ក្រុងប៉េកាំងៈ ការប្រើប្រាស់មាសរបស់ប្រទេស ចិន នៅតែបន្តកើនឡើងនៅ ៣ ត្រីមាសដំបូងក្នុងឆ្នាំនេះដោយសារតែមានតម្រូវការក្នុងស្រុកខ្លាំង។
សមាគមមាសរបស់ប្រទេស ចិន បានឲ្យដឹងកាលពីថ្ងៃអង្គារថា ការប្រើប្រាស់មាសបានកើនឡើងចំនួន ៥,០៨ ភាគរយ បើធៀបទៅនឹងរយៈពេលដូចគ្នាកាលពីឆ្នាំមុនដល់ ៨៤៩,៧ តោនក្នុងរយៈពេលចាប់ពីខែ មករា ដល់ខែ កញ្ញា។
ការលក់គ្រឿងអលង្ការមាសបានបង្ហាញពីស្ថិរភាពនៃកំណើន និងបានរួមចំណែកជិត ២ ភាគ ៣ នៃការប្រើប្រាស់មាសក្នុងស្រុកសរុប ខណៈការលក់ផលិតផលមានជាលក្ខណៈឧស្សាហកម្ម និងផលិតផលផ្សេងទៀតបានចុះបញ្ជីកំណើនយ៉ាងឆាប់រហ័សរហូតដល់ ២៤,៦៨ ភាគរយ។
កាសមាស ដែលមានប្រមាណតែ ២ ភាគរយប៉ុណ្ណោះនៃការប្រើប្រាស់មាសសរុបក្នុងប្រទេស ចិន កើនឡើងចំនួន ៦,៤៧ ភាគរយ។
សមាគមមួយនេះបានឲ្យដឹងថា ការលក់គ្រឿងអលង្ការនៅតែមានកំណើនរឹងមាំ ខណៈដែលតម្លៃមាសដែលកំពុងធ្លាក់ចុះបានជំរុញឲ្យអ្នកប្រើប្រាស់ទិញមាសកាន់តែច្រើន។ ទន្ទឹមនឹងនេះដែរ វិនិយោគិនបានចាប់ផ្តើមចូលចិត្តមាស និងទ្រព្យសកម្មផ្សេងៗទៀតក្នុងគ្រាដែលមានការកើនឡើងនៃភាពមិនច្បាស់លាស់នៅលើសកលលោក ខណៈតម្រូវការគ្រឿងអេឡិចត្រូនិកបានជំរុញការប្រើប្រាស់មាសជាលក្ខណៈឧស្សាហកម្ម។
ផ្ទុយមកវិញការលក់មាសដុំបានធ្លាក់ចុះចំនួន ៥,០៥ ភាគរយ។
ទិន្នន័យកាលពីថ្ងៃអង្គារក៏បានបង្ហាញផងដែរថា ក្នុងរយៈពេល ៩ ខែដំបូងក្នុងឆ្នាំនេះ ទិន្នផលមាសរបស់ចិនបានធ្លាក់ចុះចំនួន ៧,៤៦ ភាគរយធៀបនឹងរយៈពេលដូចគ្នា កាលពីឆ្នាំមុនមកនៅត្រឹម ២៨៩,៧៥ តោនប៉ុណ្ណោះ។
ចិន ជាប្រទេសផលិតនិងប្រើប្រាស់មាសច្រើនបំផុតនៅលើពិភពលោក៕ P.Daily/NS