម្ពុជាបានប្តេជ្ញាថា នឹងជួយលើកកម្ពស់លទ្ធភាពទទួលបានហិរញ្ញវត្ថុពីគ្រឹះស្ថានអាមេរិកសម្រាប់ក្រុមហ៊ុននាំចេញ ក្រុមហ៊ុនផលិត និងសហគ្រាសធុនតូច និងមធ្យមរបស់ប្រទេស កម្ពុជា ក្នុងការបង្កើនការនាំចេញកសិកម្មកម្ពុជាទៅទីផ្សារអាមេរិក។
លោកមានប្រសាសន៍ថា៖ «ក្រុមហ៊ុនផលិត និងនាំចេញអង្ករធំៗអាចទទួលបានការធានាកម្ចីពីធនាគារអាហរ័ណនីហរ័ណអាមេរិកដែលនឹងផ្តល់ឲ្យក្រុមហ៊ុនទាំងនោះនូវលទ្ធភាពទទួលបានកម្ចីឯកជន ដែលផ្តល់ឲ្យពួកគេនូវលទ្ធភាពទិញឡសម្ងួតដែលមានបច្ចេកវិទ្យាទំនើបសម្រាប់សម្ងួតស្រូវ»៕